KAYONZA: Ubusinzi no kutumvira ubuyobozi bigiye gutuma inzu abamo imugwira

1

Iyi ni inzu ya BigirimanaYoweri abanamo n’umugore n’abana batatu agashinja ubuyobozi kutamufasha kubaka

Bigirimana Yoweri umuturage wo mu murenge wa Gahini, akagari ka Rugarama, umudugudu wa Akabahizi, mu karere ka Kayonza, avuga ko inzu abamo yenda kumugwaho kandi akaba adafite ubushobozi nyamara ubuyobozi bwo bukabyamaganira kure buvuga ko afite ubushobozi bwo kwiyubakira ahubwo ko yigize umusinzi ndetse akaba atanumva inama z’ubuyobozi bituma aba mu karuri ndetse anihagarika mu ishyamba rimwegereye.

Uretse iyi nzu Bigirimana avuga ko yenda kumugwaho, ngo nta n’ubwiherero agira nkuko bamwe mu baturanyi be babitangarije Makuruki.rw. Aba baturanyi batubwiye ko Bigirimana yiherera mu biti by’inturusu biri hafi y’urugo rwe ariko ngo kuri ubu akaba ahora ahanganye na nyir’ibyo biti.

Mu kiganiro Makuruki.rw yagiranye na Bigirimana, yavuze ko inzu ye yenda kumugwira akanashinja ubuyobozi kumwirengagiza.

Bigirimana yagize ati”Urabona iyi nzu mbamo irenda kungwaho, ubuyobozi burabizi kandi buranabibona kuko nturanye na bwo n’uko babyirengagiza.”

Bigirimana avuga ko yifuza ko ubuyobozi bufatanyije n’Imana bwamushakira aho yaba hafatika akava muri iyo inzu yenda kumugwaho.

Mu kiganiro twagiranye n’umukuru w’umudugudu wa Akabahizi, Mpamije Pierre yatubwiye ko koko uyu mugabo ari mu mudugudu abereye umuyobozi kandi ko atishoboye ariko agashimangira ko nta bumuga afite bwatuma atagira icyo yikorera ndetse ko anafite imbaraga akiri na muto.

Uyu muyobozi kandi avuga ko Bigirimana afite imyitwarire idahwitse n’ikinyabupfura gike, ikibabaza abayobozi kurushaho ngo ni uko n’amafaranga make abona ayatwara mu nzoga aho kuyashyira mu bikorwa byamugirira akamaro yarangiza agatega amaboko Leta.

Mpamije yagize ati”ikinyabupfura cye ni gike cyane, nta kintu aha agaciro twamusabye ko yashaka amatafari tukamufasha kubaka ariko yarabyanze kandi abifitiye ubushobozi. Ikindi kinatuma adafashwa ahanini ni imyitwarire ye, ni umuntu udashobora kwitabira umuganda, nta nama yazamo mbese gahunda za Leta nta n’imwe yitabira.”

Ibi kandi byemezwa n’abaturanyi ba Bigirimana bemeza ko n’ubwo uyu atishoboye hari ibyo yasabwe n’ubuyobozi atubahirije kandi abishoboye nko kubumba amatafari ubundi bakamwubakira ikindi nuko atitabira gahunda za Leta.

Ntivuguruzwa Oswald, umuyobozi ushinzwe irangamimerere mu murenge wa Gahini, yatubwiye ko bamaze igihe gito bamenye icyo kibazo ariko ko ngo uwo mugabo (Bigirimana) nta kintu na kimwe afite kimwemerera gufashwa.

Yavuze ko uyu mugabo akiri muto kandi afite imbaraga ndetse ko n’ubuyobozi bw’umudugudu n’akagari bwamugiriye inama yo kwaka inkunga na we hari icyo yerekanye ariko akanga kumva ibyo bamubwira ahubwo agakomeza kwibera mu kabari.

Uyu muyobozi avuga ko ubuyobozi bw’umurenge bugiye kumwegera bukamwereka ko agomba kubanza kwifasha, hanyuma ubuyobozi bukamufasha aho agize imbaraga nke.

Hashize igihe Leta y’u Rwanda ishishikariza abaturage gukura amaboko mu mifuka bagakora bagaharanira kwigira bakareka guhora iteka batega amaboko Leta kandi bafite imbaraga.

Gusa ikigaragara ni uko hakiri ahantu hari abantu batuye munzu zirutwa na nyakatsi bafite imyumvire yo kuvuga ko batishoboye nyamara n’udufaranga duke binjije badusesagura bagakomeza gutega amaboko ubuyobozi.

Yisangize Inshuti.

Ibitekerezo 1

Tanga Igitekerezo