Drones za mbere zamaze kugezwa mu Rwanda

3

Indege yazanye izo Drones

Indege nto zitwara zizwi nka Drones, zikoreshwa mu bikorwa by’ubuvuzi birimo kugeza amaraso ku barwayi bayakeneye mu mavuriro hirya no hino mu Rwanda, zatangiye kugezwa mu gihugu.

Ibi bibaye nyuma y’uko Guverinoma y’u Rwanda na Sosiyete ya Zipline International ifite uyu mushinga mu nshingano, bemeranyijwe gutangiza uyu mushinga cyane wibanda mu bice by’icyaro biba biruhanyije kugeramo.

Nkuko ikigo cy’Igihugu gishinzwe indege za gisivili (RCAA), cyabitangaje cyibinyujije ku rukuta rwacyo rwa Twitter, cyavuze ko ku nshuro ya mbere indege ebyiri za Drone zamaze kugezwa mu Rwanda mu rwego rwo gushyira mu bikorwa uyu mushinga wa Leta y’u Rwanda ndetse na sosiyete ya Zipline International.

Igeragezwa kuri izi ndege mu buvuzi mu gihugu cy’u Rwanda kinabaye icya mbere kuri uyu mugabane mu kugezwamo iyi gahunda, rizatangira muri uku kwezi, gusa nta gihindutse ubu buryo bwo gutanga ubufasha mu buvuze hifashishijwe izi ndege, bwazatangira gukoreshwa m’Ugushyingo uyu mwaka.

Biteganyijwe ko mu ntangiriro Zipline izazana drones ziri hagati ya 12 na 15 zizakorana n’ibigo nderabuzima bigera kuri 21 kuri 45 biri mu gihugu, ariko nyuma bikazagenda byiyongera.

Izo Drones zifite ubushobozi bwo gukora urugendo rungana n’ibirometero 150 kandi zigenda mu kirere zidahagaze. Drone imwe ifite ubushobozi bwo gutwara Kg 1,5 cy’amaraso.

Biteganyijwe ko drones zizajya ziba i Muhanga kuko ngo atari byiza ko ziba hafi y’ikibuga cy’indege zisanzwe. Aha I Muhanga ni ho hari kubakwa ikibuga utu tudege tuzajya tugwamo.

Uretse mu Rwanda, sosiyete ya Zipline International irateganya gutangiza uyu mushinga mu byaro byo muri Leta zunze ubumwe za Amerika. Biteganyijwe ko ku ikubitiro iyi kompanyi izatangiriza iyi gahunda mu ntara nka Maryland, Nevada na Washington.


RCAA yemeje ko izi ndege zamaze kugezwa mu Rwanda

Yisangize Inshuti.

Ibitekerezo 3

  1. iyi nkuru ko ibanza harimo amakosa.Ngo drone itwara ikiro kimwe?Ngo centre de sante ziri mu Rwanda ni 40 .Oya banza harimo kwibeshya

Tanga Igitekerezo