RGB ngo ntizategereza igihe cyo guhana ngo abanyarwanda barye ibisukuye

Umuyobozi Mukuru w’Urwego rw’igihugu rushinzwe imiyoborere (RGB) yasabye abatanga serivise gukurikiza gahunda ya NK’UWIKORERA badategereje igihe cyo gusabirwa ibihano.

Gahunda ya NK’UWIKORERA ni gahunda yo kunoza imitangire ya Serivise. Iyi gahunda imaze ibyumweru bitatu. Icyumweru cya mbere cyahariwe gahunda zo kunoza imitangire ya serivise zihabwa abacitse ku icumu batishoboye.

Icyumweru cya kabiri cyari cyahariwe Kwibuka. Iyi gahunda ubu igeze mu cyumweru cya gatatu ubu hagezweho kunoza imitangire ya serivise ku buzima.

Hazibandwa cyane ku isuku ku hantu hatandukanye hatangirwa serivise harimo n’abacuruza ibiribwa n’ibinyobwa.

Gahunda ya NK’UWIKORERA ije kunganira indi gahunda yari isanzweho ya NA YOMBI, zombi zikaba zizuzuzanya mu guhwiturira Abanyarwanda kunoza serivise batanga.

Prof Shyaka Anasthase yavuze ko iyi gahunda izaba umusemburo w’impinduka mu gutanga serivise.

Ati "Iyi gahunda tuyitezeho kuba umusemburo w’impinduka zihutisha imitangire ya serivise mu byiciro bitandukanye. Mwari mumenyereye Na Yombi izi gahunda ntimunagire ngo zirabusanye, zirajyanye, ziruzuzanya.”

Prof Shyaka avuga ko bazazenguruka mu nzego zitandukanye bakangurirwa iyi gahunda berekwa ibyo bagomba gukosora. Uyu muyobozi ariko avuga ko mu igenzura rizakorwa bazashyira imbere cyane ubujyanama batanga inama aho basanze bitameze neza.


Prof Shyaka Anasthase mu kiganiro yahaye itangazamakuru

Icyakora Shyaka yavuze ko umuntu uzinangira azasabirwa ibihano. Yagize ati "Ntabwo dufite inshingano zo guhana no gusaba ibihano gusa , nta n’ubwo aribyo twimirije imbere. Hari ubwo usanga bitagenze neza kuko abantu batabitekereje mbere turabanza tukabibereke, tukabagira inama.Turibwira ko ubujyana bwakagombye kuba buhagije, ariko abazajya bagaragara ko inama twabagiriye batazumvise cyangwa bahinduye bicye ubwo icyiciro kizakurikiraho itegeko riduha uburenganzira bwo gusaba ibihano.”

Prof Shayaka ariko avuga ko bitakagombye ko bigera mu cyiciro cy’ibihano kugirango abantu barire ahantu hafite isuku cyangwa babone n’izindi serivise zinoze.

Ati "...Ntabwo tuzategereza ibihano kugirango abanyarwanda babone aho bahahira hari isuku cyangwa se bajya kugura amafunguro ku mafaranga yabo, byakagombye kuba tutiriwe tugera aho ngaho. “

Buri cyumweru uru rwego rugena icyiciro iyi gahunda irakomerezamo. Icyumweru gitaha kizaba ari icya kane, bazafatanya na Minisiteri y’ubutegetsi bw’igihugu gusuzuma imitangire ya serivise muri gahunda za VUP.



Amafoto ya bimwe mu bice by’akabari kasuwe muri Kimironko

Abacuruza imyaka mu masoko nabo barasabwa isuku ihagije

Yisangize Inshuti.

Ibitekerezo

Tanga Igitekerezo