Gicumbi: Abasenyewe n’amazi yaturutse mu cyahoze ari IPB Byumba baratabaza

1

Amazi yaturukaga muri iyi kaminuza ngo yasenye uru rugo rwubakwaga rurahirima

Bamwe mu baturage baturanye na kaminuza ya UTAB yahoze ari IPB Byumba, baravuga ko amazu yabo yasenyutse bitewe n’amazi y’imvura yasohokaga muri iyi kaminuza mu gihe imvura yagwaga ari nyinshi mu minsi ishize, ariko ngo bakaba batazi aho bazabariza ikibazo cyabo.

Bamwe muri baturage batuye inyuma y’inyubako y’igorofa rya kaminuza ya UTAB iri kubakwa, baravuga ko baheze mu guhirahiro bibaza uwo bazabaza inyubako zabo zasenyutse bitewe n’uko bagejeje mu buyobozi ikibazo cyabo ariko ngo kikaba kidakemurwa.

Mutimawera Antoinette umwe mu baturage bagizweho ingaruka n’aya mazi, yavuze ko inzu ye yari igeze mu gihe cyo gusakarwa ndetse n’urugo rw’amatafari yari yubatse ngo narwo rwasenywe n’iyi mivu y’amazi yasohokaga muri iyi kaminuza ya UTAB.

Yagize ati:”Iyi nzu uko ubona uru ruhande rureshya, ni nako urwahirimye rwareshayaga, twari mu buryo bwo kuyisakara ariko birangira n’ubundi amazi akomeje kujya aza agapfumuramo, urabona ko byanaduteye n’ubute bwo gusubizaho urugo.Turifuza ko baduha ibikorwa byari bihari ariko ikizima bagafata amazi yabo”.

Undi muturage witwa Kankundiye Charlotte yatubwiye ko ubwo aya mazi y’imvura yasohokaga muri iyi kaminuza, ngo yari amuhitanye Imana igakinga ukuboko.
Yagize ati:” Aya mazi yabanje kuzura aha, abantu bagira ubwoba, amazi yaraje yuzura inzu , inzu irajejeta mpita nsohokamo n’abuzukuru banjye, mpita mbwira abayobozi b’umudugudu na bo barambwira ngo baratabaje.”

Iki kibazo kaminuza ya UTAB yirinze kugira icyo ikivugaho kuko twashatse kuvugana n’umuyobozi w’iyi kaminuza Prof Dr Nyombayire Faustin, gusa mu nshuro zigera muri eshatu twagerageje kuvugana na we yanze kugira icyo adutangariza.

Ubuyobozi bw’akarere ka Gicumbi buvuga ko iki kibazo kitaturutse kuri kaminuza ya UTAB, ahubwo ngo cyaturutse ku bikorwa bya kompanyi y’ubwubatsi ya Horizon, yashyize kaburimbo mu muhanda winjira muri iyi kaminuza ntiyashyiraho inzira y’amazi byatumye amazi yishakira inzira atembera mu ngo z’aba baturage.

Umuyobozi w’akarere ka Gicumbi, Mudaheranwa Juvenal, yagize ati:”Icyo kibazo twacyumvise ubwo twahamagaraga abaturage ku munsi w’imurikabikorwa, aho tucyumviye twashyizeho abatekinisiye bagikurikirana, ariko amakuru mfite ni uko amazi yasenyeye abaturage adaturuka muri UTAB, ahubwo ava mu muhanda. umuhanda ubu ngubu uri gukorwa na Horizon ndetse wageze no kuri phase yo kurangira, ubu rero kubera turi gutegura umuhango wo kuwakira by’agateganyo , icyo kiri muri bimwe mu bibazo tuzagaragariza abawukoze bakazabikemurira hamwe n’ibindi bibazo tuzabona. ”

Uyu muyobozi kandi yavuze ko mu gihe cy’ imurika ry’uyu muhanda ngo bazasaba iyi kompanyi ya Horizon gusana ibintu byose byangijwe n’ibikorwa byabo.


Aha (hari akaziga) ni ho hamanukaga umuvu w’amazi menshi yasesekaye mu mago y’abaturage arabasenyera

NDARISABAMUNGU Paul Clement

MAKURUKI.RW

Yisangize Inshuti.

Ibitekerezo 1

  1. ahubwo ni Imana yakinze akaboko
    kuba nta muturage wapfuye,
    naho uwo muyobozi wa kaminuza
    we nawe ntacyo yari kubatangariza
    kuko nawe yabonye biba
    Murakoze.

Tanga Igitekerezo