UR igiye gukusanya inkunga mu bayirangijemo biyifashe guhangana n’ubukene

Dr Charles Murigande ushinzwe iterambere rya Kaminuza y’u Rwanda

Ubuyobozi bwa Kaminuza y’u Rwanda (UR) bugiye gutangiza gahunda zitandukanye zo gukusanya amafaranga mu bantu bayirangijemo mu rwego rwo guhangana n’ikibazo cy’ubukungu bwayo bumaze iminsi butifashe neza.

Kaminuza y’u Rwanda imaze iminsi ivugwamo ubukene butuma abakozi bayo n’abanyeshuri bayigamo batabona ibyo bayikeneyeho nkuko bikwiye.

Abanyeshuri bayo bakuriweho bimwe mu byabafashaga kwiga neza nk’amafaranga abafasha mu gihe bimenyereza akazi ndetse n’abafasha mu gihe bakora ubushakashatsi busoza ibyiciro bitandukanye by’amashuri.

Mu minsi ishize nabwo abakozi bayo na bo byagiye bivugwa kenshi mu itangazamakuru ko badahemberwa igihe ababishinzwe bakagaragaza ko biterwa nuko muri Kaminuza hari ubukene.

Kuva muri 2013, Guverinoma y’u Rwanda yafashe icyemezo cyo kugabanya ingengo y’imari ishyirwa muri Kaminuza y’u Rwanda ku kigero cya 50%.

Dr. Rose Gasibirege, umuyobozi muri UR ushinzwe imibanire ya Kaminuza n’abayirangijemo yatangarije The New Times ko kaminuza igiye gutangiza gahunda zitandukanye zo gukusanya amafaranga mu bantu basaga 80,000 barangije muri UR kugirango bayifashe guhangana n’ibibazo by’ubukungu butifashe neza bimaze iminsi muri iyi kaminuza.

Dr Gasibirege avuga ko Kaminuza y’u Rwanda idakwiye gukena kandi ifite abantu bayirangijemo bashobora kuyitera inkunga bakayitura ubumenyi bayikuyemo ari na bwo bwabafashije gutera imbere.

Ati: " UR Nk’umubyeyi umaze kugira abana benshi, iki ni cyo gihe ngo bafashe kaminuza barangijemo, bararezwe none ubu byatumye baba abo baribo, ubu rero umubyeyi wabo (UR) akeneye inkunga yabo."

Dr. Gasibirege avuga ko mu gukusanya ayo mafaranga hazategurwa ibikorwa bitandukanye birimo ibiganiro bizatangirwa ku mashami atandukanye ya Kaminuza bitanzwe n’abayirangijemo. Hari kandi ibindi bikorwa bizakorwa birimo ibitaramo bigamije kuzamura impano, Gutegura amamurikagurisha azatumirwamo abashoramari barangije muri UR, n’ibindi bikorwa bigamije gutuma UR yiyegereza abayirangijemo.

Kwishyuza abarangije muri UR amafaranga yo kwinjira mu muryango uhuza abayirangijemo ( The Alumni Association) nabwo ngo ni bumwe mu buryo iyi Kaminuza izabasha kwinjiza amafaranga. Uyu muryango w’abarangije amashuri muri UR watangiye muri Werurwe uyu mwaka ukazaba unarimo ababa hanze y’u Rwanda bayizemo.

Dr Charles Murigande, umuyobozi wa Kaminuza wungirije ushinzwe iterambere rya kaminuza, avuga ko mu zindi nzira zizakoreshwa harimo gukoresha neza umutungo wa Kaminuza, no gukomeza guteza imbere amasomo y’ubumenyi n’ikoranabuhanga kugirango Leta ikomeze kuyitera inkunga.


Dr Rose Gasibirege, ufite mu nshingano guhuza Kaminuza n’abayirangijemo

Yisangize Inshuti.

Ibitekerezo

Tanga Igitekerezo