Gasabo: Imyaka ibaye ine begerejwe ibigega n’impombo bitagira amazi

Abaturage batuye mu tugari dutandukanye tw’umurenge wa Nduba, mu karere ka Gasabo, mu mujyi wa Kigali, bamaze imyaka ine bategereje kuvoma amazi aturutse mu bigega n’impombo begerejwe muri 2012 ariko ngo bakaba barategereje amaso ahera mu kirere.

Muri 2012 ni bwo mu tugari dutandukanye tugize Umurenge wa Nduba nka Shango, Gasanze, Muremure na Butare hanyujijwe imiyoboro y’amazi ndetse hashyirwamo amatiyo nyuma n’ibigega birubakwa yewe n’amavomo yegerezwa abaturage ariko ntibabona amazi.

Abatuye muri utu tugari bavuga ko bari bazi ko ikibazo cyo gukoresha no kunywa amazi mabi nayo bavoma kure kigiye gukemuka, nyamara nkuko bamwe mu bo twaganiriye babivuga, ngo bamaze imyaka ine bategereje aya amazi kuri ibyo bikorwa remezo bazaniwe ariko ngo bayobewe amaherezo.

Aba baturage bavuga ko aya mazi akimara kuhagera bayavomye igihe gito cyane agatangira kugaragaza ibibazo birimo guturika kw’amatiyo ayobora amazi ndetse rimwe na rimwe ngo bakanabwirwa ko moteri ikura amazi ku isooko ngo yagize ikibazo gituma batavoma.

Iki kibazo cya moteri ngo cyagiye kivugwa kenshi ariko abaturage babwirwa ko amashanyarazi nagera muri uyu murenge iki kibazo ngo kizakemuka burundu, gusa igikomeje kubatera urujijo ngo ni uko amashanyarazi yahageze ariko ikibazo ntigikemuke nkuko bari barabibwiwe.

Umwe mu baganiriye na Makuruki.rw utuye mu kagari ka Butare yagize ati: “Aya mazi tuyategereje imyaka ine yose, twabanje kuvomaho agahe gato, nyuma amatiyo akajya aturika, ubundi bakatubwira ngo moteri ifite ikibazo gusa ikibazo cy’amazi kiraduhangayikishije muri Nduba.”

Undi na we utuye mu kagari ka Shango yagize ati: ”Baraje bacukura imiyoboro, bashyiramo amatiyo tubona bubatse ibigega n’amavomo tugira ngo ikibazo cy’amazi kigiye gukemuka, ariko kugeza ubu twavomye iminsi mike none tumaze imyaka ine yose tutabona amazi.”

Umuyobozi w’umurenge wa Nduba Barigye Peter yadutangarije ko ikibazo cy’ingutu cyahagaritse ikoreshwa ry’ibi bikorwa remezo ngo ari moteri zakoreshejwe zidafite ubushobozi bwo gutanga amazi, maze atubwira ko akarere karimo kubikemura vuba abaturage bakazabona amazi mu gihe gito.

Barigye yagize ati:“Nibyo ayo mazi yarahageze koko n’ibigega barabyubaka ndetse n’abaturage batangira kuvoma ariko haza kubaho ikibazo cyuko moteri yari ifite ubushobozi buke bwo kuzamura amazi kandi ikanakoresha essence nyinshi, ariko noneho ubu ngubu aho bigeze akarere katanze isoko ndumva muri iki cyumweru rwiyemezamirimo yaragezeyo ubu barimo gushaka uburyo amazi yazamuka aho mvugira aha ubu ngubu barimo kubikora moteri ya essence ntabwo izongera gukoreshwa hazakoreshwa uburyo bw’amashanyarazi.”

Gusa uyu muyobozi avuga ko hari impungenge zuko amatiyo ashobora kuba yarangiritse bitewe n’imyaka ishize atabye mu butaka kandi adakoreshwa, gusa ngo nihagira aho biboneka ko yangiritse ngo bazayasana nyuma bitewe n’uko ngo badashobora kubimenya amazi atarazamuka.

Ubuyobozi bw’akarere ka Gasabo butangaza ko iki kibazo kirimo gukemurwa kuko nga hoherejweyo imashini (pompe) ifite ubushobozi bwo kuzazamura amazi ndetse yongeraho ko mu gihe gito cyane aba baturage bazaba bavoma.

Stephen Rwamurangwa, umuyobozi w’akarere ka Gasabo yagize ati: “Twabaguriye pompe (imashini ikura amazi ku isooko iyohereza mu matiyo) ifite ubushobozi buhagije, ubundi baguraga utw’amafuti tudafite ubushobozi tugateza ikibazo, iyo pompe yatwaye miliyoni 15 kuko abaturage bagomba kubona amazi, ahubwo ubundi bagombye kuba baratangiye kuvoma kuko hari haratinze isoko ry’iyo pompe kandi bambwiye ko yaguzwe ahubwo reka nkurikirane ndebe kuko nta kindi kibura.”

Meya Rwamurangwa yijeje abaturage ko aya mazi agomba kuboneka vuba nubwo na we yagaragaje impungenge zuko amatiyo ashobora kuba yarangiritse ariko akavuga ko no kuyasana bitatwara igihe kinini.

Yanavuze ko hari n’undi mushinga wamaze kwigwa w’amazi azatangwa na WASAC ukazageza amazi mu tugari tutazagerwaho n’aya mazi arimo gukorwa.

Jean Paul NIYITANGA

MAKURUKI.RW

Yisangize Inshuti.

Ibitekerezo

Tanga Igitekerezo