Mushubi: Barifuza ivuriro rifite ubushobozi bwisumbuye mu kubyaza, bagakira umunaniro

Ababyeyi babyarira ku kigo nderabuzima cya Mushubi mu karere ka Nyamagabe barasaba ko iri vuriro ryongererwa ubushobozi bwo kubyaza kuko ngo hari n’abashobora kuburira ubuzima mu rugendo rugoranye bakora bagana ku bitaro mu gihe iki kigo nderabuzima cyabananiwe.

Mushubi ni umwe mu mirenge iri kure y’akarere ka Nyamagabe kuvayo uza mu mujyi bigufata igihe cy’amasaha atari munsi ya 3 . Ikindi kandi ni uko imihanda ijyayo idakoze neza.

Iyo ugeze ahitwa mu Gasarenda ufata umuhanda w’igitaka ari nawo utwara igihe kinini. Ubwo twajyagayo ku masaha y’umugoroba mu kabwibwi, twahasanze abagore barimo abifashe ku matama bibaza igihe imbangukiragutabara yajyanye umubyeyi ku bitaro bya Kaduha igarukira ngo nabo uwo baherekeje uri ku nda kandi ikigo nderabuzima cyananiwe ajyanwe ku bitaro.

Bivugwa ko iyi mbangukiragutabara bishobora gufata amasaha nka 5 mu rugendo rwo kuva I Mushubi ijya ku Kigeme cyangwa I Kaduha ku bitaro no kugaruka gutwara umurwayi.

Aba babyeyi bavuga ko iki gihe kingana gutya cyatuma bamwe mu babyeyi baza kubyara Babura ubuzima bataragezwa ku bitaro. Icyifuzo cyabo ngo ni uko iri vuriro ryakongererwa ubushobozi bwo kubyaza.

Bamwe mu baganiriye na Makuruki bagize bati bati:” biragorana nyine kubera ko ari kure, umubyeyi agerayo yarushye. Ni ukujya ku Kigeme cyangwa akajya I Kaduha, ibyiza rero tubonye irindi vuriro hano hafi byaba ari byiza. Habaho ubwo agerayo yavunaguritse cyangwa se byamutera n’ibibazo kubera kuva kure”

Undi nawe ati:” ikifuzo jyewe natanga ni uko batwongerera ivuriro aha hafi unaniwe hano bagahita bamujyana ntajye ku Kigeme cyangwa I Kaduha kuko ni kure”

Uyu nawe yagize ati:"Unaniwe hano ajya I Kaduha cyangwa ku Kigeme , ahagera byamugoye, ni kure cyane rwose. Dukoresha nk’amasaha atatu rero iyo ambulance yajyanye undi usigaye arananirwa cyane, rero mutwunganire muduhe ivuriro rindi ”

Ubuyobozi bw’ikigo nderabuzima cya Mushubi bwo buvuga ko ikibazo gikomeye atari ubushobozi buke bw’ivuriro ahubwo ngo ni umuhanda mubi uva aho iki kigo cyubatse ugana ku bitaro bicyegereye.

Mukabaganwa Epiphanie uyobora iki kigo nderabuzima cya Mushubi avuga ko iki ari ikibazo cyamenyeshejwe ubuyobozi burimo n’ubw’akarere kandi ngo hari icyizere ko kitazatinda gukemuka.

Ati :” ntabwo ikibazo ari uko I Kaduha cyangwa ku Kigeme ari kure ahubwo ikibazo ni umuhanda ,kuva hano ujya I Kaduha hari ibirometero 26. Ikibazo cya Kaduha ni ikibazo cy’umuhanda nta kindi nah’ubundi si kure. Ndumva rero akarere kabizi umuhanda ujyayo bari kuwushyira mu ngengo y’imari kuko barabizi tujya tubahamagara kenshi imodoka yagize ikibazo, nta modoka ikoramo inshuro ebyiri itagiye mu igaraje .”

Mushubi ni ikigo nderabuzima cyemeza ko cyakira abagore babyara batari munsi ya 50 buri kwezi. Ibitaro cyoherezaho abo cyananiwe ni Kaduha cyangwa se Kigeme aha hombi bifata imbangukiragutabara nibura amasaha 3 ngo ihagere.

Yisangize Inshuti.

Ibitekerezo

Tanga Igitekerezo