Uturere twahawe gucunga amashuri y’imyuga, abayigamo bamererwa kwigira ubuntu

1

Minisiteri y’Uburezi yatangaje ko amashuri y’ubemenyi ngiro atari ku rwego rw’amashuri makuru (VTCS) agiye kwegurirwa Uturere tukaba aritwo tuyacunga, nkuko twari dusanzwe ducunga amashuri y’uburezi bw’ibanze bw’imyaka 12.

Guhera muri Nyakanga mu ngengo y’imari ya 2017/2018, amafaranga yifashishwa muri aya mashuri azashyirwa mu ngengo z’imari z’Uturere aho kuba ku ngengo y’imari y’Ikigo cy’igihugu gishinzwe amashuri y’ubumenyingiro (WDA).

Olivier Rwamukwaya, Umunyamabanga wa Leta Ushinzwe Amashuri y’imyuga n’Ubumenyingiro yavuze ko babyemeje mu nama bakoranye n’abayobozi b’Uturere bungirije bashinzwe imibereho myiza y’abaturage ndetse n’abayobozi b’uburezi mu Turere mu kwezi gushize.

Ati “Bishingiye kuri politiki yo kwegereza ubuyobozi n’ubushobozi abaturage. Indi mpamvu ni uko inshingano za WDA zavuguruwe maze igasigarana gusa ibirebana n’ubugenzuzi bw’amashuri y’imyuga n’ubumenyingiro ndetse no kwemerera abifuza gutangiza aya mashuri. Mbere yari ifite inshingano zo gucunga amashuri yose y’imyuga n’ubumenyingiro, no kuyakorera ubugenzuzi. Izi nshingano zaragonganaga, kuko byayigoraga kwigenzura.”

Hari umushinga w’itegeko rishyiraho ishuri rikuru ry’imyuga n’ubumenyingiro (Rwanda Polytechnic) rizaba rishinzwe kwigisha imyuga n’ubumenyingiro ku rwego rw’amashuri makuru,rukazahuza amashuri atandukanye yatangaga izo nyigisho kuri urwo rwego yitwa Polytechnics na IPRCs.

Minisiteri y’Uburezi ivuga ko bikwiye ko n’amashuri atari ku rwego rw’amashuri makuru agira urwego rushinzwe gusigara ruyareberera.

Bazigira ubuntu nk’abandi bose, kandi nabo boroherezwe gufatira ifunguro ku ishuri

Rwamukwaya yavuze ko hari haratangiye kugaragara ikibazo cy’uko ayo mashuri y’imyuga atitabirwa cyane. Mu igenzura bakoze basanze biterwa nuko abo bana basabwa kwiyishyurira, mu gihe mu mashuri asanzwe bigira ubuntu.

Ati “VTCs zajyaga zigira ikibazo cyo kutabona abanyeshuri kandi ari aya Leta. Wakurikirana ugasanga impamvu ari uko abo banyeshuri basabwa kwishyura .Turi muri gahunda y’uburezi bw’ibanze bw’imyaka 12 butangirwa buntu , kandi buriya muri gahunda y’imyaka 12 n’amashuri y’imyuga n’ubumenyingiro arimo, ntabwo uburezi bw’ibanze bw’imyaka 12 ari uburezi bw’inyigisho rusange gusa.”

Nk’uko Leta ifasha andi mashuri kugirango ashobore gukora, binyuze mu guhemba abarimu , gutanga amafaranga yo gufasha ishuri azwi nka “capitation grant”, amashuri y’ubumenyingiro nayo azajya afashwa.

Rwamukwaya ati ” Nta tegeko , nta bwiriza ryigeze ribuza abayobozi b’uturere gusabira aya mashuri y’imyuga ‘capitation grant’. Guhera muri Nyakanga 2017, abayobozi b’Uturere nayo bazajya bayasabira ibikenewe byose kugirango ashobore gukora neza, kuko mu by’ukuri abana biga muri ayo mashuri nabo biga mu mashuri ya Leta.”

Mu nkunga Leta isanzwe iha abanyeshuri batishoboye muri Gahunda yo kubagaburira ku ishuri, Rwamukwaya yavuze ko n’abo bo mu mashuri y’imyuga Leta izatangira kubafasha guhera mu ngengo y’imari izatangira muri Nyakanga uyu mwaka.

Minisiteri y’Uburezi yasabye abashinzwe uburezi ku turere n’Imirenge gufata amashuri y’imyuga nk’andi yose, haba mu kubakemurira ibibazo, mu igenzura n’ibindi.

Yisangize Inshuti.

Ibitekerezo 1

Tanga Igitekerezo