Depite Kayiranga yamaganye ubutinganyi n’ubupfubuzi bimaze gufata intera muri Kigali

Depite Kayirangwa Rwasa Alfred yabwiye abaturage bo mu Murenge wa Rwezamenyo mu ko Iterambere ry’u Rwanda rishingiye ku muryango kandi ko igihugu kitatera imbere hakiri amakimbirane mu miryango cyangwa se abantu batabyara.

Ibi Depite Kayiranga Rwasa yabivuze mu kiganiro yahaye abaturage cyavugaga ku itegeko ry’umuryango nyuma y’umuganda rusange wabereye mu Kagari ka Kabuguru ya kabiri mu Murenge wa Rwezamenyo mu Karere ka Nyarugenge.

Yavuze ko iterambere rya mbere ry’igihugu atari ubutunzi bukirimo ahubwo ko rishingiye ku baturage bacyo babayeho neza, ahera aho anenga umuco yise mubi wadutse w’abaryamana bahuje ibitsina kandi ko ufite ingaruka kuko igihe cyazagera ba bantu igihugu gishingiyeho iterambere bakabura kubera kutabyara.

Yagize ati “Ubukungu bwa mbere si zahabu, si amazu y’agatangaza si amafaranga…ubukungu bwa mbere ni umuntu, umuntu akomoka mu muryango. Hari ibintu byateye bijya bintanagaza byitwa ubutinganyi. Burya rero iyo abantu babanye bahuje ibitsina baba baciye urubyaro bivuze ko abajya mu Nteko Ishinga Amategeko yabo batora ubutinganyi nyuma y’imyaka 120 icyo gihugu kiba kitazongera kororoka.”

Depite Kayiranga kandi yokomoje ku ngeso yadukanywe n’abagore bajya gushaka abandi bagabo cyangwa abasore baryamana nabo kuko batamazwe irari n’abo bashakanye ndetse bikaba bigaragara ko benshi banabishyigikiye nk’uko byumvikanira mu mvugo “gupfubura”.

Yagize ati “ Hari ibintu byaje ngo ni ugupfubura mbyumva inaha mu mujyi wa Kigali kuruta uko mbyumva ahandi mu byaro, icyo kintu niba tukibatiza iryo zina bivuze ngo ikibazo si cyo ikibazo ni izina twari twagihaye, niba tugeze aho tugiha izina ryiza ni ukuvuga ko ikibazo atari cyo ikibazo, ni uko tukita.

Ibi byose byagaragajwe nk’ibikomeje gutobera imibereho myiza umuryango nyarwanda wahoranye, akaba ari nabyo bikomeje kuba icyanzu cya za gatanya zikomeje kwaduka mu ngo nyinshi mu Rwanda.

Aba baturage bo mu Murenge wa Rwezamenyo, bagaragaje ko ikibazo cy’ubupfubuzi giterwa ku ruhande rumwe n’abagabo batabasha kuzuza inshingano zabo mu ngo ariko na none hakaba ari n’abandi bagore babikorera ingeso.

Umurenge wa Rwezamenyo kandi ni umwe mu Mirenge yo mu mujyi wa Kigali irimo umubare munini w’abakora ubutinganyi ndetse banafite amashyirahamwe bahuriramo

Abaturage ba Rwezamenyo nabo bemeza ko ubupfubuzi n’ubutinganyi buhari

Habanje gukora umuganda mu mudugudu w’Umutara

Yisangize Inshuti.

Ibitekerezo

Tanga Igitekerezo