UNILAK yatangije ikigo gikora ubushakashatsi ku bidukikije n’umutungo kamere

Dr Ngamije Jean, Umuyobozi mukuru wa UNILAK,

Kaminuza y’Abadivantiste b’Abalayiki ya Kigali (UNILAK) yatangije ikigo kizajya gikora ubushakashatsi n’inyigo ku mutungo kamere no gutangaza ibivuye muri ubwo bushakashatsi .

Iki kigo cyashyizweho ku bufatanye bw’ibigo byo mu Bushinwa harimo ikitwa Xinjiang Institute of Ecology and Geography ndetse na Academy y’ubumenyi yo mu bushinwa.Iki kigo kikaba cyarafunguwe ku mugaragaro mu nama mpuzamahanga ku kubungabunga ibidukikije no kwita ku mutungo kamere yateguwe na UNILAK. Iyo nama yabereye i Kigali tariki ya 15 Ugushyingo 2016.

Dr Ngamije Jean, Umuyobozi mukuru wa UNILAK, agaruka ku kamaro k’iki kigo cy’ubushakashatsi cyamaze gutangizwa mu Rwanda ndetse ku nshuro ya mbere muri aka karere yagize ati “Iki kigo kizakora ubushakashatsi bugamije gufasha abaturage mu buzima bwabo bwa buri munsi kuko kizita ku bidukikije birimo umutungo kamere, cyane cyane ubutaka n’ihindagurika ry’ikirere."

Umuyobozi w’ishami ry’ubushakashatsi muri Kaminuza ya UNILAK, Dr. Gabriel Habiyaremye yatangaje ko icyo kigo kizajya gikora ubushakashatsi bugendanye n’ibifitiye akamaro abanyarwanda birimo ubushakashatsi ku micungire y’iterambere ry’umutungo kamere ugizwe n’ubutaka, amazi, amashyamba, mine na jewoloji .

Ubuyobozi bw’iki kigo buvuga ko kuva muri 2013 cyatangiye ibikorwa bitandukanye bigamije kugira uruhare mu kubungabunga ibidukikije, gufasha abaturage guhangana n’imihindagurikire y’ikirere, amashyamba ndetse n’ibindi bigize urusobe rw’ibinyabuzima.

Abahanga mu bumenyi benshi bemera ko nihatagira igikorwa, isi izarushaho guhura n’ibibazo by’amapfa, inzara kandi abantu bagasuhuka ari benshi bituruka ku mihindagurikire y’ikirere,ibyuka byoherezwa n’inganda n’ibindi akenshi byibasira ibihugu bikennye.

Yisangize Inshuti.

Ibitekerezo

Tanga Igitekerezo