Kayonza:Barashinja abayobozi kubateza inzara, bagasabira Gitifu w’Akagali kwimurwa

Bamwe mu baturage batuye mu Kagali ka Rukara mu Murenge wa Rukara mu karere ka Kayonza baravuga ko babuze imbuto yo guhinga n’ifumbire kuko byagurishijwe magendu n’abayobozi b’Akagali, byanatume bibasirwa n’ibura ry’ibiribwa.

Aba baturage kandi bavuga ko bahohoterwa n’Umunyamamabanga Nshingwabikorwa w’Akagali ka Rukara bitewe no gutanga amakuru y’uburyo ifumbire n’imbuto byanyerejwe, bagasaba ko yakwimurirwa ahandi.

Abaturage bavuga ko ubu bibagora kubera kubura amafunguro bitewe n’uburyo batabashije kubona imbuto yo guhinga ndetse n’ifumbire basanzwe bahabwa muri gahunda ya leta yitwa Nkunganire Muhinzi.

Umwe muri abo baturage utuye mu Mudugudu wa Karambo aganira na Makuruki yagize ati “Ubusanzwe baduhaga ifumbire ndetse n’imbuto y’ibigori ariko muri season B twatunguwe no kujya gushaka ibigori ndetse n’ifumbire bakatubwira ko nta bihari ariko tuza kumenya ko gitifu yaba yarayigurishije magendu.”

Uwo muturage yakomeje agira ati “Twabuze imbuto yo guhinga ndetse n’ifumbire kuburyo dukwiye gutabarwa kuko tutakibona ibyo kurya. Ubusanzwe dutunzwe no guhinga, kugurisha ifumbire n’ibigori byatugizeho ingaruka kuko na n’ubu twabuze imbuto dukeka ko byahombeje rwiyemezamiriro akaba atazongera kuduha ifumbire ndetse n’imbuto muri gahunda ya nkunganire .”

Gitifu w’Akagali n’ushinzwe imibereho myiza baje gutabwa muri yombi ariko baza kurekurwa ngo bakurikiranwe bari hanze.

Abaturage batanze amakuru bagaragaza ko gitifu w’Akagali Murebwayire Agnes yagurishije ifumbire ya Nkunganire, bavuga ko abahohoterwa avuga ko bashatse kumufungisha ndetse bagasaba ko yakurwa muri ako Kagali ka Rukara ngo kuko nta serivisi nziza bagihabwa

Kakooza James, rwiyemezamirimo wagemuraga ifumbire n’imbuto, avuga ko nawe ubu ari mu gihirahiro kubera ifumbire n’imbuto byagurishijwe na gitifu, akibaza uburyo azishyurwamo bikamuyobera.

Yagize ati “Ifumbire yagurishijwe ku mugaragaro ndetse abayigurishije nabo barabyemeza. Ntabwo bari bakwiye kundushya ahubwo nubwo barekuwe njye ntabwo nasobanukiwe uburyo barekuwe kuko ubushinjacyaha n’ubu ntabwo bwigeze bumpa kopi ya dosiye ibarekuru ahubwo uretse kumva bavuga ngo nzajye kuburana nabo mu bunzi ariko ntabwo nigeze mpabwa kopi ya dosiye.”

Makuruki yageregeje kuvugana na Murebwayire, ariko inshuro zose twagerageje kuvugana na we kuri telefone ntibyadukundiye.

Ushinzwe imibereho myiza mu Karere ka Kayonza avuga ko ibibazo byo mu Kagali ka Rukara bitabaye agatereranzamba ahubwo barimo kubisuzuma.

Harelimana Jean Damascene yagize ati “Nibyo, ibibazo abaturage bafite twarabimenye kandi turimo kubisuzuma kandi tuzabikemura kuko abaturage ntabwo bagomba kurengana ariko ibijyanye n’abavuga ko bahohoterwa bo ntabyo twari tuzi ariko nabyo turaza kubikurikirana kandi tuzabikemura rwose.”

Uyu muyobozi avuga ko rwiyemezamirimo waburiye ifumbire ye mu Kagali bagiye kuganira nawe bamwumvikanishe n’abatanze ifumbire ariko ngo n’inzira yo kugana inkiko igomba kubahirizwa.

Hari bamwe mu baturage bandikiye inama njyanama y’Umurenge wa Rukara basaba kurenganurwa ndetse n’umukozi ushinzwe imibereho myiza n’iterambere yanditse asaba kwimurwa mu Kagali ka Rukara, kimwe na bamwe mu bakuru b’Umududugu ngo bashobora kwegura ngo kuko gitifu w’Akagali abatoteza abashinja kumugambanira.

Justin NGABONZIZA

Yisangize Inshuti.

Ibitekerezo

Tanga Igitekerezo