Inda zitateganijwe ziravuza ubuhuha mu barundikazi bakambitse I Mahama

3

Impunzi z’abarundi zikambitse mu nkambi ya Mahama iri mu Karere ka Kirehe, Mu ntara y’Uburasirazuba, ziravuga ko hari ikibazo gikomeye cy’abana b’abakobwa bakiri bato bakomeje gutwara inda zitateganijwe.

Umwaka urenga urashize impunzi z’abarundi zitangiye gukambika mu Rwanda zihunze umutekano muke uri mu Burundi watewe no kutishimira manda ya gatatu ya Perezida w’iki gihugu Pierre Nkuruziza.

Minisiteri Ishinzwe gucyura impunzi no gukumira ibiza ivuga ko benshi mu bakambitse mu nkambi ya Mahama ari igitsina gore ndetse n’abana bato.

Impunzi ziri muri iyi nkambi ya Mahama zivuga ko ugutwara inda zitatagenijwe ku bana b’abakobwa gukomeje gufata indi ntera ndetse ngo biteye inkenke, aho bavuga ko abo bana bashukishwa ibintu bitandukanye birimo amafaranga ndetse n’inkwi.

Umwe muri bo yagize ati “ Hari abana bato bafite imyaka 12 usanga batwaye amada ahanini kubera ubuzima babayemo. Hari usanga yarizanye akavuga ati njyewe kubona inkwi birangoye kuko kubona inkwi hano biragoye, ugasanga bagiye muri ubwo bushurashuzi, hari n’abamera kujya kuryamana n’abacunga amashyamba.”

Ababyeyi bo muri iyi nkambi bavuga ko n’ubwo babayeho mu buzima bukomeye badakwiye kwiyandarika, ndetse n’uwaba yananiwe kwifata ngo yakoresha agakingirizo.

Umuyobozi w’Inkambi ya Mahama, Ngoga Aristarque yabwiye Ijwi rya Amerika ko kuba ku nkambi ya Mahama hari kuvuka abana benshi bitavuze ko babyarwa n’abana batabiteganyije gusa kuko ngo hari n’abari basanzwe babana ndetse n’abandi bashyingiranwa bageze mu nkambi.

Yagize ati “ Iyi ni nkambi nini irimo abantu barenga ibihumbi 50, nta kuntu abantu batavuka hatuye abagabo n’abagore, ahanini ni urubyiruko abakuru si benshi cyane nk’abakiri bato, barubaka, bagashyingiranwa kuvuka rero baravuka nk’ibisanzwe.”

Kugeza ubu nta mibare ifatika igaragaza umubare w’abana bavukira mu nkambi ya Mahama buri kwezi kuko bihindagurika gusa ngo umubare munini wabayeho ni abana 52.

Abadepite bo muri Komisiyo y’Ububanyi n’Amahanga, Ubutwererane n’Umutekano baherutse kugaragaza ko ikibazo cy’ubusambanyi mu nkambi zitandukanye gihangayikishije cyane ndetse ko hari n’abatwara inda ku bushake kugira ngo bahabwe ibyo kurya byinshi.

Arsene MUVUNYI

MAKURUKI.RW

Yisangize Inshuti.

Ibitekerezo 3

  1. Ni bahunguke boye kwirirwa baricwa ninzara kubera ababahenda bironderera inyungu za politique.twese turi muburundi ariko bakkaba bibaza k bazoza bafashe igihugu baracavyay kuko ico ntikibaho

  2. ICO NI IKIBAZO GIKOMEYE CANE ARIKO BAKOMEZE KWIHANGANA NTANVURA IDAHITA IMANA IRABAKUNDA UMUSI NIWASHIKA BAZOSUBIRA IWABO BAMEREGWE NEZA

  3. ICO NI IKIBAZO GIKOMEYE CANE ARIKO BAKOMEZE KWIHANGANA NTANVURA IDAHITA IMANA IRABAKUNDA UMUSI NIWASHIKA BAZOSUBIRA IWABO BAMEREGWE NEZA

Tanga Igitekerezo