Gasabo: Birirwa baryamye munsi y’ibiti bategereje kuvurwa bukabiriraho

Bamwe mu baturage batuye mu murenge wa Nduba, akarere ka Gasabo, umujyi wa Kigali baranenga bikomeye servise zitangirwa kuri poste de Sante ya Gasanze, aho bavuga ko kuba iri vuriro ngo rifite umuganga umwe ndetse n’ibikoresho bidahagije, bituma umuntu ashobora kumara iminsi irenze ibiri ataravurwa kabone n’ubwo ngo yaba arembye cyane.

Mu rwego rwo korohereza abaturage kubona ubuvuzi mu buryo buboroheye, Leta y’u Rwanda ibinyujije muri Minisiteri y’ubuzima, yashyizeho amavuriro aciriritse (Poste de Sante) mu giturage aho abaturage bahererwa ubuvuzi bw’ibanze ku ndwara baba barwaye.

Gusa nubwo bimeze gutyo ariko, hari uduce tumwe na tumwe dufite amavuriro nk’ayo ariko kugeza ubu abaturage bayagana ugasanga bavuga ko afite imikorere idahwitse kubera ubushobozi bucye, ibikoresho bidahagije ndetse n’ibindi.

Urugero ni urw’abivuriza kuri poste de santé y’ I Gasanze, mu murenge wa Nduba, bavuga ko kubonera servise muri iri vuriro bibona umugabo bigasiba undi.

Tugireyezu Aroni umwe mu baturage bahivuriza, avuga ko bisaba kurara amajoro kugira ngo batanguranwe numero za mbere. Avuga ko iyo bamaze kubona izo nimero ngo usanga bajya kwiryamira munsi y’ibiti biri aho kugeza bubiriyeho rimwe na rimwe ngo ugasanga batashye batanavuwe.

Yagize ati:” Hano hari umuganga umwe gusa, nta bikoresho bihagije bagira, ubu se urambwira ko ubuvuzi bw’aha bumeze gute koko? Niba bishoboka bakongera umubare w’abaganga ndetse bakanazana ibikoresho bihagije bitabaye ibyo, abaturage bazashira.”

Aba baturage bavuga ko kubera umubare munini w’abarwayi baza kwivuriza kuri iri vuriro rifite umuganga ubitaho bose, ngo bituma bagira impungenge z’uburyo uyu nawe abakira, aho bavuga ko bitumvikana uburyo umuntu umwe yakwakira abantu bangana gutyo atanaruhuka kugeza umunsi urangiye undi ugataha.

Mu gushaka kumenya icyo ubuyobozi bw’akarere ka Gasabo buvuga kuri iki kibazo, Makuruki.rw yavuganye na Madame Nyirabahire Languida ushinzwe imibereho myiza y’abaturage muri aka karere maze avuga ko ibyo abo baturage bavuga n’ubusanzwe ngo akarere gasanzwe kabizi.

Uyu muyobozi avuga ko mu mabwiriza ya Minisiteri y’ubuzima bahawe harimo ko poste de santé zigomba gukorwamo n’umuganga umwe wo ku rwego rwa A2, bityo ngo izi poste de santé icyo zitanga ni ubuvuzi bw’ibanze bityo ko abaturage bagomba kujya bajya ku bigo nderabuzima nkuko bisanzwe.

Yagize ati:” Ni imyumvire y’abaturage kuko bumva ko iyo poste de santé bagomba kuboneramo ibyo bakeneye byose ntabwo byashoboka. Ikihatangirwa ni ubuvuzi bw’ibanze naho ubundi baba bagomba kujya ku kigo nderabuzima.”

Akomeza avuga ko bishoboka ko abaganga bashobora kongerwa mu gihe iyo poste de santé igaragaje ko ifite ubushobozi bwo kubihembera.

Nubwo aba baturage bagaragaza izo mbogamizi zose, ku rundi ruhande ntawakwirengagiza ko izi poste de santé hari byinshi zakemuye nko kuba abaturage batagikora urugendo rurerure bajya kwivuza mu gihe bafashwe n’indwara kuburyo butunguranye.


Uku niko baba bameze iyo bategereje


Abo byanze bajya kwiryamira mu nsi y’ibiti

Muneza Ferdinand

Makuruki.rw

Yisangize Inshuti.

Ibitekerezo

Tanga Igitekerezo