Kamonyi: Abaturage barataka akarengane, ubuyobozi buti "Ntahataba amakosa"

Abaturage bo mu murenge wa Gacurabwenge, mu karere ka Kamonyi, baravuga ko ubuyobozi bwabo bwabashyize mu byiciro by’ubudehe batashyizwemo n’abaturage kugira ngo bubone amanota mu mihigo ariko ubuyobozi bukabihakana bwemeza ko ntahataba amakosa mu gukora urutonde.

Aba baturage bavuga ko ibyiciro by’ubudehe bashyizwemo n’abaturage mu ruhame byari byabanyuze ariko ngo nyuma batunguwe nuko abenshi basohotse ku rutonde barashyizwe mu byiciro bisumba ubushobozi bwabo.

Bamwe mu batuye mu mudugudu wa Nyamugari, mu kagari ka Nkingo, muri uyu murenge, baganiriye na Makuruki.rw bavuze ko bababajwe cyane nuko ibyo bemereje mu baturage bose byahinduwe abayobozi bakabashyira mu byiciro bishakiye.

Umwe mubaganiriye na Makuruki.rw utashatse ko amazina ye atangazwako yavuze ko ibyiciro abaturage bari bemeje ari byo byari ukuri bitewe n’uko ngo baba baziranye, gusa ngo ibyiciro byaje nyuma basanze abishoboye barashyizwe mu cyiciro cyo hasi, naho abatishoboye bakaba mu cyiciro cyo hejuru, ibintu avuga ko mu gukora urutonde hirengajwe amakuru abaturage batanze.

Yagize ati “Ubwa mbere urutonde rwarasohotse baravuga ngo tujurire turabikora, urundi rutonde rwaje bamwe barabahinduye abandi barabareka, ubu usanga abantu bazwi nk’abishoboye ari bo bari mu cyiciro cya mbere yewe harimo n’abayobozi na ho abaturage bakennye cyane bari mu cya gatatu."

Undi yagize ati “Babikoze kugira ngo babone amanota ko nta bakene bafite aho bayobora, ni twe bashaka kweserezaho imihigo."

Umugiraneza Marthe, umuyobozi w’umurenge wa Gacurabwenge mu kiganiro yagiranye na Makuruki.rw kuri iki kibazo, yavuze ko atari igitangaza kuba habaho ikosa mu myandikire mu gihe cyo gukora urutonde, gusa ahakana ko nta muyobozi wagiye gukura umuturage mu cyiciro yashyizwemo n’abandi baturage.

Yongeyeho ko mu gushyira umuturage mu cyiciro hagenderwa no ku makuru ari ku mafishi yagiye anyuzwa mu baturage, buri rugo rukuzuzaho amakuru agaragaza imibereho yarwo.

Yagize ati “Ibintu byose bikorwa mu myandikire nta bitabamo amakosa, uretse nuko hari abavuga ko batasohotse mu cyiciro abaturage batabashyizemo hari n’usohoka ku rutonde rw’umudugudu wose atariho […]amakuru ari ku ifishi buri rugo rwagiye rwuzuza nayo agenderwaho mu kubaha ibyiciro ariko ibyo byose iyo bigaragaye baragaruka nyine hanyuma natwe tukabikoraho raporo”.

Uyu muyobozi yasabye ko umuturage wese ufite ikibazo cy’ibyiciro by’ubudehe yakwegera ubuyobozi bwe bugasuzuma ikibazo afite.

Mu minsi ishize Minisiteri y’Ubutegetsi bw’igihugu yatangaje ibyiciro bishya by’ubudehe aho byavuye kuri bitandatu bishyirwa kuri bine, inavuga ko yo ubwayo yikurikiraniye iki gikorwa kugeza bishyizwe ahagaragara.

Yisangize Inshuti.

Ibitekerezo

Tanga Igitekerezo