Icyemezo cyo kuvuza abakene ku buntu nticyahubukiwe-Minisitiri Gashumba

1

Minisitri w’ubuzima Dr Gashumba Diane yavuze ko n’ubwo icyemezo cyo kuvuza abakene Maraliya ku buntu cyafashwe hagati mu ngengo y’imari ngo nticyahubukiwe kuko Minisiteri y’Imari n’Igenimigambi yiteguye neza kugishyira mu bikorwa.

Inama y’abaminisitiri yo kuwa 11 Ugushyingo 2016 iherutse gufata icyemezo cyo kuvuza Malariya ku buntu Abanyarwanda bari mu cyiciro cya mbere n’icya kabiri by’Ubudehe.

Icyemezo ariko cyafashwe hagati mu mwaka w’ingego y’imari kuburyo hashobora kwibazwa niba bitazahungabanya ingengo y’imari cyangwa kikanatwara amafaranga menshi kandi atarateguwe.

Gusa Minisiteri y’ubuzima ivuga ko leta itahubutse ijya gufata iki cyemezo kuko cyari kimaze igihe kiganirwaho n’inzego bireba.

Mu kiganiro n’abanyamakuru kuri uyu wa Gatatu, Ministiri w’ubuzima Dr Diane Gashumba yagize ati:”Kuba bifashwe hagati mu mwaka ntabwo bivuze ko abantu babihubukiye ahubwo hashize igihe abantu bakora inyigo hamwe na Minisiteri y’imari n’igenamigambi na Minisiteri y’ubuzima n’ibitaro n’ubuyobozi bw’inzego z’ibanze. Kugirango turebe ese iki cyemezo kizaramira iki.”

Minisitiri Gashumba avuga ko iki cyemezo kizaramira ubuzima bw’Abanyarwanda ariko kandi ngo kikanagabanya amafaranga yagenda ku ndembe za maraliya.

Ati:”Kizaramira ubuzima bw’Abanyarwanda, kizagabanya abanduraga, kizagabanya abajyaga ku bitaro byisumbuye , kizatugabanyiriza amafaranga twatangaga muri za Ambulance, kizatugabanyiriza kandi imiti ihenze twaguraga mu gihe abantu barembye ndetse n’umubare w’abantu bavurwaga, kuko niba umuntu avuwe vuba agahita ahabwa imiti bizamurinda kujya kwanduza abandi.”

Minisitiri akomeza avuga ko nta cyuho kizaterwa n’iki cyemezo ariko kandi ngo niyo cyaba Minecofin iriteguye.

Ati:”Mu by’ukuri nta cyuho kizabamo niyo kandi cyaramuka kibaye minisiteri y’imari n’igenamigambi yariteguye cyane ku buryo ni icyemezo kizashyirwa mu bikorwa neza kandi kiramire abanyarwanda .”

Minisitiri Dr Gashumba Diane yavuze ko nta ngengo y’imari iziyongera kubera iki cyemezo kuko abarwayi ahubwo bazarushaho kugabanuka kuko uzajya afatwa azajya avurwa vuba atanduje abandi ngo abarwayi babe benshi.

Ministeri y’ubuzima yongeye kandi gukangurira abanyarwanda kurushaho gukaza gahunda zo kwirinda maraliya kuko ngo ibi bihe aribyo maraliya yanduramo cyane bitewe n’imihindagurikire y’ikirere.

Yisangize Inshuti.

Ibitekerezo 1

  1. Nibyo koko,erega reta yacu n,umubyeyi.ibi bizagabanura n,impfu zahato nahato zashoboraga guterwa n,amarariya.doreko hari nababuraga ubushobozi bagasangira kuriyimiti.

Tanga Igitekerezo