Mu Rwanda, ngo abagore baza imbere mu kwibasirwa n’agahinda gakabije (depression)

Dr. Yvonne Kayiteshonga ushinzwe indwara zo mu mutwe mu kigo cy’igihugu gishinzwe ubuzima (RBC)

Inzego z’ubuzima mu Rwanda zitangaza ko abagore aribo bahura cyane n’indwara y’agahinda (depression) ndetse n’ihungabana, ibintu ngo biterwa no kuba bakunda guhura n’ihohoterwa rishingiye ku gitsina.

Kuri uyu wa Kane u Rwanda rwizihije umunsi mpuzamahanga wahariwe kuzirikana ku burwayi bwo mu mutwe usanzwe uba tariki ya 07 Mata. u Rwanda rwafashe uyu munsi ruba aribwo ruzirikana ubu burwayi kuko ubusanzwe Isi iwizihiza mu Rwanda turi mu bihe byo kwibuka abazize Jenoside yakorewe Abatutsi.

Ubushakashatsi bugaragaza ko abagore aribo bibasirwa cyane n’indwara zo mu mutwe harimo ihungabana n’agahinda gakomeye(depression).

Dr. Yvonne Kayiteshonga ushinzwe indwara zo mu mutwe mu kigo cy’igihugu gishinzwe ubuzima (RBC) yavuze ko impamvu ibitera ari uko abagore bakunda guhura n’ihohoterwa rishingiye ku gitsinda.

Ati "Sinavuga ko aribo bafite intege nke cyane ahubwo nibo bahuri n’ihohoterwa cyane Nko muri Jenoside yakorewe Abatutsi abagore barahohotewe. Mu ihohoterwa bakorewe hari irishingiye ku gitsina kandi ihohoterwa rishingiye ku gitsina niryo rya mbere ritera ihungabana cyangwa agahinda gakabije(depression) n’irindi hohoterwa n’iyo ureba no mu bindi bihugu nicyo cyaba ari igisobanura cy’uko abantu b’igitsina gore aribo bagira ihungabana cyane.”

Dr Yvonna kandi yavuze ko ibiyobyabwenge ari ikindi kintu gitera cyane ihungabana ndetse n’agahinda gakabije

Icyakora avuga ko urebye aho u Rwanda rwavuye n’aho rugeze mu kwita ku bafite ibibazo byo mu mutwe bishimishije.

Ati :”Uko imyaka ihita kuva muri 995 kugeza uyu munsi n’ubwo hakiri inzira ndende ariko biragenda byiyongera. Twatangiye nta muganga n’umwe dufite udufasha kuri izi ndwara zo mu mutwe kandi nyuma ya jenoside ibi bibazo by’indwara zo mu mutwe byariyongereye ariko uyu munsi dufite abagera mu magana.”

Jean Bosco Gasherebuka ukora mu ishami ry’umuryango w’Abibumbye ryita ku buzima (OMS) avuga ko u Rwanda n’ubwo indwara zo mu mutwe zititabwagaho ariko ngo zitangiye guhabwa agaciro .

Ati :”Hari ubwumvikane bwabaye bwasabaga za leta kuba nibura ingengo y’imari harimo 15 ku ijana yahariwe ubuzima. Kugeza ubu u Rwanda ruri kuri 17 ku ijana , ariko wareba ugasanga indwara zo mu mutwe biracyari hasi bivuze ko zititabwagaho ariko u Rwanda rwashyizemo ingufu kuko harimo ibiri gukorwa.”

Kugeza ubu abantu basaga miliyoni 350 ku Isi barwaye indwara zo mu mutwe. Mu Rwanda nta bushakashatsi buheruka gukorwa ariko Minisiteri y’ubuzima ivuga Jenoside yakorewe abatutsi yasize abantu benshi barwaye ihahamuka n’ihungabana ariko ubu ngo biri kugenda bigabanuka.

Yisangize Inshuti.

Ibitekerezo

Tanga Igitekerezo