Akarere ka Nyanza katanze igisubizo ku kibazo cy’ikoreshwa ry’ibiryabarezi kimaze gufata indi ntera

2

Ibyuma byiswe ibiryabarezi ngo bimaze gutwara imitungo ya benshi

Hari hashize iminsi abanyarwanda biganjemo urubyiruko batakambira Leta ko yabafasha igaca imikino y’amahirwe bakorera ku byuma byitwa ibiryabarezi (soma Ibiryabareezi), kubera impamvu zirimo iz’uko bigiye kubamaraho imitungo, ndetse bikanararura urubyiruko kubera ko kuri ubu nta kindi bakora ahubwo usanga babyukira muri iyo mikino.

Byinshi byararavuzwe ndetse n’abantu b’ingeri zitandukanye batangira kugira amakenga y’ibyo byuma, bavuga ko bikora muburyo butemewe n’amategeko bagasaba Leta ko yabafasha guca ibyo byuma dore ko ngo bimaze gukenesha benshi.

Iyi mikino ngo imaze gutuma benshi mu bana b’urubyiruko bararuka bagata amashuri kuko ngo iyo bageze ahakinirwa iyi mikino ngo usanga ariho birirwa umunsi wose ntibibuke ko ishuri ribaho.

Iyi mikino y’amahirwe (tombora) kandi ngo imaze gusenya ingo za benshi mu banyarwanda dore ko ngo hari ubwo umugabo ajya kuyikina amafaranga yose yari afite akayamarirayo kandi yanamaze umunsi wose nta kandi kazi gateza imbere urugo rwe yakoze muri uwo munsi wose. Ibi ngo bikurura amakimbirane mu ngo ashingiye ku kwangiza umutungo.

Ku ikubitiro akarere ka Nyanza Nyuma yo gukemanga imikorere y’ibyo biryabarezi, ubu kamaze gufata umwanzuro wo kuba kabihagaritse muri aka karere.

Ba nyiri ibyo byuma byiswe ibiryabarezi bakabanza kwerekana ibyangombwa by’umwimerere bibemerera gukorera mu Rwanda.

Umuyobozi w’Akarere ka Nyanza, Ntazinda Erasme, yasobanuye ko imirimo yose ijyanye na Tombora yakorerwaga muri ako karere yabaye ihagaritswe kugeza igihe ubuyobozi bwa kompanyi buzagaragaza ibyangobwa by’umwimerere bwasabwe bibemerera gukorera mu Rwanda.

Yagize ati: “Baza gusaba gukorera muri Nyanza, icyo gihe bazanye ibyangombwa bituzuye ariko twatunguwe no kubona bo biha uburenganzira bwo gutangira gukora tutarabubemerera.”

Umuyobozi w’Akarere ka Nyanza yakomeje avuga ko imicungire y’ibyo byuma byifashishwaga mu mikino y’amahirwe irimo akajagari ku buryo byatezaga umutekano muke ndetse bikararura abana.

Ubuyobozi bw’akarere bukomeza buvuga ko biryabarezi “ bizongera gukora ari uko ba nyirabyo bagaragaje ibyangombwa by’umwerere bahawe n’ikigo gishinzwe iterambere mu Rwanda (RDB) kandi hakanubahirizwa amategeko agomba kugenga aho iyo Tombora ikorera."

Ku ikubitiro, ibi byuma bihagaritswe mu karere ka Nyanza nyuma yuko abaturage mu bice bitandukanye by’igihugu bagiye bakemanga imikorere yabyo bavuga ko ba nyirabyo babizanye bagamije kubamaraho imitungo yabo abandi na bo bakabifata nk’urusimbi bityo bagasaba Leta guhagariko iyi mikino.

Muneza Ferdinand

MAKURUKI.RW

Yisangize Inshuti.

Ibitekerezo 2

  1. Abeshi babuze amafaranga kubera ikiryabarezi babihagarikeburundu kandi bituma Ababa bitwaranabi

  2. Ahubwo se ibiceri bya 100frw nabyo byarabuze kubera ikiryabarezi bariya Bantu babikora nibaharikwe kabisa

Tanga Igitekerezo