Huye: Abaturage barashinja Akarere kubateza umwanda n’indwara ziterwa na wo

1

Kubera umunuko uturuka muri iki kimoteri, uyu mukecuru yavugishije umunyamakuru yipfutse ku munwa

Bamwe mu baturage batuye mu kagali ka Mpare, umurenge wa Ngoma, akarere ka Huye baravuga ko babangamiwe n’umunuko uturuka mu myanda imenwa hafi y’aho batuye, bagashinja akarere kuba ariko kafashe iyambere mu kuhamena iyo myanda ariko ngo kuri ubu kakaba kadashaka kubakemurira ikibazo cy’umunuko kahateje.

Aba baturage bavuga ko bijya gutangira ngo akarere ka Huye kafashe umwanzuro wo kujya kamena imyanda muri aka gace aba baturage batuyemo, ibintu byatumye abantu batandukanye baboneraho nabo bakomeza kujya bahazana imyanda iturutse hirya no hino mu mujyi wa Huye.

Bavuga ko iyo myanda baza kumena aho ngo iba ivanzemo ibintu bitandukanye, birimo inyama ziba zaraboze, amapusi yapfuye n’ibindi nkuko aba baturage babivuga.

Aba baturage bavuga ko uretse umunuko uturuka muri iyi myanda, ngo banabangamiwe na none n’amasazi ahaturuka kuko adatuma bagoheka, kuko ngo birirwa barwana nayo kugeza nubwo babura uko bafungura kubera ko amasazi aba yabatanze mu byo kurya ari na byo bavuga ko bibatera indwara zituruka ku isuku nke.

Uretse ayo masazi ababangamiye bikomeye, kandi ngo kuri ubu ngo banatangiye kurwara indwara ziterwa n’umwanda, ibintu bavuga ko bo bamaze kwakira gusa ngo bafite impungenge z’abana babo.

Umwe mu bo twaganiriye yagize ati:"Umwana aragenda akazana izo nyama zavuye muri firigo zaboze, iyo migati baba bajugunye yapfuye yarangiza akarya. Ubwo urumva koko bataraduhemukiye? Nibatubabarire badukize iki kimoteri.”

Undi muturage utuye hafi y’icyo kimoteri, avuga ko ubu yabuze aho ahungira kubera iki kimoteri gituma batagoheka.

Yagize ati: "Nkubu umuntu ajya kwirira isazi zikamutanga mu biryo. Ubu kugira ngo umuntu abashe kurya ni uko acungana n’aya masazi. turashize pe!”

Aba baturage bakomeza bavuga ko biba bibakomereye cyane mu gihe cy’imvura, aho usanga ngo umwanda uturuka muri iki kimoteri uba wuzuye mu ngo zabo kubera ko amazi awutembana ukaruhukira aho batuye.

Ku rundi ruhande, ngo uretse kuba aba baturage bahura n’indwara ku buryo bworoshye, ngo izi ngaruka zanatangiye kugera ku matungo yabo, kuko kugeza ubu ngo hari ayatangiye kurwara bakaba bakeka ko bifitanye isano n’umwanda uturuka muri iki kimoteri.

Aba baturage ngo ni kenshi basabye ubutabazi mu nzego zitandukanye kugera no k’ubuyobozi bw’akarere ka Huye ariko na nubu ngo iki kibazo cyakomeje kuba agatereranzamba.

Nubwo aba baturage batunga agatoki ubuyobozi bw’akarere kabo kubatererana, umuyobozi wako Kayiranga Muzuka Eugene we siko abibona n’ubwo yemera ko iki kimoteri giteje ikibazo mu baturage. Avuga ko barimo gukora ibishoboka byose ngo barebe ahandi iki kimoteri cyakwimurirwa, ariko ibyo kwimura abaturage nkuko babyifuza byo ngo ntibishoboka.

Yagize ati:” Igisubizo kirambye cya hariya ntabwo ari uguhita tubimura, hariya ni ahantu turi kwifashisha muri iyi minsi kuburyo vuba aha hazatunganywa abaturage bagakomeza ubuzima bwabo nk’ibisanzwe.”

Si aba baturage bo mu kagali ka Mpare batakambira ubuyobozi kubera umunuko n’umwanda bituruka muri iki kimoteri, kuko abatuye n’abakorera hafi y’isoko rya Huye na bo binubira umwanda uturuka muri uwo mujyi, bakavuga ko batumva impamvu ubuyobozi butabikemura kandi hari n’ababishinzwe kandi banabihemberwa.


Iki kimoteri ngo kiba giteraniyemo imyanda y’ubwoko bwose bituma umunuko ukomeza kuba mwinshi

Yisangize Inshuti.

Ibitekerezo 1

Tanga Igitekerezo