Abazunguzayi n’ababagurira ntibakozwa ibyo kuva mu muhanda n’ubwo bashyiriweho ibihano

1

Nyuma y’aho umujyi wa Kigali utangaje ko hashyizweho itegeko rivuga ko abazunguzayi ndetse n’ababagurira bazajya bahanwa kimwe mu rwego rwo guca ubu bucuruzi bwitwa ubw’akajagari, bamwe mu baturage ndetse n’abazunguzayi baravuga ko batiteguye kubireka. bamwe bavuga ko babona ibya make bigendanye n’ubushobozi bwabo, abandi bo bakavuga ko ariho bakura amaramuko.

Inama Njyanama y’umujyi wa Kigali iherutse gusohora amabwiriza ari mu igazeti ya leta No 28 bis yo kuwa 18 Nyakanga 2016 avuga ko umuntu wese uzajya ugura igicuruzwa n’umuzunguzayi azajya acibwa amande y’amafaranga y’u Rwanda 10000 kimwe n’umuzunguzayi wacuruje ibicuruzwa bye mu buryo butemewe n’amategeko.

Abagize inama njyanama y’Umujyi wa Kigali bavuga ko abacuruzi batemewe (abazunguzayi) ari abantu bagendana ibicuruzwa mu mujyi wa Kigali, cyane cyane mu mihanda, imbere y’amasoko, imbere y’amaduka, ahategerwa imodoka n’imbere yaho.

Umujyi wa Kigali uvuga ko ubu bucuruzi ngo bubangamira abacuruza mu buryo bwemewe n’amategeko urujya n’uruza rw’abagenzi n’ibinyabiziga mu mihanda, ndetse bugateza isuku nke no kugurisha ibintu bitagifite ubwiza kubera izuba n’umuyaga n’isuku nke, bamwe bakabasha ndetse no kugurisha ibintu bifite inenge kubera ko ababigura nta mwanya baba bafite wo kugenzura neza ibyo bicuruzwa bigendanwa.

Nubwo ubuyobozi bwashyizeho ingamba zikomeye mu rwego rwo guca ubu bucuruzi, kugeza ubu hirya no hino mu mujyi wa Kigali haracyagaragara ubu bucuruzi, nubwo bisa n’ibyahinduye isura ugereranije nuko byari bisanzwe.

Umwe mu bazunguzayi waganiriye na makuruki.rw utashatse kuvuga amazina ye ukiri gukora ubu bucuruzi, aravuga ko nubwo leta yashyiraho ingamba zimeze gute atiteguye kureka ubu bucuruzi avuga ko bumufatiye runini mu mibereho ye.

Yagize ati:” Ni kenshi badushyiriyeho ingamba zikomeye, baradufunze na nubu bakidufunga, ntacyo batakoze gusa natwe ntabwo duteze kuzabivamo kuko niho dukura amaramuko. Aho kuburara cg ngo umwana wanjye abure ibimutunga tuzemera tubabare ariko ntiduteze kubivamo.”

Uretse aba bazunguzayi bavuga ibi, kuruhande rw’abaguzi nabo byamaze kwemezwa ko bazajya bahanwa kimwe n’abazunguzayi, nabo hari abavuga ko badashobora kubireka kuko amikoro yabo niho agarukira.

Mu bo makuruki.rw yasanze i Nyamirambo mu ijoro ryakeye bari guciririkanya imyenda n’abazunguzayi nabo ntibemeranywa n’icyemezo cyabafatiwe.

Umwe twaganiriye nawe utashatse kwivuga amazina yavuze ko ibyo leta yakoze nubwo ari ukabaca intege, nabo ngo ntibiteguye kubireka.

Yagize ati:” Ariko abafata iyo myanzuro ubwo baba babanje gutekereza koko? aha ku muhanda niho mbasha kubona utuntu twa make yaba ibyo kurya ndetse no kwambara ubwo umbwira gute ko nabireka koko? Bazakore icyo bashaka gusa njye sindi mubazabireka.”

Gusa hari abandi bavuga ko ibyakozwe n’umujyi wa Kigali ari ugukabya bagasaba ko bakwicara bagasuzuma neza ibijyanye n’iki cyemezo kuko ngo bitumvikana uburyo umuntu ari kuzunguza imari y ’ ibihumbi 5000frw, wamufata ukamuca 10000frw, ikizakurikira ngo ni ugufungwa wenda basize abana bato murugo, bazicwa n’inzara.

Umujyi wa Kigali nawo uvuga ko utiteguye kuva kuri iki cyemezo, kuko ibyo bakora bigamije gushyira ibintu muburyo nkuko umuyobozi w’uyu mujyi Monique Mukaruliza yumvikanye abisobanura mu kiganiro yahaye BBC.

Muneza Ferdinand
Makuruki.rw

Yisangize Inshuti.

Ibitekerezo 1

Tanga Igitekerezo