Ntagihindutse vuba aha MINISANTE mu nkiko n’uruganda rwayigurishije inzitiramubu zidafite ubuziranenge

3

Minisiteri y’Ubuzima iratangaza ko igiye kujyana mu nkiko uruganda NetProtect rwayigurishije inzitiramubu zitujuje ubuziranenge, ubu ngo ikaba itegereje gusubizwa amafaranga yatanze bitakunda ikitabaza inkiko.

Dr Agnes Binagwaho, Minisitiri w’Ubuzima

/Photo.Ferdinand

Byatangajwe na Minisitiri w’Ubuzima Dr. Agnes Binagwaho mu kiganiro n’abanyamakuru ku mugoroba wo kuri uyu wa mbere, aho yavuze ko urwo ruganda rwabagurishije inzitiramubu zifite igipimo cy’umuti uri munsi y’ikigero ubusanzwe zakabaye zifite.

Binagwaho yakomeje avuga ko bamaze kubona ko bahawe inzitiramubu mbi, ngo bahise basaba kwishyurwa amafaranga yose bazitanzeho, , bitaba gutyo bakajya mu nkiko. Yagize ati: “Turi mu kumvikana na MINIJUST n’abandi batandukanye, wenda bazadusubize amafaranga yacu cyangwa twitabaze inkiko.”

Abajijwe icyatumye bajya kugura inzitiramubu zapfuye kandi hari ibigo bibanza gupima ubuziranenge bw’imiti n’ibindi bikoresho, Minisitiri Binagwaho yavuze ko nabo bayobejwe Ishami ry’Umuryango w’Abibumbye ryita ku buzima(OMS), Kuko ngo ariwo wohereje inzobere zawo muri urwo ruganda gupima ubuziranenge bwazo. Yagize ati: “Ubusanzwe hari ubuziranenge mpuzamahanga, rero hari inzobere zasuzumye ubuziranenge bw’izo nzitiramubu, inzobere zagiye muri urwo ruganda, batanga raporo muri OMS, natwe tujya kugurayo.”

Ubu ngo hategerjwe igisubizo cy’urwo ruganda, byaba bidashoboka bakitabaza inkiko.Iki kandi si ikibazo cy’u Rwanda gusa, kuko Binagwaho yavuze ko hafi ibihugu by’Afurika byose byahawe inzitiramubu zimeze gutyo, kandi bose bari gufatanya ngo urwo ruganda rubibazwe.

Inztiramubu MINISANTE yaguze muri NetProtect ni miliyoni eshatu, kandi ngo inzitiramubu imwe bagiye bayigura ku madolari atanu.(hafi amanyarwanda 3500), utabariyemo amafaranga y’ingendo n’ibindi.

Ubu uruganda NetProtect yarahagaritswe kubera kutuzuza ubuziranenge.

Icyakora nubwo habayeho ikibazo nk’icyo, ngo izo nzitiramubu zagerageje gukora ndetse umubare w’abicwa na Malariya uragabanyuka, kuko wavuye ku bantu 412 muri 2013 ,ukagera kuri 332 muri 2014.

Abanyarwanda bakaba bakanguriwe gukomeza kurara mu nzitiramubu , batema ibihuru n’indi myanda iri hafi y’urugo, kandi bakajya kwivuza ku gihe.

Ferdinand Maniraguha

Info@makuruki.com

Yisangize Inshuti.

Ibitekerezo 3

  1. Mana y`i Rwanda wadukijije byinshi none turagusaba ngo udukize n`uyu mu minisitiri. kuko uretse no kwishongora ku rwanda n`abanyarwnda ngo ntiyavuga ikinyarwanda nta n`icyo arumariye na gato. arutwa n`abamubanjirije bose

  2. Ariko se ubu ibyacu bizakomeza gutya kugera ryari ? None se ntabwo mperuka natwe dufite ikigo gishinzwe kugenzura ubuziranenge aricyo RBS kuki se cyo kitigeze gifata echantillon ngo nacyo gipime?.Ntabwo burigihe tugomba kugendera kuby’ impuguke nki za OMS zavuze niba natwe tuvugako dufite ubushobozi. Aya ni amakosa yababishinzwe nka MINISANTE Na RBS

Tanga Igitekerezo