Gasabo: Amaze imyaka 5 avutse, ariko agaragara nk’uruhinja ruto

2

Uyu mwana yahuye n’uburwayi budasanzwe bwatumye adakura nkuko bisanzwe

Umuhoza Angelique, umwana w’umukobwa ufite uburwayi budasanzwe, ngo amaze imyaka itanu abonye izuba, gusa kubera ubwo burwayi bw’amayobera bwatumye kuri ubu agaragara nk’umwana w’uruhinja rumaze igihe gito ruvutse.

Uyu mwana w’umukobwa iyo umurebesheje amaso, ubona angana n’uruhinja rw’amezi abiri nyamara amaze imyaka itanu avutse.

Umubyeyi w’uyu mwana avuga ko atazi icyo umwana we yarwaye, dore ko nubwo ajya kwa muganga nta gisubizo bamuha kigaragaza indwara umwana we yaba arwaye.

Iyo ukuyemo uyu mwana imyambaro, ubona uruhu ari rwo rutwikiriye amagufa gusa kuko imbavu ushobora kuzibarisha amaso kimwe n’amagufa agize urutirigongo, ariko kandi ngo n’amaso ye ntabona.

Iyo umurebye mu maso ubona ko ari umwana ukuze, aho afite amenyo yose yewe n’ibijigo, ingingo ze zarahinamiranye cyane, kuburyo nta n’icyo ashobora kuzikoresha kuko atabasha guhagarara. Amaguru n’amaboko bye byaranyunyutse cyane ku buryo adashobora kubirambura.

Umubyeyi umubyara, Mukayiranga Julienne, utuye mu Mudugudu wa Muhororo, Akagali ka Kagugu, Umurenge wa Kinyinya mu Karere ka Gasabo, avuga ko atazi icyateye umwana we ubwo bumuga cyangwa uburwayi, dore ko yavutse ari umwana ushyitse ufite ibiro 3 n’amagarama 600.

Nyina w’uyu mwana kandi avuga ko uyu mwana arya biruhanyije cyane, kuburyo arya ibiryo byoroshye cyane kandi nabwo ngo bifata amasaha abiri kugira ngo arye abashe guhaga neza.

Uyu mubyeyi avuga ko n’umusarani w’uyu mwana uba umeze nk’amahurunguru bigaragara ko ifigu cye kidakora neza nkuko bikwiye.

Mukayiranga Julienne ubyara uyu mwana, avuga ko bagerageje kumuvuza, ariko abaganga bakagenda babohereza ku bitaro byisumbuye kugeza aho ubushobozi bubashiranye.

Uyu mubyeyi ubu akaba atabaza ngo bamufashe kuvuza abana be dore ko n’umwana ukurikira uyu, nawe yavutse ingingo ze zose z’umubiri zifatanye.

Nyuma yo kubona abana bagize uburwayi bumeze butyo, ngo umugabo wa Mukayiranga yaramutaye arigendera, amusigana abana batatu barimo abo babiri bafite ubwo burwayi.

Kugeza ubu uyu mubyeyi avuga ko amaze imyaka 4 avuza abana be, ariko ubu ubushobozi bukaba bumaze kumushirana, nyamara ngo yagerageje kwitabaza inzego zibanze kugeza ubu nta gisubizo gifatika ziramuha.

Yisangize Inshuti.

Ibitekerezo 2

Tanga Igitekerezo