Nyabihu:Mu mwaka umwe, abana 400 bari munsi y’imyaka 19 batewe inda

Dusenge Pierre ushinzwe ubuzima mu Karere ka Nyabihu

Inzego zishinzwe ubuzima mu Karere ka Nyabihu zatangaje ko muri ako karere abana bari munsi y’imyaka 18 basaga 400 batewe inda mu mwaka umwe.

Aka karere gaherereye mu burengerazuba bw’u Rwanda gatuwe n’abaturage bagera ku bihumbi 290, biganjemo urubyiruko.Hakunze kuvugwa abana b’abakobwa baterwa inda bakiri bato ndetse n’abashyingirwa batagejeje imyaka 21 yemewe n’amategeko.

Mu kiganiro yagiranye na Makuruki, Dusenge Pierre ushinzwe ubuzima mu Karere yavuze ko mu mezi 12 ashize muri ako karere abana babyaye bakiri bato basaga 400.

Dusenge yavuze ko muri ayo mezi ku bitaro n’amavuriro atandukanye mu Karere habyariye abagore 4818, muri bo 484 ni abana bari munsi y’imyaka 19, ni ukuvuga hafi 10 %.

Meya w’akarere ka Nyabihu, Uwanzwenuwe Theoneste yavuze ko gutwara inda kw’abakobwa bakiri bato biterwa ahanini n’uburangare bw’ababyeyi, badaha uburere bukwiye abana ngo banabakurikirane.

Yagize ati “..mwavuze ngo amandazi ariko amandazi yakabaye ashukishwa wa wundi ufite imibereho mibi gusa ariko siko bimeze.Hari uguteshuka ku nshingano cyane cyane ku babyeyi, kutuzuza neza inshingano zabo kugirango bafashe abana kumva no gusobanukirwa.Nkuko mubizi uburere umwana abukura mu muryango, muri iyo miryango ikimaze kugaragara nuko abana benshi barasa n’aho biyoboye, bigenga.Muri uko kwigenga niho ahurira n’abandi bamuyobya.”

Muri aka akarere kandi havugwa ababyeyi bahatira abana babo gushyingirwa bakiri bato cyane cyane ngo iyo bafite imyitwarire mibi cyangwa igihe batewe inda zitifuzwa.

Umukecuru Ayinkamiye Tamali utuye mu Kagali ka Rega, Umurenge wa Jenda ubwo yaganiraga na Makuruki yagize ati “Hari n’ufite na 16 na 17 kandi ari umudamu, barahari.Barahura gutyo bakamutera inda, ababyeyi bakamubwira bati genda ku waguteye iyo nda...iyo yemeranyije n’umusore barabana, upfa kubona umukobwa wawe akuviriye mu nzu akabana n’umugabo we neza.”

Meya Uwanzwenuwe avuga ko kuba hari abana bashyingirwa ntibikumirwe ari uburangare bw’ubuyobozi bw’inzego z’ibanze , asaba ko bikosorwa.

Ubushakashatsi ku mibereho y’ingo bwakoze n’Ikigo cy’igihugu gishinzwe ibarurishamibare mu mwaka wa 2014/2015 bwagaragaje ko 6 % y’abana bari hagati y’imyaka 15-19 mu Karere ka Nyabihu babyaye, mu gihe ku rwego rw’igihugu abana b’icyo kigero babyaye ari 7 %.

Yisangize Inshuti.

Ibitekerezo

Tanga Igitekerezo