Kicukiro: Abaturage bambuwe bitewe n’ubwumvikane buke hagati y’Umurenge na rwiyemezamirimo

Abaturage bakoze isuku ku murenge wa Kicukiro, utugari tuwugize ndetse no mu mihanda yawo baravuga ko bambuwe na rwiyemezamirimo wabakoresheje na we agashinja ubuyobozi bw’umurenge kutubahiriza amasezerano bagiranye.

Aba baturage bavuga ko bambuwe na Rwiyemezamirimo Ntukabumwe Dieudonne wabahaye akazi ko gukora isuku ku murenge wa Kicukiro, utugari tuwugize ndetse no mi mihanda yawo. Aba baturage bavuga ko bambuwe amafaranga bakoreye mu kwezi n’igice mu gihe ku munsi bakoreraga amafaranga y’u Rwanda 1000.

Umwe mubaganiriye na Makuruki yagize ati :”Ubu njya mu nzu nka burara kandi narakoze, nukuri dukwiye ubuvugizi tukabona amafaranga twakoreye.”

Undi nawe yagize ati :”Abenshi dufite amacumbi banyirayo baratwirukanye ubu inzara yaratwishe kandi harimo n’abarundi b’impunzi twakoranaga bo urumva ko banamerewe nabi kuturusha baravuga ngo uku ni ukubasonga n’ubundi basanzwe bafite ibibazo.”

Uyu we avuga ko n’urugo rwe rugiye gusenyuka kuko umugabo we yatangiye gukeka ko yabaga yarigiriye mu bindi bitari akazi.

Ati :”Nkatwe dufite ingo twubatse abagabo baratubwira ngo ntimwajyaga ku kazi hari ahandi mwajyaga, bati kuki mukora ntimuhembwe kandi mwaravugaga ko mugiye gukora, ikibazo kikavuka abana bari kwirukanwa mu mashuri abagabo nabo bakaturaza hanze n’ubu tuba twaje kwishyuza ntibemera ko twaje kwishyuza.”

Aba bambuwe bose bavuga ko iyo bagiye kwishyuza bababwira ko ntamafaranga bafite kandi barakoze bababwira ko bazajya babahemba nyuma y’iminsi 15.

Bavuga ko ariko iyi minsi ishize bababwiye gukomeza gukora ngo bakazabahembwera rimwe ukwezi gushize ariko nabwo ntibabahemba ahubwo bakomeza kubabwira ngo bakomeze bakore bazabahemba barinda bageza ku minsi 45 nta faranga na rimwe bahawe.

Ntukabumwe Dieudonne yemereye umunyamakuru wacu ko koko aba baturage yabakoresheje ariko avuga ko ubuyobozi bw’umurenge ari nawo bagiranye amasezerano bwamubwiye ngo azajye kurega aho ashaka kuko gitifu atamuzi.

Ati :” nagerageje gusanga gitifu, Gitifu uzi ukuntu yambwiye ? yarambwiye ngo ntabwo anzi! nti nonese ko dufitanye amasezerano yanditse atari amasezerano yo mu magambo mwanyishyuye noneho nange nkishyura abakozi? Arambwira ngo nzagende murege aho nshaka! icyo nicyo gisubizo yampaye.”

Murebwayire Alphonsine uyobora uyu murenge na we yemera ko bahaye akazi uyu rwiyemezamirimo biciye ku mukozi wayo ushinzwe isuku.

Uyu muyobozi ariko avuga ko nyuma baje kuvumbura ko umukozi akorera igihumbi mu gihe rwiyemezamirimo we yababwiye ko umukozi akorera ibihumbi bibiri.

Abajijwe niba koko yaba yarabwiye uyu rwiyemezamirimo ngo azajye kurega aho ashaka yasubije agira ati :”We ubwe ni we wambwiye ko ibibazo bitagarukira mu murenge ko hari izindi nzego azajya kubazamo ikibazo cye naramubwiye ngo niba ushaka kujya mu zindi nzego ni uburenganzira bwawe.”

Solange Umutesi ari nawe ushinzwe isuku muri uyu murenge tumubajije niba koko yaragiranye amasezerano n’uyu rwiyemezamirimo yanze kugira icyo abitubwiraho atubwira ko kuba twavuganye n’umuyobozi w’umurenge we ntakindi yatubwira.

Amasezerano uyu rwiyemezamirimo agaragaza yagiranye n’uyu mukozi ushinzwe isuku Makuruki ifitiye kopi agaragaza ko bumvikanye ko buri mukozi azajya abarirwa amafaranga ibihumbi bibiri(2000frw) ku munsi hanyuma nawe akishakira ibikoresho.

Yisangize Inshuti.

Ibitekerezo

Tanga Igitekerezo