Akamaro ko kubyina mu buzima bwa muntu

1

Kubyina biraruhura, biranezeza, birashimisha....ariko si benshi babiha umwanya.Hari ababyina bahaze manyinya, hari ababyina bagize iminsi mikuru abandi bakabikora kuko babona abandi babikora gusa.

Ubushakashatsi butandukanye bwagaragaje ko kubyina ari umwitozo mwiza kandi ukomeye mu buzima bwa muntu, ukaba umuti utishyurwa ushobora gufata igihe cyose ushakiye, ukaba umuti utica.

Twifashishije ibinyamakuru bitandukanye nka Everydayhealth na Healthfitinessrevolution, twagukusanyirije imwe mu mimaro yo kubyina ku buzima bwawe.

Byongera umunezero

Ntawe ubyina ababaye kirazira.N’iyo wari ubabaye ugatangira kubyina, ugenda ubyibagirwa gahoro gahoro,ahari umubabaro hagasimburwa n’ibyishimo.

Binanura imitsi

Uko wiheta wihetura ubyina, niko imitsi yawe iba ibyungukiramo.Ntabwo uba ukibarizwa muri cya cyiciro cy’abarwayi ba za rubagimpande n’ibinya kuko imitsi yawe iba yarambutse.

Bikomeza amagufwa n’ingingo

Nko ku bantu bagize ikibazo cy’imvune no gukomereka, kubyina bifasha mu kongera kwisubiranya kw’amagufwa yatanye kandi bikagufasha guhora ukomeye.Ku bana bagikeneye gukura, bibafasha gukomera mu magufwa n’ingingo.

Ibiryo by’ubwonko

Ubwonko buri mu bice bya mbere by’umubiri wa muntu byungukira mu kubyina.Ibyishimo, ...byose bibonerwa mu kubyina bihera mu bwonko.Ubushakashatsi bwakozwe muri 2016 bugasohorwa mu kanyamakuru Frontiers in Aging Neuroscience, bwagaragaje ko kubyina bifasha abantu bafite ikibazo cyo kwibagirwa nk’abasaza, ubwonko bwabo bukaba mutaraga nkuko bwahoze mu busore.

Kugabanya umubyibuho

Kubyina ni umuti ukomeye wo kurwanya umubyibuho.Mu minota 30 ubyina, uba utwitse calories hagati ya 300-400 kandi tuzi ko nibura gutwika calories 300 ku munsi, bigufasha gutakaza amagarama 4 mu cyumweru.

Birwanya indwara z’umutima, ...

Kubyina bifite akamaro kanini mu kugabanya ibyago byo kurwara indwara z’umutima, umubyibuho ukabije, kongera ubushobozi bw’ibihaha, ..

Biguhuza n’abantu

Akenshi abantu bakunda kubyina ntibabyina bonyine.Bajya ahantu hari umuziki mu ruhame bakabyinana n’abandi.Biguha inshuti nshya kandi bikakuera n’isoko y’ibitekerezo bishya.

Yisangize Inshuti.

Ibitekerezo 1

Tanga Igitekerezo