Huye: Babiri bitabye Imana, abasaga 20 bararemba bazira kurya inka yipfushije

1

Abantu babiri bo mu karere ka Huye bamaze gupfa nyuma yo kurya inyama z’inka yipfushije abandi 22 bajyanwa mu bitaro barembye bikomeye.

Ibi byabereye mu Murenge wa Rwaniro mu kagari ka Mwendo mu mudugudu wa Cyarera mu karere ka Huye mu ntara y’Amajyepfo.

Iyi nka yariwe kuwa kabiri w’icyumweru gishize ariko kuwa kane nibwo bamwe batangiye kugaragaza ibimenyetso by’ingaruka zo kurya inyama z’iyo nka yipfushije. Ikibazo cyafashe indi ntera kuwa gatanu ubwo umwana wariye kuri izo nyama yari arembye bamujyana mu banyabuzima ariko nyuma y’igihe gito ahita apfa.

Kuwa gatandatu nibwo na mugenzi we bavukana yapfuye ndetse benshi mu bariye iyo nka bari bamerewe nabi n’uburwayi bwo kuribwa mu nda no kuruka bikomeye.

Uretse abo babiri bapfuye, abandi bantu 22 bagejejwe ku bitaro bya Kabutare kuwa gatandatu barembye cyane nyuma yo kurya iyo nka ndetse bamwe boherejwe mu bitaro bikuru bya Kaminuza bya Butare (CHUB). Kuri ubu bamwe barasezerewe abandi nabo barimo koroherwa.

Kuri ubu abakiri mu bitaro nyuma yo kwitabwaho n’abaganga baratanga ubuhamya bukomeye bw’uburyo barwaye gucibwamo ku buryo bukomeye nyuma yo kurya iyo nka ndetse n’ubu ngo baracyaribwa mu nda.

MAKURUKI yashatse kumenya icyo ubuyobozi bw’akarere ka Huye buvuga kuri iki kibazo n’icyo bwakoze nyuma y’iki kibazo tuvugana na Meya w’akarere ka Huye Kayiranga Muzuka Eugene atubwira ko nyir’iyo nka yahise atoroka akaba arimo gushakishwa na Polisi.

Meya Muzuka yagize ati: "Yego byarabaye, hari abantu bariye inka idapimye, ibagiraho ingaruka hakaba hari abana babiri bo mu muryango umwe bitabye Imana ariko abandi bo ni bazima kuko bari 22"

Yavuze ko icyo bakoze ari ukongera gukangurira abaturage gupimisha amatungo mbere yo kuyarya.

Ati: "Twagezeyo dukoresha inama dukangurira abaturage ko badakwiye kujya barya itungo ryipfushije ridapimwe kuko iyo itungo ryipfushije biba bifite indwara yabiteye tubabwira ko itungo ryose rigomba kubanza gupimwa na muganga w’amatugo agatanga uburenganzira niba iryo tungo ryaribwa cyangwa ryahambwa"

Yavuze ko ikosa rikwiye kubarwa kuri nyir’iyo nka kuko yari asanzwe azi neza ko itungo ryose rigomba gipimwa mbere yo kurirya.

Ati: "Ikosa ryo ubwo twaribara kuri nyir’iyo nka kuko ntiyari ayobewe ko iryo tungo rigomba kubanza gupimwa kandi Polisi yatangiye no kumukurikirana, gusa ntabwo Polisi iramufata yahise atoroka twaramubuze yagize ubwoba ahita agenda acitse"

Munganyinka Selapfine (umugore w’umugabo watorotse) we arashyira amakosa kuri Rubabaza baturanye

Asobanura uburyo iyo nka yariwe, Munganyinka Selapfine, nyir’urugo rwari rutunze iyo nka yagize ati: "Twavukishije inyana ku itariki 13 Mutarama, nyuma inyana iza kurwara, turayivuza igeze aho iza gupfa, imaze gupfa rero ubwo umugabo wanjye yazengurutse mu mudugudu avuga ati nagize ibyago akanyana kanjye kapfuye, yahuye n’umugabo rero witwa Rubabaza ahita amubwira ati ako kanyana turakarya, umugabo wanjye aramubwira ati akanyana kanjye kapfuye ari gatoya ntabwo gakwiye kuribwa ubu nari ngiye kureba Gatera ngo aze agashyire imbwa. Rubabaza ati reka da! Ati n’injanga (indagara) barazirya nta nyama itaribwa ntabwo tugomba kuyijugunya!"

Yakomeje agira ati: "Rubabaza yaraje akanyana agasanga mu kiraro cyako aragasatura asanga ni amata yakishe ari no mu ruhu inyuma no mu nyama imbere hose hari harimwo amata yagiye yibumba akaba nk’amavuta, ubwo Rubabaza akanyana yaragasatuye arangije agashyira mu gikoni, ...Nka saa saba z’ijoro yaraje inyana arayijyana bayibagira ku muhanda barayirya"

Uyu mugore yatangarije RBA ko bo (mu rugo rwabo) batarya inyama bityo ngo nta wo mu muryango wabo wagizweho ingaruka n’izo nyama.

Ati: Twe ntabwo turya inyama turi Abadiventiste, ariko na mbere ntabwo twaryaga ibyipfushije

Yisangize Inshuti.

Ibitekerezo 1

  1. akawamugani (ati isazi nzima iruta intare yapfuye) none uyumugabo nawe inka yashatse kuyigereranya ni ndagara koko ndumiwe abaryi binya ntakintu kijya kibatega koko inyama zose bararya none namwe murabigana

Tanga Igitekerezo