Gatsibo: Umusaza w’imyaka 70 yatakambiye Minisitiri w’intebe birangira ahakuye inka

Umusaza w’imyaka 70 witwa Gakwaya Dismas, utuye mu murenge wa Gatsibo, Mu Karere ka Gatsibo, yisabiye Minisitiri w’intebe inka mu ruhame nyuma yo kuvuga ko abayobozi bo hasi bamwirengagiza kandi yashobora kuyorora.

Ku wa gatanu tariki ya 22 Nyakanga 2016, ni bwo Minisitiri w’intebe yasuye Akarere ka Gatsibo akorana umuganda udasanzwe n’abaturage wo gutangiza igihebwe cya gatatu cy’ihinga cya.

Nyuma y’umuganda Minisitiri w’intebe Anastase Murekezi, yafashe umwanya aganiriza abataruge ndetse bamwe banamugezaho ibyifuzo n’ibibazo.

Icyo gihe umusaza w’imyaka 70 Gakwaya Dismas yafashe ijambo abwira Minisitiri w’intebe ko amusabye inka ku mugaragaro kuko abandi bayobozi bamwirengagiza kandi ashoboye kuyorora.

Mu magambo yuzuye ubwuzu no gutakamba, muzehe Gakwaya yagize ati :”Bwana Minisitiri w’intebe, nyakugira Imana mu Rwanda we ayiiiiiiiiiiiiii, bwana minisitiri w’intebe nyakugira Imana mu Rwanda we icyo nkusabye, icyo nkusabye, nkusabye inka mu maso y’aba bagabo barandenza amaboko, nta muyobozi ungeraho kandi mfite imyaka 70, kandi kubakira inka ndabishoboye, kuyiragira ndabishoboye. Ikindi ndi umuntu w’umuvumvu ufite inzuki nyinshi cyane na Meya arabizi.”


Muzehe Gakwaya Dismas yatakambiye Minisitiri w’intebe amusaba inka

Uyu musaza yatakambiye Minisitiri w’intebe amubwira ko akwiye kumuha inka, ati:”Rwose bwana Minisitiri w’intebe ngusabye inka nta kindi , nta kindi ngusabye inka, nta kindi ngushimiye Imana mu Rwanda, ngusabye inka bwana Minisitiri w’intebe, ngusabye inka yimpe. Mfite imyaka 70 yimpe, yimpe rwose ndayigusabye!”

Minsitiri w’intebe Anastase Murekezi nyuma yo kumva uyu musaza yahise asaba Minisitiri w’Ubuhinzi n’ubworozi Dr Mukeshimana Geraldine ko yakemura icyo kibazo cy’uwo musaza.

Dr Mukeshimana nawe yahise asaba ko uyu musaza yashyirwa muri gahunda ya Girinka ubundi akayihabwa kandi muri uyu mwaka.


Minsitiri w’intebe yahise amuhesha inka biciye muri Girinka

Muzehe Gakwaya Dismas yahise asabwa na Minisitiri w’intebe gutera ubwatsi bwinshi cyane kubera inka yari yemerewe, maze muzehe nawe ati:” Nkubita wimbwiriza kurira” avuga ko ubwatsi azabutera.

Gusa n’ubwo uyu musaza avuga ko ubuyobozi butanga inka we bukamwirengagiza, umwe mu bayobozi muri uyu murenge utarashatse ko izina rye ritangazwa, yatubwiye ko impamvu ngo uyu musaza adahabwa inka ngo ari uko asanzwe azwiho gusesagura, bitewe n’uko ngo baherutse kumuha miliyoni 6 nk’ingurane y’isambu ye akarere kakoreyemo ibikorwa byako, maze ngo agahita ayasesagura, kuburyo ngo ubu utamubaza n’iritoboye.

Yisangize Inshuti.

Ibitekerezo

Tanga Igitekerezo