Bugesera: Abaturage bongeye gutaka Intaragahanga, akarere kati zarahacitse burundu

3

Abaturage baturiye ishyamba riri I Gako mu murenge wa Ruhuha, mu karere ka Bugesera, barasaba inzego zibishinzwe kubafasha mu guhashya umutwe witwa intaragahanga ugizwe n’insoresore zamunzwe n’ibiyobyabwenge n’ubugizi bwa nabi, zitwikira ijoro zigahohotera umuntu wese unyuze muri ako gace, haba ku manywa ndetse na nijoro.

Ni kenshi iki kibazo cy’aba baturage batuye mu gace kegereye ishyamba ry’I Gako cyakunze kugaragazwa, aho basabaga inzego zibishinzwe kubafasha kuko ari ikibazo bavuga ko gituma batisanzura mu gukora akazi kabo bashakisha icyabatunga.

Aba baturage kandi bakunze kuvuga ko batinya kugenda mu masaha akuze batinya ko bahohoterwa n’izi Ntaragahanga.

Mukamulisa Athanasie, ni umwe mu baturage batuye muri aka gace, mu kiganiro yagiranye na Makuruki. rw, yavuze ko bitumvikana uburyo mu Rwanda hose amahoro asagamba ariko byagera muri aka gace ko ku Ruhuha, bikaba ikibazo kandi hari n’abashinzwe umutekano.

Yagize ati:” Ubu rwose byaratuyobeye ntitwumva ukuntu aba bantu biyise Intaragahanga bananira ubuyobozi kugeza ubwo batega abantu ku manywa y’ihangu, umuntu yareba nabi zikaba zanamuhitana.”

Iki kibazo cyongeye kubyuka muri iki cyumweru, ubwo umwe mu basore bakora akazi ko gutwara abagenzi kuri moto witwa Nyandwi Eugene, atezwe n’abantu kugeza ubu bataramenyekana neza, bakamurasa umwambi ariko ku bw’amahirwe ugafata moto yari atwaye we akarusimbuka.

Mu buhamya bwe avuga ko ubwo yavaga I Rweru yerekeza Kamabuye, ageze mu rugabano rwa Rweru na Kamabuye, atarasohoka ishyamba rya Gako, ngo ni bwo abagizi ba nabi bashatse kumwambura moto yari atwaye.

Nyandwi avuga ko ngo aba bagizi ba nabi babonye ko abacitse bahita bamurasa umwambi w’ingobe ngo umuhitane batware moto ariko Imana igakinga ukuboko umwambi ugafata mu itara rya moto.

Mu kiganiro Nyandwi yagiranye na Makuruki.rw, yagize ati: “Uretse Imana yonyine yahankuye naho ubundi byari birangiye. Bandashe umwambi ufata mu itara rya moto, nahise nyivaho ndiruka barayijyana cyakora ntibabashije kuyiheza kuko umugambi wabo waburijwemo n’abaturage bantabaye mbasha no kuva muri iri shyamba nari nahungiyemo kuko bari bantegeye hafi yaryo.”

Gusa ubuyobozi bw’akarere ka Bugesera bwo ntibwemeranya n’ibyo aba baturage bavuga ko uyu ari umutwe w’Intaragahanga, kuko buvuga ko abakora ibyo ari ibisambo nkuko no mu tundi duce bihaba.

Ubu buyobozi kandi buvuga ko abo bantu biyitaga Intaragahanga bigeze kubaho ariko ubu ku bufatanye n’inzego zishinzwe umutekano ngo bakaba barabarwanyije kandi ngo barahacitse burundu.

Umuyobozi w’akarere ka Bugesera Emmanuel Nsanzumuhire, yagize ati "Abo baturage nibahumure kuko ubu ingamba zashyizweho zo kubacungira umutekano, ibyo ni ibisambo bisanzwe kuko tujya tunahafatira ibintu bitandukanye byibwa ahandi. Ntabo ari uwo ari umutwe.”

Uyu muyobozi akomeza asaba abaturage kwitabira ibikorwa byo kwicungira umutekano bafatanyije n’inzego zibishinzwe, cyane ko ngo ubu hanakorwa irondo ry’amanywa muri iri shyamba hagamijwe kugira ngo bakaze umutekano waho.

Muneza Ferdinand

Makuruki.rw

Yisangize Inshuti.

Ibitekerezo 3

  1. Mwiriwe beza bavandi na
    nge ndumuturage waho ariko ikibazo cy,intaragahanga nikirekire kuko birakabije ntumushobora kuhaca muri 3zabahitana kuko zifite ibikoresho bikomeye Bayobozi rero nimudufashe rwose birakomeye?

  2. Mwiriwe beza bavandi na
    nge ndumuturage waho ariko ikibazo cy,intaragahanga nikirekire kuko birakabije ntumushobora kuhaca muri 3zabahitana kuko zifite ibikoresho bikomeye Bayobozi rero nimudufashe rwose birakomeye?

Tanga Igitekerezo