Gatsibo: Bamwe baretse ishuri kubera ibirometero 10 bakora bagiye ku ishuri

Abanyeshuri batuye mu Kagali ka Munini mu karere ka Gatsibo bavuga ko bakora urugendo rw’amasaha abiri n’amaguru bajya ku ishuri, ibintu bavuga ko bibangamira imyigire yabo RDB yo ikavuga ko iki kibazo igiye kugikemura n’ubwo itavuga igihe kizarangirira.

Aba banyeshuri batuye ahitwa mu gikobwa mu kagali ka Munini, mu murenge wa Rwimbogo mu karere ka Gatsibo. Bavuga ko bakora urugendo rurerure ruvunanye kandi rw’ishyamba riteye ubwoba kugirango bagera aho bigira.

Abenshi muri aba banyeshuri biga mu mashuri y’uburezi bw’imyaka 9 y’ibanze ndetse no mu mashuri abanza guhera mu mwaka wa kane kugeza mu kwaka wa gatandatu aherereye ku Munini.

Makuruki.rw iganira n’aba bana bagaragaje imvune ziri mu rugendo bakora n’ingaruka bibagiraho zirimo umunaniro ndetse no kureka ishuri kuri bamwe.

Niyonsenga Samuel w’imyaka 12 yagize ati :” mva hano saa kumi n’imwe ngashyikayo nka saa moya.Ni urugendo rurerure nkora mu buryo bungora cyane kuko rurananiza cyane.. isaha ya mbere bisa n’aho ntayiga kuko mba ndushye mbira ibyuya cyane. Tuzamuka uriya musozi tukaminuka hirya tugafata undi tujyenda muri ririya shyamba kugeza tugezeyo.”

Avuga ko hari benshi batangiranye ishuri ariko bananijwe n’urugendo bahitamo guhagarika kwiga bigira kuragira inka no gukora ibindi. Asaba ko byaba byiza aha mu gikobwa hashyizwe amashuri yisumbuye nabo bakiga hafi.

Munyaneza Martin w’imyaka 13 yiga mu mwaka wa mbere w’amashuri yisumbuye nawe yagize ati:” Mva mu rugo nka saa kumi n’imwe n’igice ngerayo nka saa moya ngerayo naniwe cyane ariko ngomba kwihangana gusa nyine ntiwahuza n’umwana uturanye n’ishuri. Abandi bose urajyana uko tuva hano ni njyewe utuye kure ngenda mbacaho bose twamara kwegerana tukagenda.”

Aba bana bavuga ko bagenda ishyamba gusa kugeza bageze ku ishuri ikindi kintu nacyo kibatera ubwoba ngo kuko bazinduka hakiri nijoro . Avuga ko uwo bagenzi be basize ataba akigiyeyo.

Kariza Shalon w’imyaka 13 ni umwe mu bakobwa bakora uru rugendo nawe yabwiye Makuruki ati :” Njyenda amasaha atatu mva hano nka saa kumi n’imwe nkagerayo saa moya. Njyerayo naniwe gusa isaha ya mbere ndabanza nkaruhuka kugirango mbone uko niga neza.. duca mu ishyamba hariya kuri uriya musozi tuba dufite ubwoba ko badufata ku ngufu kuko ngo kera hari abo babikoreraga kandi habamo n’ibikoko.”

Gusa abatuye muri aka gace bita mu Gikobwa ubu barashima ko ikigo cy’igihugu cy’iterambere RDB cyabubakiye amashuri y’incuke ndetse nabanza kugeza mu mwaka wa gatatu.


Abatuye muri aka gace bubakiwe ishuri ry’incuke n’abanza kugeza mu mwaka wa Gatatu

Kariza Belise ushinzwe ubukerarugendo muri RDB avuga ko impamvu yo kubaka aya mashuri kwari ukugirango bagabanye imvune z’abana batuye hano mu Gikobwa.

Kariza avuga ko bamaze kuganira n’akarere ko bagomba kwita kuri iri shuri n’abandi banyeshuri biga mu myaka yo hejuru bakagira amahirwe yo kuruhuka imvune z’urugendo.

Ati:”Nagirango mbamenyeshe ko twamaze kumvikana n’abayobozi bw’Akarere ko ku nkunga tugenera iri shuri ry’Akagera Primary School. Tugiye kuryitaho kugeza ribashije kwakira abana kugeza ku myaka 12 y’ibanze twizere ko bizafasha abana kutazongera gukora urugendo ruvunanye rw’ibirometero 10 bajya kwiga ahandi.”


Kaliza Belise ushinzwe ubukerarugendo muri RDB

Kaliza avuga ko bemeranyijwe ko iri shuri rizaba ikitegerero rizaba rifite ibyangombwa byose.

Avuga ko aribwo bagitangira kuganira n’Akarere uko bagena ingengo y’imari ari nayo mpamvu bataramenya impamvi iri shuri rizarangirira gusa ngo bateganya ko bazajya baryubaka mu bice bice.

Yisangize Inshuti.

Ibitekerezo

Tanga Igitekerezo