Ibisubizo bya Minisitiri Kaboneka na Nyirasafari ku bwiyongere bw’amakimbirane yo mu ngo

1

Kuba abanyarwanda biyongera umunsi ku wundi ngo ni imwe mu mpamvu zikomeye zitera amakimbirane n’ihohoterwa ryo mu muryango. Minisitiri Kaboneka yavuze ko icyo kibazo kigomba kwigwaho n’abanyamadini bavuga ko Imana yabasabye kubyara bakuzuza isi bakamenya ko Isi yamaze kuzura bakagabanya.

Ibi Minisitiri w’ubutegetsi bw’igihugu Kaboneka Francis yabitangarije mu Nteko Ishinga Amategeko umutwe wa Sena kuri uyu wa 07 Kamena, ubwo we na Nyirasafari Esperance uyobora Minisiteri y’uburinganire n’iterambere ry’umuryango batangaga ibisobanuro ku bwiyongere bukabije bw’ihohoterwa n’amakimbirane mu miryango bisigaye ari inkomoko yo kwicana kwa hato na hato.

Hon Niyongira Galican, Perezida wa Komisiyo y’imibereho myiza, uburenganzira bwa muntu n’ibibazo by’abaturage yabanje kugaragaza uburemere bw’iki kibazo anagaragaza imibare y’abapfuye biturutse ku makimbirane n’ihohoterwa atunga agatoki abarebwa n’iki kibazo kudakora ibihagije mu kugikemura.

Ati: "Iki kibazo kigaragara muri za Raporo zitandukanye, ni ikibazo gihora kigarukwaho bigatuma twibaza niba ba minisitiri bireba bakora ibikwiye cyangwa ibihagije kugirango iki kibazo gikemuke, iki kibazo aho kugabanyuka kigenda cyiyongera"

Mu mibare Hon Niyongira yatanze ku buremere bw’iki kibazo, yavuze ko muri 2015 hagaragaye abantu 1000 bahohotewe, harimo 930 bishwe biturutse ku ihohoterwa n’amakimbirane yo mu ngo n’abantu 138 bahohotewe bagiye kubuzwa ubuzima ntibigerweho.

Nyuma yo kubona uburemere bw’iki kibazo, ku itariki 01 Mata 2015 Sena yasabye Guveverinoma gukora isesengura ku gitera ihohoterwa n’amakimbirane angana atyo hanyuma ikazatanga Raporo muri Sena nyuma y’amezi atatu, gusa Hon Galican yagaye abaminisitiri bireba kuba barananiwe gutanga iyi raporo bikagera aho inteko ibasaba kuza gutanga ibisobanuro mu magambo.

Kaboneka na Nyirasafari bavuze ko iri hohoterwa n’amakimbirane bishingiye ku ruhuri rw’ibibazo biri mu muryango Nyarwanda

Mu bisobanuro aba baminisitiri batanze bavuze ko ihohoterwa n’amakimbirane yo mu miryango akenshi biterwa n’ibibazo bishingiye ku kuba abantu bamaze kuba benshi bagatangira gupfa imitungo.

Kaboneka yavuze ko abantu bamaze kuruta ubutaka, ati "Ubutaka ngira ngo kubera ko ari wo mutungo abanyarwanda bose bahuriyeho, birasa nk’aho abantu batangiye kuruta ubwinshi ubutaka bigateza amakimbirane."

Ibi kandi ngo birajyana n’amategeko asigaye agenga izungura, kuba kera nta mukobwa cyangwa umugore wazunguraga ubu bakaba bazungura, aho amategeko agiriyeho akabibemerera ngo hari ubwo umukecuru ajya kuzungura bigateza ikibazo mu muryango kuko ababyeyi baba barapfuye kandi basaza babo barihariye ubutaka.

Ikindi cyagaragajwe ni ubukene, Kaboneka yabuvuzeho agira ati: Abasangiye ubusa bitana ibisambo, baba baburaye aho kugirango bafatanye bashake umuti, ugasanga bitanye ba mwana”

Imyemerere y’Amadini yigisha abayoboke bayo kubyara bakuzura isi

Kaboneka agaruka kuri iyi myemere yagize ati: "Hari abafite imyemerere yo kuvuga ngo Imana yaravuze ngo ntituringanize urubyaro, ngo umuntu agomba kubyara ngo kuboneza urubyaro binyuranije n’amahame cyangwa amategeko y’Imana, ariko ushobora kwibaza uti Yesu we abamubyaye babyaye bangahe? ibyo kubyara ngo isi yuzure ngira ngo yaruzuye, ahubwo irimo irasaguka, dukwiye noneho kuringaniza urubyaro umuntu akabyara abo ashoboye kurera."

Imyumvire idahwitse ku buringanire:

Aba baminisitiri bagaragaje ko hari abagore bumva ko uburinganire ari umwanya wo kwigaranzura abagabo bakaboneraho umwanya wo kubakandamiza na byo bigakurura amakimbirane.

Mu bindi byagarutsweho na ba Minisitiri Nyirasafari na Kaboneka ku bitera abakimbirane n’ihohoterwa ni Ubusambanyi no gucana inyuma, Ibiyobyabwenge, Ubusinzi , Ababana batarasezeranye, Gushaka kw’abantu bataziranye,Gushyira imbere akazi ntibuzuze inshingano z’urugo, kuba hari abagabo bakiyumva nkaho ari bo bakomeye mu rugo n’ibindi.

Yisangize Inshuti.

Ibitekerezo 1

  1. Ntabwo ari ugushyira akazi imbere ahubwo na leta mbona umuryango ntacyo uyibwiye! kuko abakozi benshi nabayo barimo ntibabana kubera ako kazi abantu bazahura rimwe mukwezi cg gatatu mumwaka ngo urwo ni urugo(umuryango)!!!!

Tanga Igitekerezo