Gicumbi: Mu miryango irenga 20 y’abasigajwe inyuma n’amateka nta wakandagiye mu ishuri

Abasigajwe inyuma n’amateka batuye mu murenge wa Miyove, Akarere ka Gicumbi by’umwihariko mu mudugudu bubakiwe bavuga ko hafi ya bose ngo nta n’umwe wabashije kwiga haba amashuri abanza ndetse n’ayisumbuye.

Aba baturage bagize imiryango 27 yatujwe muri uyu mudugudu, bavuga ko impamvu iri ku isonga yo kutiga kwabo, ngo ahanini biterwa n’inzara iba mu miryango yabo bitewe n’uko nta masambu bagira ngo babashe guhinga bityo rero ngo bigatuma aho kugana ishuri bahitamo kwirirwa bashakisha ibibatunga.

Umwe muri bo waganiriye na Makuruki.rw yagize ati:” None se urumva umwana yajya kwiga yaburaye? Ni ukubera imibereho mibi rwose nta wakwiga ashonje.”

Uretse ikibazo cy’inzara bashyira ku isonga ry’ibituma aba basigajwe inyuma n’amateka bo mu murenge wa Miyove batagana ishuri, ngo baracyasa n’ababoshywe n’amateka yaranze u Rwanda aho ngo Leta zabayeho mbere ya Jenoside yakorewe abatutsi zabahezaga inyuma mu myigire kubera icyo bitaga imiterere yabo.

Umugabo witwa Masurubi uvuga ko yaretse kwiga kubera abarimu b’icyo gihe, yabwiye Makuruki.rw ko yanenwaga cyane bityo afata umwanzuro wo kureka ishuri.

Yagize ati:” Ngo babonaga mfite umusatsi mwinshi, ngo nimbanze njye kwiyogoshesha bakanteza n’abandi banyeshuri bakirirwa banyirukaho, ndareba nti ibi sinabivamo reka mbaharire amashuri yabo.”

Icyakora we na bagenzi be ubu bavuga ko ibi byahindutse kuri Leta y’ubumwe bw’abanyarwanda, ngo n’ubwo na n’ubu umubare w’abagana amashuri kuri bo ukiri hasi, ngo ahanini ubu biterwa n’ikibazo cy’ubukene n’inzara bifitiye bakemeza ko itotezwa ryarangiye.

Aba basigajwe inyuma n’amateka batuye muri aka gace bemeza ko abana babo baramutse bafashijwe kubona ibyo kurya no kwambara ngo bakwiga neza nk’abandi banyarwanda bose.

Bakomeza bavuga ko n’ubwo abakuze muri bo batashoboye kwiga, ngo nta cyabashimisha nko kubona abana babo biga bakaminuza kuko ngo byajya bibaha ishema nk’abandi bose bafite abana babashije kwiga.

Ubuyobozi bw’akarere ka Gicumbi na bwo bwemera ko iki kibazo gihari koko ariko ngo hari gahunda zibateganyirijwe ziri kunozwa kugira ngo babafashe kuko na bo ngo ari abanyarwnda nk’abandi.

Umuyobozi w’akarere ka Gicumbi Mudaheranwa Juvenal aganira na Makuruki.rw, yagize ati: “Hari gahunda yo kubafasha abana babo bakajya bagaburirwa saa sita bari ku ishuri kandi twizeye neza ko hari icyo bizahindura.”

Gusa ubuyobozi buvuga ko bugenda bubagenera imfashanyo zinyuranye ariko muri bo hakaba ngo hari abahindukira izo mfashanyo bakazigurisha.

Ubushakashatsi bwakozwe hagati y’umwaka wa 2013 na 2014 bwagaragaje ko mu basigajwe inyuma n’amateka, abize amashuri yisumbuye ari 1%, bangana n’abarangije kaminuza, mu gihe abarangije amashuri abanza ari 31%.

Ahanini ngo kuba umubare w’abasigajwe inyuma n’amateka bagana ishuri ukiri muto, biterwa n’ubukene kuburyo ngo hari umubare w’abana bata ishuri kubera ko batabona ibyo kurya.


Ni uku biberaho


Ubuzima bwabo ngo ntibworoshye


uyu we ngo ntazi nuko ishuri risa

Yisangize Inshuti.

Ibitekerezo

Tanga Igitekerezo