Mifotra yasobanuye impamvu umugore wabyaye ataratangira kubona ibyo yemerewe

1

Nyuma y’uko benshi bagiye bibaza impamvu yateye kudakurikizwa kw’itegeko ryatowe rigenga ibigenerwa umugore uri mu kiruhuko cyo kubyara, kuri ubu Ministeri y’abakozi ba Leta n’umurimo yasobanuye impamvu yatumye ridakurikizwa rikimara gusohoka.

Ingingo ya 21 y’Itegeko n°003/2016 ryo kuwa 30/03/2016 rishyiraho rikanagena imitunganyirize y’ubwishingizi bw’ibigenerwa umugore uri mu kiruhuko cyo kubyara ivuga ko ritangira gukurikizwa rikimara gusohoka mu Igazeti ya Leta ya Repubulika y’u Rwanda.

Iryo tegeko ryasohotse mu Igazeti ya Leta tariki ya 20 Mata 2016, nyamara magingo aya iryo teka ntiriratangira gukurikizwa.

Mifotra yatangaje ko hari andi mateka ya Minisitiri (Ministerial orders) agomba kugena uko zimwe mu ngingo z’iri Tegeko zizashyirwa mu bikorwa kandi ayo Mateka akaba akinozwa mbere yo gusohoka.

Muri ayo Mateka agitegerejwe harimo Iteka rya Minisitiri rigena uko kwiyandikisha mu birebana n’ubwishingizi bw’ibigenerwa umugore uri mu kiruhuko cyo kubyara bikorwa, Iteka rya Minisitiri rigena ibikubiye mu mushahara mbumbe ubarirwaho umusanzu, Iteka rya Minisitiri rigena uko imenyekanisha n’iyishyurwa ry’umusanzu bikorwa , Iteka rya Minisitiri rigena uko ibihano byo kudatanga umusanzu ku gihe bitangwa ndetse n’Iteka rya Minisitiri rigena uko uburyo bwo kwishyura ibigenerwa umugore uri mu kiruhuko cyo kubyara bushyirwaho .

Itegeko riviga ko umukozi azajya atanga 0.3 by’umushahara we, umukoresha agatanga nawe agatanga 0.3.

Ibikubiye muri iri tegeko rigenga ibigenerwa umugore uri mu kiruhuko cyo kubyara bigomba gutangira gukurikizwa ari uko ayo mateka yavuzwe haruguru yasohotse.

Iri tegeko rireba abakozi bose muri rusange baba abagengwa na Sitati rusange igenga Abakozi ba Leta na Sitati zihariye cyangwa abagengwa n’Itegeko ry’umurimo mu Rwanda hatitawe ku bwenegihugu bwabo. Rinareba kandi abanyapolitiki ndetse n’abakozi b’abanyamahanga boherejwe n’ibigo byabo gukorera mu Rwanda mu gihe imirimo bakora izarenza amezi 12.

Ubusanzwe Amategeko agenga abakozi mu Rwanda ateganya ko abagore bari mu kiruhuko cyo kubyara bakomeza guhembwa umushahara wose mu gihe cy’ibyumweru bitandatu gusa, ibindi byumweru bitandatu bisigaye bagahembwa 20% by’umushara wabo cyangwa bagahitamo gusubira ku kazi.

Yisangize Inshuti.

Ibitekerezo 1

  1. ibi ariko sibyo kuko abakorera muri za entreprises privees bahombya bene zo igihe bamara amezi 3

Tanga Igitekerezo