Ingabire yasabiye ibihano abafasha rwimeyezamirimo kwambura no kubaka bigahirima bitamaze kabiri

Umuyobozi w’Umuryango urwanya ruswa n’akarengane (Transparency International Rwanda) Ingabire Marie Immaculee yavuze ko abayobozi bafasha ba rwiyemezamirimo kwambura abaturage cyangwa kubaka bigahirima bitamaze kabiri, ko bakwiye kujya bahanwa byaba na ngombwa bakeguzwa.

Ikibazo cy’abaturage bamburwa na ba rwiyemezamirimo gisa n’icyabaye indirimbo mu bice bitandukanye by’igihugu.Ibyo kandi bijyana n’aba rwiyemezamirimo bata ibyo biyemeje kubaka bitaruzura, bagatoroka cyangwa babyubaka ejo bikagwa.

Ubwo hamurikwaga uko uturere twesheje imihigo y’umwaka wa 2015/2016 hanahigwa iy’umwaka utaha, Minisitiri w’Intebe Murekezi yagarutse kuri ba rwiyemzamirimo bakomwa mu nkokora na bamwe mu bayobozi kubera ruswa.

Yagize ati “Gutinda kwishyura ba Rwiyemezamirimo kugirango yibwirize,agire icyo akubwira kugirango Dosiye ye, Fagitire ye, Invoice, ikore progress( igire aho igera), ukabireba ugasanga hari ikibazo….Ninde watse menshi, ninde umurusha kwaka menshi? Ntabwo bishoboka, rwiyemezamirimo arahomba, arabanza agahanyanyaza agatanga ruswa wajya kubona ukabona inzu yarahagaze. Akenshi haba harimo ruswa, abayobozi baratse ruswa rwiyemezamirimo akayitanga yagera aho akananirwa”.

Kuri uyu wa Gatanu ubwo hamurikwaga amakuru aturuka mu ikoreshwa ry’udusanduku tw’ibitekerezo, Ingabire yavuze ko ahanini ikibazo kidaturuka kuri ba rwiyemezamirimo, ahubwo ngo abakabaye bamwishyura batinda bigatuma na we ibyo yagombaga gukora abyihorera.

Ati “Bakubwira ko batinda kubishyura kuko aba yarabemereye cyangwa yarabahaye make.Bagatinda kumwishyura, batinda akabura ayo akoresha agahitamo kubyihorera.”
Yakomeje avuga ko kutishyura rwiyemezamirimo ariyo ntandaro y’inzu cyangwa imihanda byubakwa, nyuma y’iminsi mike bigasenyuka.

Ati “Arakubwira ati njyewe amafaranga banyaka nyabahaye sinazagaruza.Gusa iyo ari kubaka byo biramworohera kuko aho yari gushyira imifuka 50 ya sima, ahashyira 10.Niyo ya mazu usanga agera aho akikubita hasi cyangwa akiyasa imitutu akiri mashya ndetse n’imihanda icika itaramara umwaka.”

Ingabire yanagarutse kuri ba rwiyemezamirimo bishyurwa, bakambura abaturage kandi mu masezerano baravuze ko bazishyurwa nabo bishyuye abaturage, aha asanga haba harimo ruswa n’abayobozi.

Ati “Byarabonetse mu turere tumwe na tumwe aho abaturage batishyurwa ka ndi akarere kari karababwiye ko bazamwishyura amaze kwishyura abaturage, nyuma ukazashiduka barayamuhaye yose.Ubwo rero wibaza uko byagenze.”

“Leta ikwiye gufaga Inshingano zayo abo bantu bakwiye kujya babibazwa.Hafashwe ingamba zikomeye iyo mikorere yahinduka. Baba bakwiye no kwegura kimwe n’abandi bose, iyo nayo ikaba imwe mu mpamvu zituma abantu begura.”

Zimwe mu nyubako zavuzweho kwiyasa zitamaze kabiri harimo Nyarugenge Plaza ikoreramo Minisiteri y’ibiza no gucyura impunzi ndetse n’iy’urubyiruko n’ikoranabuhanga, gusa nyuma abashinzwe imyubakire bavuze ko ari ubutaka bw’aho yubatse butameze neza.

Hari kandi imwe mu nyubako y’ishami rya Kaminuza y’u Rwanda ry’ubumenyi n’ikoranabuhanga yiyashe imitutu nyuma bigatangazwa ko nta kibazo gikomeye ifite ndetse n’imihanda itandukanye , amatara ku mihanda ashyirwaho akamara iminsi muke agapfa n’ibindi.

Yisangize Inshuti.

Ibitekerezo

Tanga Igitekerezo