Dukomeje gutema ibiti kuri iki kigero byashiraho-Minisitiri w’Intebe Murekezi

1

Minisitiri w’Intebe Anastase Murekezi atera igiti mu Karere ka Gicumbi

Minisitiri w’Intebe Anastase Murekezi yasabye abanyarwanda kwitabira gutekesha gaz, birinda gukomeza gutekesha inkwi kuko ngo bikomeje ku kigero biriho amashyamba ashobora gishiraho.

Ubushakashatsi bwashyizwe ahagaragara ku mibereho y’abaturage n’imiturire (EICV4) bwagaragaje ko mu Rwanda 83.3% by’ingo zitekesha amakara n’inkwi, u Rwanda rukaba rwarihaye intego y’uko uyu umubare uzaba wagabanutse kugera ru rugero rwa 50% mu mwaka wa 2020.

Kuri ubu ubuso buteyeho amashyamba mu Rwanda bungana na hegitari 695,795 zihwanye na 29.3% by’ubuso bwose bw’igihugu hakaba hateganijwe ko ubu buso buzaba bugeze kuri 30% mu mwaka wa 2018.

Ubwo yatangizaga igihembwe cyo gutera ibiti mu Kagali ka Rwesero, Murenge wa Bukure mu Karere ka Gicumbi mu muganda ngarukakwezi, Minisitiri w’Intebe Murekezi yavuze ko gutekesha inkwi bituma ibiti bikomeza gutemwa, bigakoma mu nkokora umuhigo igihugu kiyemeje.

Yavuze ko ibiti ari isoko y’ubuzima kuko bitanga umwuka mwiza ati“Ibiti bikomeza ubutaka bikarwanya isuri, bivamo ifumbire ndetse kandi bivamo imiti itandukanye. Amashyamba ni isoko y’umwuka mwiza duhumeka.Umwuka mwiza utarobanura aho utuye cyangwa ngo urebe ngo uyu ni umukire cyangwa umukene, ni umwuka mwiza dukenera twese.”

Minisitiri w’Intebe Murekezi yavuze ko kugirango ibiti bibungabungwe neza, hafashwe ingamba zirimo gushishikariza abaturae gutekesha gaz aho gukomeza gukoresha inkwi zangiza ibidukikije.

Yagize ati “Gutera ibiti ni byiza ariko ntibihagije kuko umuvuduko wo kubitera ugiye munsi y’uwo kubitema byaba bibi cyane.Twese dukwiye kumenyera umuco mushya wo gutekesha Gaz kuko dukomeje gutema ibiti kuri iki gihero byashiraho.Mushishikarire gukoresha biogaz cyane cyane abatuye mu mijyi, mu midugudu ndetse na gereza

Mu gihembwe cyo gutera ibiti hateganyijwe gutera kuri hegitari 8080 n’ibiti bivangwa n’imyaka kuri hegitari 19,364.

Intara iza ku isonga mu gutekesha inkwi nyinshi ni iy’Amajyaruguru ifite abakoresha inkwi bagera kuri 94.4%, igakurikirwa n’iy’Amajyepfo ifite 92.6%, Intara y’Uburasirazuba ikaba ifite 89.9%, Intara y’Uburengerazuba ifite 88.3% naho Umujyi wa Kigali ukagira 25.6.
Hatewe ibiti by’amoko atandukanye


Nyuma y’umuganda abaturage baganirijwe ku kamaro k’ibiti

Yisangize Inshuti.

Ibitekerezo 1

  1. uyu munyamakuru arabona iyi mibare ye idatekinitse. ko yavuzeko inkwi namakara bikoreshwa ku kigero cya 98.5% intara ili kwisonga ikaba ifite 94% ali kugereranya ibiki
    natange % ryabakoresha inkwi yongere atange % yabakoresha amakara cyangwa se aduhe % kuntara mugukoresha amakara ninkwi.

Tanga Igitekerezo