Nyabihu iri kurwana no kuva ku mwanya wa mbere mu kugwingiza abana benshi mu gihugu

Umwe mu bana bagaragaza imiririre mibi mu Karere ka Nyabihu, Umurenge wa Jenda akagali ka Rega

Ubuyobozi bw’Akarere ka Nyabihu bwatangaje ko bugeze kure ubukangurambaga n’inyigisho zigamije kwigisha ababyeyi uburyo bwo gutekera abana babo indyo yuzuye, kugirango ive ku mwanya mubi wo kugira abana benshi bagwingiye.

Ubushakashatsi bwa kane ku miturire n’ubuzima(DHS5) bwakoze mu mwaka wa 2014/2015 n’ikigo gishinzwe ibarurishamibare, bwagaragaje ko ako karere kaza ku mwanya wa mbere mu gihugu mu kugira abana bagwingiye, aho kari gafite 59 % .

Ubusanzwe aka karere kazwiho kweza ibirayi ndetse Meya wako Uwanzwenuwe Theoneste ntatinya kuvuga ko ari ikigega cy’igihugu.Ako karere kandi keza ku bwinshi imboga za karoti, epinari n’izindi.

Dusenge Pierre, Ushinzwe ubuzima mu Karere avuga ko bakimara kubona iyo mibare y’abana bagwingiye bihutiye kwigisha abaturage uko bakwita ku bana babo babagaburira indyo yuzuye.

Mu ibarura bakoze muri uyu mwaka, ngo basanze umubare w’abana bagwingiye waragabanyutse kuva muri 2015, uva kuri 59 % ugera kuri 48 %.

Ati “Kubera kweza ibirayi cyane, usanga ifunguro ry’abaturage bacu ari ibirayi cyane ndetse n’ibishyimbo.Imboga zirahari ariko usanga batabikunda. Usanga batita ku bana atari uko babuze ibyo kurya ahubwo ari imyumvire ikiri hasi.”

Meya Uwanzwenuwe avuga ko ababyeyi bafite ubumenyi buke ku -ndyo yuzuye, kubw’ibyo n’ibiryo bafite bakabigaburira abana nabi.

Ati “kugwingira ntibivuze ko baba babuze ibyo kurya ahubwo biba bivuze ko babibagaburiye nabi…twabonye abantu batita ku guhesha agaciro ibyo bafite ngo bigirire akamaro umubiri.Kurya neza si ukurya ngo igifu cyuzure, ahubwo kurya neza ni ubwiza bw’ibyo wariye.”

Mu mirenge ya Jomba na Jenda Makuruki yabashije kugeramo, buri mudugudu ufite igikoni cy’umudugudu aho ababyeyi bigishirizwa guteka indyo yuzuye, hari n’imiryango itandukanye yita ku buzima ifatanya n’akarere mu gufasha abana bafite ikibazo cy’imirire mibi.

Ubushakashatsi bwagaragaje ko nyuma ya Nyabihu hakurikiraho Akarere ka Ngororero mu kugira abana benshi bagwingiye, aho ifite 56 % mu gihe mu gihugu hose ari 38%.

Yisangize Inshuti.

Ibitekerezo

Tanga Igitekerezo