Abafite ubumuga bavuga ko imirimo yabo atari ugukata indabyo gusa.., ngo n’indege bazitwara

Niyomugabo Romaris Umuyobozi w’Inama y’ubutegetsi y’abafite ubumuga (NCPD),yavuze ko abafite ubumuga badakwiye kubarwa ko bashoboye imirimo iciriritse gusa kuko bashobora no gutwara indege cyangwa gukora muri Banki.

Ibi yabivugiye mu nama y’Abantu bafite Ubumuga,mu isobanurampamvu ryo gutegura icyumweru cyahariwe abantu bafite ubumuga no kwizihiza umunsi mpuzamahanga wabo uyu mwaka.

Mu ntego z’iterambere rirambye abafite ubumuga bateganya harimo kugabanya ubusumbane hagati y’abaturage haba mu nzego z’imirimo, amashuri n’ahandi cyane ko ubushakashatsi bugaragaza ko mu bihugu bikiri mu nzira y’amajyambere gushakira akazi abantu bafite ubumuga imirimo bikiri ingorabahizi.

Perezida w’Inama y’Igihugu y’Abantu bafite Ubumuga, Niyomugabo Romalis , yavuze ko hakwiye gushyirwaho uburyo bworohereza umuntu udafite ubumuga ndetse n’ubworohereza umuntu ufite ubumuga kuko bose bakenera koroherezwa ku kigero kitangana.Aha yavuze ko abafite ubumuga nta kintu batakora baramutse bahawe ahahirwe no gutwara indege.

Yagize ati “Ikibazo kiboneka ni uko ibyateganyijwe byose usanga byorohereza abadafite ubumuga. Ubwo rero tukaba dusaba ko hatagira umuntu udufata akadushyira mu gatebo kamwe ngo dushoboye gukoropa, twa turimo duciriritse dutoya, koza ibirahure, gukata indabyo…,hoya n’indege twazitwara, n’amato twayatwara, n’imodoka n’ibindi bigenda bituruka ku mwihariko umuntu ufite ubumuga yakora”.

Uyu muyobozi yakomeje agira ati “Nkaba rwose nka Perezida w’abantu bafite ubumuga mpamya ko abafite ubumuga bahawe ibyangombwa biborohereza mu kazi gatandukanye babasha gukora bigendanye n’ubumenyi kuko n’abandi bose ushobora akazi bitewe n’inshingano wabonye."

Ingero z’indi mirimo yavuze abafite ubumuga bashobora gukora harimo gukora muri Banki ndetse no kuba umuyede yifashishije gutwara imashini zisigaye zitwara isima ku miturirwa.

Yagize ati “Uyu munsi muri za Banki harifashishwa ikoranabuhanga. Ese iriya mudasobwa twifashisha dutanga serivisi abantu twe tudafite ubumuga, uyishyizemo porogaramu yorohereza umuntu ufite ubumuga bwo kutabona ntiyaha Serivisi umukiliya? Izi Porogaramu zirahari”.

Aha yatanze urugero rw’umujyanama mu by’amategeko w’umunyamabanga Nshingwabikorwa wa NCPD afite ubumuga bwo kutabona bityo ikiba gisabwa ari ukumugenera uburyo bwo kubasha kubikora.

Mu mwaka wa 2012 nibwo haherutse gukorwa ibarura rusange ry’imiturire aho abafite ubumuga barengaga ibihumbi 400 bangana na 5% bafite ubumuga mu muryango Nyarwanda.

@Eric Birori

Yisangize Inshuti.

Ibitekerezo

Tanga Igitekerezo