Abanyarwanda bandikiye inzego zikomeye ku isi batabariza abugarijwe n’inzara

1

Abafite ikibazo cyo kubura ibiribwa baratabarizwa na Urugero Rwiza-Support/Foundation

Umuryango utegamiye kuri Leta (Societe civil) uharanira uburenganzira bw’abatishoboye ndetse no kurwanya icyorezo cya SIDA, Urugero Rwiza-Support/Foundation, watangije urugamba rwo gukebura isi kugira ngo yongere itekereze ku kibazo cy’ibiribwa bikomeje kuba ingume, bituma ama miliyoni y’abayituye bahura n’ikibazo cy’inzara.

Uyu muryango umaze imyaka ibiri utangiye ibikorwa byawo, wita by’umwihariko ku bafite ubumuga, abana , abagore n’abakobwa ndetse no kurwanya icyorezo cya SIDA mu bantu.

Uyu muryango uvuga ko nyuma yo kubona ko hari umubare munini w’abatuye isi batabona ibyo gufungura cyangwa se bakaba barya rimwe ku munsi kandi hari ibihugu bimena ibyo kurya mu Nyanja, ngo bahisemo kwandikira umuyobozi w’ishami ry’umuryango w’abibumbye rishinzwe ibiribwa ku isi (PAM) ndetse n’izindi nzego zikomeye kugira ngo zizabafashe kugeza igitekerezo cyabo ku munyamabanga mukuru w’umuryango w’abibumbye, kugira ngo ubwo hazaterana inama rusange y’uyu muryango iki kibazo bazagishyire mu bihangayikishije isi bikwiye gushakirwa igisubizo.

Hagenimana Gregoire uvugira uyu muryango aganira na Makuruki.rw yagize ati: “Ikibazo twe tubona ko gihangayikishije isi kijyanye n’ibura ry’ibiribwa, twagiraga ngo dutange umusanzu wacu mu kubaka isi no gutuma abayituye barushaho kumererwa neza tugaragaza uko ikibazo giteye. Twabonaga hirya no hino ku isi hari abantu benshi bababaye harimo abasanzwe batishoboye batabona uburyo bwo gufungura, barya riwe ku munsi cyangwa se ntibanarye, ndetse n’ikibazo cy’impunzi kigenda kigaragara, dusanga rero ibyo bibazo byose bigenda biba bigira ingaruka ku batishoboye kandi ku rundi ruhande ugasanga hari ibihugu bifite ubushobozi ndetse bimena ibiribwa biri ku ngano nini cyane mu Nyanja babigereranya nk’aho ari imyanda kandi bakarebye ko ibyo bintu hari abantu byagafashije.”

Hagenimana avuga ko ibi bitagakwiye kuba hari abantu bamena ibyo kurya mu gihe hari abandi bantu babikeneye baba babuze ibyo kurya, bityo bikaba ngo ari yo mpamvu basaba ko umuryango w’abibumbye ukwiye gukora ibishoboka byose ukaba wafatira ingamba icyo kibazo kugira ngo n’ababayeho nabi nabo babashe kugobokwa.

Yagize ati: “Ntabwo dutegeka ibyo bihugu icyo bigomba gukora, twebwe turakora ubuvugizi, ni nko kwibutsa kuko bishobora kuba bitazwi, twebwe tubona ko ari ikibazo. Turifuza ko babiganiraho abo bireba bose kuko umwe yibukije undi cyangwa abantu babiri, batatu bakibukiranya bishobora kugira umusaruro bitanga n’uwabonaga ko atari ikibazo akabyumva akabona ko ari ikibazo.”

Imibare yerekana ko byibura igihugu cy’ubufaransa kimena mu Nyanja ibiribwa biri hagati ya Toni miliyoni 1n’igice na toni miliyoni 6 buri mwaka, aho byibura ngo buri segonda iki gihugu kimena mu Nyanja ibiro 38 by’ibiribwa.

Ibi byose ngo bigira ingaruka mbi zirimo ukwiganza kw’ikibazo cy’imirire mibi mu batuye isi.

Uyu muryango wifuza ko nkuko umuryango w’abibumbye wita ku bibazo byo kurwanya ibitwaro bya kirimbuzi, ihindagurika ry’ikirere, icyorezo cya SIDA, ngo bakwiye no kwita kuri iki kibazo cy’ibura ry’ibiribwa gitizwa umurindi n’ibihugu bimena ibiribwa hirya no hino mu Nyanja kandi ngo byakabaye bigoboka abahuye n’ibibazo byo kubura ibiribwa.

Yisangize Inshuti.

Ibitekerezo 1

  1. Iki gitekerezo ni ingira-kamaro, uyu muryango UR-Support/Foundation ufite ishingiro. Bibashije kubahirizwa byafasha benshi!

    Murakoze

Tanga Igitekerezo