Gicumbi: Batewe impungenge n’ubumamyi bw’amata akemangwa ubuziranenge

2

Muri iyi minsi, mu karere ka Gicumbi hari kugenda havugwa ubwiyongere bw’abantu bagenda bagura amata hirya no hino mu mirenge y’akarere ka Gicumbi, bakayagura n’abaturage bakayacuruza atanyuze mu makusanirizo bityo ubuziranenge bwayo bukaba bukemangwa. Ubuyobozi bw’akarere ka Gicumbi bukaba busaba buri wese kurwanya ubu bucuruzi bwa magendu y’amata kuko ngo butubahirije amategeko.

Ubu bucuruzi bushingiye ku kurangura amata y’aborozi hirya no hino mu karere ka Gicumbi atabanje guca mu makusanyirizo ngo apimwe ubuziranenge.

Bamwe mu borozi b’aka karere baganiriye na Makuruki.rw bavuga ko ubu bucuruzi bw’amata adapimye bubabateye impungenge kuko ngo barakeka ko ashobora kuba nyirabayazana w’indwara zimwe na zimwe ndetse bikaba byaha n’isura mbi amata yose akomoka muri aka karere ka Gicumbi muri rusange.

Umworozi witwa Twagirayezu Jean Claude avuga ko hatagize igikorwa ngo ibi bikorwa by’ubumamyi bw’amata bikumirwe, bishobora kuzagira ingaruka mbi.

Yagize ati: “Ubundi twe tubanza gutegura aho dukura amata, twegera aborozi tukareba isuku y’amata, aho bakamira tukabaha inama noneho tugasuzuma uburyo abacunda bazanamo amata, noneho ibyo byose iyo tumaze kubikora tuyabuganiza mu byuma byabugenewe, tugakonjesha tukareba ko nta bisigazwa by’imiti biri mu mata, iyo tumaze kubona nta miti irimo amata tuyashyira ku isoko”.

Twagirayezu kandi akomeza avuga ko ibi bikorwa byo gucuruza amata adapimye bidahagaritswe ngo bishobora gutuma aborozi badatera imbere bitewe no guhabwa amafaranga make kandi mu ntoki n’abo we yise abamamyi b’amata.

Yagize ati: “Akajagari kari mu mata k’abamamyi baza basanga aborozi ku muhanda, babaha amafaranga mu ntoki, hari ubundi buryo bakoresha kugira ngo babone amata kandi icyo kintu cyica system y’amata”.

Ibi bikorwa kandi ngo bishobora kuba ku isonga mu bitesha agaciro amata aturuka mu karere ka Gicumbi yoherezwa hirya no hino mu gihugu anyuze mu makusanirizo kuko hari abashobora kuyitiranya n’ayabo bamamyi, nk’uko bivugwa na Mukangiruwonsanga Agnes, umuyobozi wa koperative y’aborozi b’inka za kijyambere IAKIB mu karere ka Gicumbi.

Yagize ati: “Ashobora kuba Atari n’amata ari ayera, wenda niba aguze igicuba cya litilo 40 z’amata akongeramo litiro 20 z’amazi, ubuse uravuga ngo ayo ni amata? Niyo mpamvu rero umuti nta wundi ni uko amata yose anyuzwa kumakusanyirizo, noneho na ba bamamyi bakaza ku makusanyirizo tukabaha amata, kuko niba tutabizeye na we azazana cash nkuko aziha abaturage tumuhe amata mazima yere kujya kuroga abaturage, atware amata meza kandi yizewe”.

Nubwo ibi biri gukorwa ariko ngo itegeko rigena uburyo amata atwarwamo, uko agurwa n’uko acuruzwa ryamaze gusohoka ubuyobozi bw’akarere ka Gicumbi bukaba ngo buri muri gahunda yo gukangurira buri wese gushyira mu bikorwa ibyo iryo tegeko rivuga nk’uko bivugwa na Murindangabo Yves Theoneste, umukozi w’akarere ka Gicumbi ushinzwe ubuhinzi, ubworozi n’umutungo kamere.

Yagize ati: ”Ingamba zirahari zikomeye cyane, nta kwezi n’igice kurashira hasobanuwe iby’iryo tegeko, ingamba zirahari n’ubundi ni ubukangurambaga budashobora gukorwa n’akarere gusa ahubwo buri muntu wese ashobora kugiramo uruhare, mpereye kuri mwe abanyamakuru mwumva n’abantu benshi n’abandi bantu, mu by’ukuri ikintu gikomeye cyane n’ubukangurambaga bukomeje”.

Akarere ka Gicumbi kabarirwa mu turere dufite umusaruro mwinshi w’amata muri iki gihugu kuko kabarirwa muri litiro 65,000 zijyanwa ku isoko buri munsi.

Niyo mpamvu aborozi bo muri aka karere bavuga ko hakwiye gukazwa uburyo bwo kurwanya abacuruza amata adapimye kugirango atazabonekaho inenge bikabicira isoko.


aborozi b’inka batewe impungenge n’abamamyi b’amata

NDARISABAMUNGU Paul Clement

MAKURUKI.RW

Yisangize Inshuti.

Ibitekerezo 2

  1. Ni uko mutagenda uzasure MCC Manyagiro ya koperative IAKIB .Nta muriro igira ariko yakira L 7000 mu gitondo gusa kandi ikagira amata meza cyane!

Tanga Igitekerezo