Ibyo guhana abahahira Abazunguzayi bishobora guteshwa agaciro

2

Umuryago nyarwanda urengera inyungu z’abaguzi, ADECOR, uravuga ko watangiye kwiga ku itegeko riherutse gusohoka rizajya rihana abaguzi bazajya bafatwa bagura ibicuruzwa bicururirizwa mu mihanda ndetse ko bashobora no gusaba ko rikurwaho mu gihe basanga ribangamiye abaguzi.

Mu cyumweru gishize ni bwo mu igazeti ya Leta hasohotsemo itegeko rivuga ko umuntu wese uzafatwa agura igicuruzwa n’umuntu ucururiza mu muhanda bose bazajya bahanwa bagacibwa amande angana n’ibuhumbi 10 by’amanyarwanda kuri buri umwe, akaba ari mu rwego rwo guca ubucuruzi bw’akajagari bukomeje kwiyongera mu mujyi wa Kigali.

Bamwe mu baguzi bakunze kugura ibicuruzwa binyuranye n’abazunguzayi bagaraje ko batishimiye iri tegeko kuko bumva ko umuntu adakwiye kuzira ko aguze ahubwo ko Leta ikwiye gukurikirana wa wundi uza gucururiza ahatemewe.

Mu kiganiro Makuruki.rw yagiranye n’uhagarariye umuryango nyarwanda urengera inyungu z’abaguzi (ADECOR) Uzaburaho Theodoric yadutangarije ko kuba Umujyi wa Kigali wari usanzwe wirukana abacaruza mu buryo butemewe none ubu bakaba bageze no kubaguzi ngo harimo ikibazo abantu bakwiye kwibaza.

Yagize ati”Bari bamaze igihe biruka ku bantu bacuruza none bashaka no kwirukanka ku muguzi ngo waguze, ni wo muti se? ni ikibazo.”

Uyu muyobozi kandi yadutangarije ko na bo batasobanukiwe neza iri itegeko ari nayo mpamvu ngo batangiye kuryigaho babifashijwemo n’umunyamategeko wabo ku buryo nyuma y’icyumweru ari bwo ngo bazagira icyo babivugaho bitewe n’uko bazaba barisesenguye.

Yagize ati" Twakoze inama dusanga barashyizemo ibintu by’amategeko itegeko risohoka mu igazeti ya Leta, twasanze mu by’ukuri dukeneye umunyamategeko ngo atwumvire ahantu hari ukubogama, twabihaye umunyamategeko wacu arabimarana icyumweru adukorere ubusesenguzi, arebe amareferanse (reference) bakoze bavuga ku itegeko rivuga ku ipiganwa n’irirengera umuguzi ni ngombwa ko areba ukuri kurimo.”

Uzaburaho Theodoric yavuze ko kandi umunsi bazaba bamaze kwiga iri tegeko bagasanga ribangamiye uburenganzira bw’umuguzi bazasaba Umujyi wa Kigali ko warikuraho.

Yagize ati “Twatangira yukajya kureba ababikoze tukabasa ko niyo byaba na ngombwa iryo tegeko barivanaho niba ritujuje amategeko .”

Ikibazo cyo guca abacururiza mu muhanda mu mujyi wa Kigali cyongeye kwitabwaho cyane muri iyi minsi ubwo umwe mu bazunguzayi yakubitwaga n’abashinzwe isuku muri gare ya Nyabugogo ndetse agapfa, nyuma yaho umujyi wa Kigali wahise wubaka amasoko baba bagiye gukoreramo batishyuzwa mu gihe cy’umwaka, ariko n’ubundi ntibyakemuye ikibazo burundu kuko hari abavuga ko gushyirwa muri aya masoko bidakorwa mu mucyo, bikaba ngombwa ko bigumira mu mihanda.

Arsene MUVUNYI

MAKURUKI.RW

Yisangize Inshuti.

Ibitekerezo 2

  1. IRYO TEGEKO BARISHYIZEHO BAHUBUTSE
    KUKO NTAGO RIBANGAMIRA ABAGUZI GUSA
    RIBANGAMIYE NA LETA. IBAZE ABOBAGUZI
    BAGIYE KWICWA NINZARA KUKO
    NTAMAFRANGA BAFITE AHAGIJE WIBAZE ABO
    BAZUNGUZAYI BOSE NTAGO BISHIMIYE IBYO
    BYEMEZO KUYOBORA ABANTU BATISHIMYE
    AMAHEREZO BIGIRA INGARUKA
    ZIDASHIMISHIJE MUBAREKE BIRWARIZE KWISI
    HOSE BARAHABA

  2. IRYO TEGEKO BARISHYIZEHO BAHUBUTSE KUKO NTAGO RIBANGAMIRA ABAGUZI GUSA RIBANGAMIYE NA LETA. IBAZE ABOBAGUZI BAGIYE KWICWA NINZARA KUKO NTAMAFRANGA BAFITE AHAGIJE WIBAZE ABO BAZUNGUZAYI BOSE NTAGO BISHIMIYE IBYO BYEMEZO KUYOBORA ABANTU BATISHIMYE AMAHEREZO BIGIRA INGARUKA ZIDASHIMISHIJE MUBAREKE BIRWARIZE KWISI HOSE BARAHABA

Tanga Igitekerezo