Minisante yamaganiye kure abavuga ko Coartem itakivura Maraliya

Minisiteri y’Ubuzima (Minisante) yatangaje ko itemeranya n’abantu bavuga ko imiti ya Coartem itakibavura maraliya nyuma y’aho hari abarwayi batandukanye bagiye bavuga ko bahawe iyo miti ariko ntigire icyo ibamarira.

Mu Kiganiro n’abanyamakuru cyabaye kuri uyu wakabiri tariki 14 Kamena 2016, Minisiteri y’Ubuzima yagaragaje ko kuva muri 2012 indwara ya maralia yiyongereye ku kigero cya 300% ndetse imfu ziyikomokaho ziyongera ku kigero cya 37%.

Uku kwiyongera kwa maraliya ahanini kwaturutse ku nzitiramubu zitujuje ubuziranenge zatanzwe na Minisiteri y’Ubuzima zigatuma imibu yirara mu baturage ikabatera maraliya.

Hari n’abandi barwayi kandi bavuga ko bagiye bapimwa indwara ya maraliya ndetse bakayisanganwa ariko bahabwa imiti ya Coartem ntibakire maraliya bakavuga ko itagifite ubushobozi bwo kuvura maraliya.

Ibi Minisititiri w’Ubuzima Dr. Agnes Binagwaho yabihakanye avuga ko kugeza ubu imiti ivura maraliya itangwa mu Rwanda ifite ubushobozi bwo kuvura indwara avuga ko ibindi byaba biterwa n’abantu batinya kunywa imiti.

Yagize ati “kugeza ubu nta gucika intege kw’imiti ivura maraliya guhari mu Rwanda, gusa ubu hari abantu batanywa imiti bitewe nuko bayitinya kugeza aho maraliya ishobora kubatera umutwe, hari abantu bafite intinyi yo kunywa imiti bigatuma batayirangiza.

N’ubwo hari aho maraliya yagaragaye kubera inzitiramibu zitujuje ubuziranenge zahawe abaturage, Minisante ivuga ko hari n’abanyarwanda bakigaragaza kutagira ubushake mu kuyirwanya ari na ho ibasaba kurwanya imibu barara mu nzitiramibu, kwivuriza ku gihe ndetse bagatanga ubwisungane mu kwivuza hakiri kare.

Minisiteri y’ubuzima igaragaza ko mu mezi atandatu gusa y’umwaka wa 2016 hagaragaye ubwiyongere bw’abarwara maraliya aho abagera kuri 1.353.861 bagaragaweho na yo igahitana abagera kuri 243 mugihe mu mwaka wari wabanje wa 2015 abagaragaweho n’iyi ndwara bageraga kuri 2 456 091 naho 489 bagahitanwa na yo.

Yisangize Inshuti.

Ibitekerezo

Tanga Igitekerezo