Intara y’amajyepfo izahajwe na Maraliya kurusha izindi

Ikigo cy’igihugu gishinzwe kwita ku buzima (RBC) kiratangazako Intara y’Amajyepfo ari yo yibasiwe n’indwara ya Maralia kurusha izindi ntara zose mu gihugu.

Kuri uyu wa Gatatu nibwo u Rwanda rwihizije umunsi mpuzamahanga wahariwe kurwanya maraliya, ubusanzwe wizihizwa tariki 25 Mata buri mwaka. Uyu munsi wizihirijwe mu karere ka Huye mu murenge wa Simbi.

Aka karere ka Huye kizihirijwemo uyu munsi kari mu turere turwaza Maraliya cyane mu gihugu cyose. Umuyobozi w’aka karere Muzuka Eugene avuga ko imirenge ituriye ibishanga ariyo yibasiwe cyane na maraliya.

Ati :”Tumaze iminsi duhanganye n’ibibazo bya malaria byagiye byigaragaza mu mirenge imwe n’imwe cyane cyane iyegereye ibishanga ariko nk’uko mu bizi gahunda y’igihugu yo kurwanya maraliya natwe abajyanama b’ubuzima bayimazemo iminsi cyane.”

Uyu muyobozi ariko avuga ko ibishanga bitakabaye ikibazo kuko aribyo bitunze abaturage gusa ariko ngo bagiye kongera uburyo bwo kurwanya iyi ndwara.

Ati :”Kuba akarere gakikijwe n’ibishanga ahubwo twe tubibonamo akamaro gakomeye cyane kuko biriya bishanga nibyo bibatunze, ahubwo icyo tugomba gukora ni ukuvuga tuti ese ibishanga ubundi byakabaye aribyo bibangamira imiturire . Ese ibishanga byakabaye aribyo bikurura amaraliya? birashoboka ko imibu ishobora kwihisha muri ibyo bishanga ariko kurara mu nzitiramibu ni inzira ya mbere ifatika ituma itakugeraho ngo ikurye.”

Dr Condo Jeaninne uyobora ishami rishinzwe kurwanya maraliya mu kigo cy’igihugu cy’ubuzima (RBC) na we avuga ko muri iyi minsi mu Rwanda maraliya yiyongereye kandi ko intara y’amajyepfo ari yo iyirwaje cyane

Ati :”Uyu munsi mu Rwanda maraliya ni indwara ifata abantu benshi cyane, umuntu umwe mu bantu babiri arwaye maraliya. Guverinoma yacu yashyizeho uyu munsi wo kurwanya maraliya ko ubera mu ntara y’amajyepfo kubera ko ariho maraliya yagaragaye cyane kurusha ahandi. Mu kwezi kwa gatatu gushize mu turere icumi twarwaje marariya cyane uturere 6 twose ni utwo mu ntara y’amajyepho aritwo Huye, Nyanza , Ruhango, Kamonyi, Muhanga na Nyaruguru.”

Dr Condo ariko avuga ko Leta y’u Rwanda biciye muri MINISANTE na RBC biyemeje guhashya iyi ndwara bashyiraho ingamba ziyikumira.

Ati :”Minisiteri y’ubuzima ifatanyije na RBC yashyizeho ingamba zitandukanye zo kurwanya maraliya mu gihugu cyacu arizo: gutanga inzitiramibu ku buntu kandi kuri bose, kuvura abaturage mu mudugudu, kuvura abakene ku buntu, gutera umuti wica umubu n’izindi.”

Mu Rwanda amavuriro yakira abantu bagera ku bihumbi 350 buri kwezi barwaye maraliya mu gihugu hose. Muri abo, Akarere ka Huye gafitemo abakabakaba ibihumbi 60.

Huye, Nyanza , Gisagara, Ngoma na Kayonza nitwo turere tuzahajwe na maraliya cyane kurusha utundi mu Rwanda hose.

Yisangize Inshuti.

Ibitekerezo

Tanga Igitekerezo