Inkwano zabaye ikiguzi, Nyirasenge w’umuntu, umuranga no Kurambagiza byegurirwa Social Media,… Biteye inkeke

Inzego zitandukanye zagaragaje ko umuryango nyarwanda wugarijwe n’ibibazo bishingiye ku mitegurire y’ubukwe, ibyo bibazo birimo kuba Inkwano n’Ibirongoranwa bisigaye bifatwa nk’ikiguzi, Kurambagiza byataye agaciro, Umuranga na Nyirasenge w’umuntu basimbujwe social media, Imisango idahwitse, Isano yasimbujwe intwererano,n’ibindi

Ibi abahagarariye inzego zitandukanye babigaragarije mu nama nyunguranabitekerezo ku ndangagaciro z’ubukwe bwa kinyarwanda n’uruhare rwazo mu kubaka umuryango yabereye i Kigali kuri uyu wa 16 Ugushyingo 2017.

Ni inama yahuje abantu baturutse mu nzego zitandukanye zifite aho zihuriye n’umuryango zirimo amadini n’indi miryango yigenga, Inteko nyarwanda y’ururimi n’umuco, Minisiteri ya Siporo n’umuco, iy’Uburinganire n’iterambere ry’umuryango, iy’ubutegetsi bw’igihugu, urwego rw’igihugu rw’imiyoborere n’abandi batandukanye.

Iyi nama nyunguranabitekerezo ije nyuma y’ubushakashatsi bwashyizwe ahagaragara n’inteko nyarwanda y’ururimi n’umuco (RALC) bwagaragaje ko Inkwano n’ibirongoranwa byabaye umutwaro uremereye mu bukwe bwo mu Rwanda.

Muri iyi nama Minisitiri w’Umuco na Siporo Uwacu Julienne yagarutse ku gisobanuro cy’inkwano aho yagize ati: "Inkwano mu bukwe bwa kera ari no mu bukwe bw’ubu ntabwo ari ikiguzi!"

Ku rundi ruhande RALC na yo ivuga ko "Inkwano atari itegeko kuko itabonetse ntibyabuza ko abantu bashyingiranwa"

Abari muri iyi nama bagaragaje ko kuba haramaze kujyaho ibiciro by’inkwano ari ikibazo gikomeye kuko ubukwe bwabaye nk’uburyo butanga amahirwe yo kugura no kugurisha, ugasanga impande zombi zishakira inyungo mu bukwe.

Minisitiri Uwacu yagaragaje ko ubukwe bwiza kandi bwubahirije intabwe nyazo ziranga ubukwe bwa kinyarwanda buba umusingi w’urugo rwiza bityo n’umuryango mugari w’abantu ugasugira.

Abitabiriye iyi nama bagaragaje ko umuco wo kurambagiza wavuyeho kandi ari kimwe mu bintu by’ingenzi bituma umuryango ushinga imizi kuko umuntu warambagije ngo abana n’uwo azi neza bigatuma umubano wabo ukomezwa nuko baziranye kandi bashimanye imico n’imyitwarire.

RALC yo ngo mu bushakashatsi bwayo yasanze Umuryango w’umukobwa urushya uw’umuhungu mu buryo bugaragara, hakabaho kubeshya mu misango, inkwano zihanitse, amagambo adahwitse mu misango n’ibindi biri mu byica ubukwe bw’iyi minsi.

Rucagu Boniface wahoze ayobora itorero ry’igihugu yavuze ko Umuryango nta ruhare ukigira mu bukwe bw’abana haba mu kurambagiza ndetse no mu kwemeza inkwano. Ndetse abandi bagaragaza ko umuranga atagifite agaciro kandi ngo nta bukwe butagira umuranga.

Kuba nta muranga ukibaho kandi no kurambagiza bikaba bitagihabwa agaciro cyangwa bigakorerwa gusa ku mbuga nkoranyambaga (Social Media) bituma ubuharike no gutandukana byiyongera.

Gusa uko byagenda kose, Minisitiri w’Ubutegetsi bw’igihugu Francis Kaboneka yibukije abanyarwanda ko mu mategeko umugabo agira umugore umwe, umugore akagira umugabo umwe. Kubw’ibyo abantu baba bagomba kwirinda hakiri kare icyatuma bashaka guharika abo bashakanye.

Berekanye ko umuryango ukwiye kugira uruhare mu bukwe no gufasha abashakanye kubaka ingo zikomeye kuko ngo "Urugo rwubakwa n’umugore n’umugabo, imiryango ikabagira inama"

Musenyeri Mbonyintege yerekanye ko umuryango ari wo shingiro ryo kubakira abagiye kurushinga kugirango bagire ingo zikomeye. Gusa ngo kuri ubu abantu bahurira kuri interineti bagakundana bakazahura bahita bakora ubukwe imiryango itabigizemo uruhare na ruto. Ibi ngo biri mu bituma ingo zitamara kabiri.

Mgr Mbonyintege yagize ati: "Ibibera kuri interineti nta mutima bigira, uwo mutima ni umuryango uwutanga, ni nyirasenge w’umwana uwutanga. Indangagaciro ya nyirasenge igomba kugaruka"

Umuryango nkuko ari wo shingiro ry’ubuzima bwose ngo uba ugomba gutanga uburere bwiza ku bana, kandi ukabagira inama ku bigendanye no gushyingiranwa. Gusa kuri ubu ngo igiteye impungenge ni uko ababyeyi basa n’abarekuye abana babaharira imbuga nkoranyambaga.

Ibi ngo bituma bamwe bamungwa n’imico mibi y’ubusambanyi byaburirwa igaruriro bamwe bakitabaza agakingirizo nk’umuti w’iki kibazo, ibintu byamaganwe na Ingabire Marie Imaculle uyobora Transparency International -Rwanda avuga ati: "Ubusambanyi ni ingeso. Sinemera ko agakingirizo gakemura ibibazo,... Sindumva umuntu wishwe no kwifata"

Bagarutse kubijyanye n’intwererano bavuga ko kuri ubu abatagira intwererano batagitaha ubukwe kabone n’iyo yaba ari umunyamuryango wa hafi. Ibi nabyo byamaganwe ndetse Ingabire we yabivuzeho agira ati: "Bridal shower ni uburiganya, ni ukuduhatira gutwerera ku ngufu kuko ntawe ujyayo ntacyo ajyanye"

Abakurikiranira hafi imibereho y’abanyarwanda bavuga ko ibibazo biri mu bukwe bw’iki gihe bifitanye isano ya hafi n’ibibazo byugarije umuryango nyarwanda birimo gutandukana kw’abashaknye bya hato na hato, kwicana mu bashakanye no hagati y’abana n’ababyeyi, ubuzererezi, ihohoterwa ry’uburyo butandukanye, ubuharike, ibiyobyabwenge mu ngimbi n’abangavu, n’ibindi umuntu atarondora.


Uwacu Julienne, Minisitiri w’umuco na Siporo

Rucagu Boniface wayoboye Itorero ry’igihugu igihe kinini

Nyirasafari Esperanye, Minisitiri w’uburinganire n’iterambere ry’umuryango

Mgr Mbonyintege, umushumba wa Diyosezi ya Kabgayi

Minisitiri Kaboneka Francis w’ubutegetsi bw’igihugu

Ingabire Marie Imaculee uyobora transparency international -Rwanda avuga

Iyi nama yari yitabiriwe n’inzego zitandukanye

Amafoto: RALC

Yisangize Inshuti.

Ibitekerezo

Tanga Igitekerezo