Musanze: Bamwe mu baturage basigaye barimuriye indaro ku bitaro

Bamwe mu baturage bavuga ko bibasaba kurara ku bitaro kugira ngo babashe kubona Mituweli

Bamwe mu baturage bagana ikigo nderabuzima cya Muhoza giherereye mu murenge wa Muhoza, mu karere ka Musanze, baravuga ko bahangayikishijwe no kuba basigaye barara ku bitaro kugira ngo babone ikarita y’ububwisungane mu kwivuza (Mituelle de Sante) ndetse ngo abandi bikabasaba kurara mu nzira bagenda kugira ngo bahagere kare.

Aba baturage bavuga ko impamvu ituma barara ku bitaro ndetse abandi bagatema ijoro bajyayo, ngo babiterwa n’uko kugira ngo ubone ikarita y’ubwisungane bigusaba kuba ufite nimero yo kwinjiriraho, bityo ngo bikaba bibasaba kuharara kugira ngo bafate nimero za hafi.

Ubwo twageraga ku kigo nderabuzima cya Muhoza mu ma saha ya saa kumi n’imwe za mugitondo, twahasanze abaturage babarirwa nko muri 200 bose bavuga ko baharaye ndetse abandi ngo bakahazindukira kugira ngo bakunde bafate nimero za hafi, dore ko ngo abantu 80 ari bo berewe gukorerwa amakarita y’ubwisungane ku munsi.

Mugabo JMV yagize ati: “Naje saa kumi, abakoresha banjye ni bo naje gufatira nimero kuko bambwiye ngo nze mbafatire nimero.”

Undi muturage nawe yagize ati: “Utaje nijoro ntabwo ushobora kubona mituweli kubera ko turara amajoro kugira ngo dutonde umurongo. Nk’ubu nijoro nazanye n’umumotari nari nkoze impanuka mu muhanda, naje saa yine (z’ijoro) sinariye, ejo nabyutse saa cyenda nza hano nsanga ngo naje umunsi w’umudugudu utari uwanjye nsubirayo nirirwa mu kazi sinigeze ndyama, sinigeze narya nijoro, nacunganye n’uko saa yine zigera nkaza gutonda umurongo.”

Yakomeje agira ati: “Abagore bari guta mu buriri abagabo bakaza hano gutonda imirongo kandi ndwaye ubu ntibamvura kubera ko nta mituweli mfite, yararangiye kandi narishyuye mu kwezi gushize.”

Ubuyobozi bw’ikigo nderabuzima cya Muhoza, bwemeza ko na bwo bubangamiwe bikomeye n’iki kibazo cy’abaturage barara ku bitaro baje gushaka ikarita ya mituweli, bukemeza ko biterwa n’uko iri vuriro rifite umubare muke w’abakora muri iyi serivisi (Mituweli), bityo ngo bakaba bagiye kuvugana n’ikigo cy’igihugu cy’ubwiteganyirize (RSSB) kinafite mu nshingano servise ya Mituweli kugira ngo kibe cyakongera umubare w’abakozi bakora muri iyi serivisi kuri iri vuriro.

Nirere Leopold, umuyobozi w’ikigo nderabuzima cya Muhoza aganira na Makuruki.rw yagize ati: “ Murabizi ko Mituweli ubu ngubu yagiye mu kigo cya RSSB, tugiye kongera kuvugana na bo kuko ubu dufite abakozi bagera muri 6 bakoraga muri Mituweli kugira ngo bafashe abaturage, ariko tugiye kubasaba ko batwongerera abakozi hanyuma natwe icyo turi bukore kindi ni uko turi bwongere ibyumba byo gukoreramo kugira ngo serivisi zihute.”

Uyu muyobozi avuga ko uretse abo bakozi 6 babihuguriwe bakora muri iyi serivisi, ngo hari n’abajyanama b’ubuzima bakorera kuri ibi bitaro kugira ngo bafashe aba bakozi gukorera vuba abaturage amakarita y’ubwisungane mu kwivuza.

Ikibazo cyo gutinda kubona amakarita y’ubwisungane mu kwivuza si kuri iki kigo nderabuzima kiri gusa, ariko umwihariko w’aha ni uko abaturage barara ku bitaro abandi bakarara bagenda ijoro kugira ngo babashe kugira amahirwe yo kubona ayo makarita.

Yisangize Inshuti.

Ibitekerezo

Tanga Igitekerezo