U Rwanda ruyoboye Afurika mu gushishikariza abashakanye kwipimisha agakoko ka SIDA

Ubushakashatsi bwakozwe n’itsinda rya Rwanda Zambia HIV Research Group bwagaragaje ko u Rwanda ruza imbere muri Afurika mu gutanga inama no gushishikariza abashakanye kwipimisha agakoko gatera SIDA.

U Rwanda ni cyo gihugu cya mbere muri Afurika mu gushyira mu bikorwa uburyo bwo gutanga inama no gukangurira abashakanye kwipimisha ubwandu bw’agakoko gatera SIDA ku bushake . Ibi bikaba byaratumye 70% by’Abanyarwanda birinda ubwandu bushya bw’agakoko gatera SIDA.

Nk’uko tubikesha Medicalxpress.com mu cyegeranyo cyakozwe ku bufatanye bw’u Rwanda na Zambia, byagaragaye ko mu Rwanda hejuru ya 90% by’ubwandu bushya buboneka mu bashakanye ari na byo byatumye u Rwanda rushishikariza abashakanye kwipimisha agakoko gatera SIDA kugirango bahabwe inama zijyanye nuko bahagaze.

Uburyo bwakoreshejwe buzwi nka CVCT, ni ubufasha abashakanye gusangira ibisubizo bivuye mu kwipimisha ubwandu bw’agakoko gatera SIDA, butuma kandi bamenya uburyo birinda ikwirakwizwa ryayo, bakaboneza urubyaro kimwe no gufashanya mu gihe habonetse umwe muri bo wanduye.

CVCT kandi ifasha mu kugabanya amahirwe ku bana bandura bavuka mu gihe ba nyina bafite ubwandu bw’agakoko gatera SIDA.

Etienne Karita umuyobozi w’umushinga San Francisco mu Rwanda avuga ko umubare munini w’abakuze udakunze kwita ku kumenya aho bahagaze mu kwirinda ubwandu bw’agakoko gatera SIDA baba ubwabo kimwe n’abo babana, kandi ugasanga ahanini batazi ko bishoboka ko wabana n’uwo mwashakanye igihe kinini kandi afite Virusi itera SIDA.

U Rwanda ni cyo gihugu cya mbere muri Afurika mu gushyiraho gahunda ya CVCT aho hagati ya 88-90% by’abashakanye bipimishije virusi itera SIDA. Ibi bikaba byaratumye ibihugu birenga 20 biza kwigira ku Rwanda ishyirwa mu bikorwa ry’iyi gahunda.

Gahunda ya CVCT yakozwe binyuze mu murwango San Francisco, umuryango ushinzwe gukora ubushakashatsi washinzwe mu 1986 i Kigali ukaba ukorana n’ikigo cy’igihugu gishinzwe ubuzima muri Ministeri y’ubuzima.

Umushinga San Francisco hamwe n’undi muryango ukora ubushakashatsi ku bwandu bwa SIDA muri Zambia byakoze itsinda rishinzwe gukora ubushakashatsi kuri SIDA ari ryo Rwanda Zambia HIV rifite icyicaro muri kaminuza Emory muri Zambia.

Kimwe mu byatumye u Rwanda rwanikira ibindi bihugu mu gushishikariza abantu kwipimisha agakoko gatera SIDA, ni uko habayeho ubufatanye na Guverinoma, abaturage begeranye, itumanaho ryoroshye ndetse n’ururimi rumwe bitandukanye na Zambia kuko itigeze ishyiramo imbaraga zihagije mu kubahiriza gahunda ya CVCT.

Susan Allen, umwarimu mu ishuri rikuru ry’ubuganga muri kaminuza ya Emory akaba ari no mu itsinda rikora ubushakashatsi kuri SIDA ,Rwanda Zambia HIV Research Group avuga ko binyuze mu bufatanye n’imiryango mpuzamahanga na guverinoma uyu muryango wabashije gushyira mu bikorwa gahunda ya CVCT irimo gukiza ubuzima bwa benshi, kurwanya SIDA bakaba baniteguye gukomeza mu rwego rwo kwaguka.

N’ubwo muri 2013 ishimi rishinzwe ubuzima ku isi (OMS) yashyizeho gahunda yo gutanga imiti ku bantu bose babana n’ubwandu bwa Virusi ya SIDA hagamijwe kugabanya ikwirakwizwa ry’agakoko gatera SIDA, byagaragaye ko aya mabwiriza atagerwaho mu gihe gahunda ya CVTC itigishjwe ngo inashyirwe muri gahunda za Leta zo kurwanya SIDA nk’uko bivugwa n’iri tsinda ryakoze ubu bushakashatsi.

.

Yisangize Inshuti.

Ibitekerezo

Tanga Igitekerezo