Umwanya wa nyuma watumye Meya wa Musanze ahagurukira abakozi bamunaniye

1

Musabyimana Jean Claude uyobora Musanze yabaye iya nyuma

Umuyobozi w’Akarere ka Gasabo Rwamurangwa yemeza ko gukemura ikibazo cyo kudafatanya kw’inzego aribyo byatumye bahiga abandi, iki kibazo ariko Musabyimana Jean Claude uyobora Musanze yabaye iya nyuma we ngo nicyo agiye kwicara agashakira igisubizo kihuse.

Gasabo niyo yesheje umuhigo ihigitse utundi turere mu mihigo y’umwaka wa 2015-2016 n’amanota 81,6 % naho Musanze iba iya nyuma iza ku mwanya wa 30 n’amanota 70,37 %.

Nyuma yo kugaragarizwa ko akarere ayoboye ariko kabaye akanyuma mu tundi Turere, Musabyimana Jean Claude yavuze ko ibi bikwiye kuba amateka mu Karere ntibizongere kubaho ukundi.

Ati:”Murabyumva mu byukuri iyo uje ku mwanya nk’uriya ntabwo wakwishimira kuba uwa nyuma , ntabwo bishoboka ariko nanone ni n’umwanya umuntu abonye bituma afata ingamba mu mikorere n’imikoranire ndetse n’impanuro twahawe mwazumvise zinakomeye cyane. Kandi twizeye ko uyu mwanya Akarere kacu kadakwiriye kuwubaho kandi katazongera kuwugarukaho.”

Meya Musabyimana yavuze ko akiva kuri Convention Center ahabereye isinywa ry’imihigo, we n’abo bafatanyije kuyobora akarere ka Musanze buri wese agomba guhita yicara akisuzuma akareba aho atakoze ibyo yagombaga gukora maze akabikora.

Musanze iri mu turere twatunzwe agatoki na Minisitiri w’intebe ko abakozi bakora ibyo bishakiye.

ti:”Muri Musanze ibi iya nyuma hari ikibazo gikomeye cyane abakozi barigenga, meya kuki utayobora abakozi bawe, abakozi barakora ibyo bashaka nk’uko bari barabimenyereye”

Musabyimana ariko yavuze ko ikibazo cy’ubufatanye buke mu nzego cyagarutsweho na Minisitiri w’intebe agiye kukicarira kigakemuka mu rwego rwo kwirinda kuzongera kuba aba nyuma.

Ati:”Ni ikibazo natwe dukomeza gusuzuma tukareba impamvu hari abakozi nyine bameze gutyo, ndumva hari mu mbwirwaruhame mwabyumvise bavugaga ikibazo cy’abakozi bashobora kuba biyobora basa nk’abiyobora, bakora ibyo bashatse abakozi muzi uko bajyaho, tugomba gukurikirana tukareba ko bakora neza . twebwe hari n’aho twagiye dukorera amasuzuma ni imwe mu nzira zo kuvugurura kandi ndatekereza ko ayo mavugurura dukomeza kuyashyiramo imbaraga kugirango umuntu waba adakora ibyo agomba gukora akosorwe."

Musabyimana ntiyeruye ngo avuge niba mu nzego z’ubuyobozi bw’Akarere ayoboye haba harimo umwiryane cyangwa kutumvikana ariko yavuze ko iyo abayobozi bavuze ikibazo ubwo byanze bikunze kiba gihari.

Rwamurangwa Stephen uyobora Akarere ka Gasabo kabaye aka mbere we avuga ko ubu bufatanye Minisitiri w’intebe yavuze bwabuze mu turere tumwe na tumwe muri Gasabo ho ngo nibwo bubashoboje kwanikira abandi.

Yagize ati:”Icya mbere nk’uko Nyakubahwa Perezida wa Repubulika yabisubiyemo kandi ahora abisubiramo ni ugufatanya kw’inzego nibyo bituma abantu bashobora kugera ku mihigo biyemeje. Kudafatanya urumva nyine byanze bikunze bizana ibibazo urumva rero ikibazo gikomeye tugomba guhora twitaho ni uko inzego zigomba gufatanya.”



Meya Rwamurangwa uyobora Gasabo yabaye iya mbere mu Mihigo

Rwamurangwa avuga ko n’ubwo guhora utsinda bitoroshye ariko we ngo nibyo agiye guharanira ati:”Mu irushanwa ntabwo ari ihama ngo umuntu ahore aba uwa mbere ariko ubu nicyo tugiye guharanira kugirango uyu mwanya tutazawuvaho. Tuzakora ibishobora kugirango uyu mwanya tuwukomereho”

Iyi kihogo yeshejwe uyu munsi tariki ya 9/9/2016 niyo ya mbere aba bameya bisheje kuva batorerwa iyi manda mu kwezi kwa 2 uyu mwaka wa 2016. Igikorwa cy’imihigo cyatangijwe mu mwaka wa 2006 na leta y’u Rwanda kugirango gifashe abayobozi kwihuta mu bikorwa by’itera mbere.

Yisangize Inshuti.

Ibitekerezo 1

Tanga Igitekerezo