Rwamagana:Bajya kwiga bakoherezwa kuvoma, batindayo bagahatwa inkoni

Mu kigo cy’ishuri cya GS Kitazigurwa giherereye mu Murenge wa Muhazi mu Karere ka Rwamagana haravugwa ibibazo bituma abanyeshuri batiga neza ndetse bamwe muri bo bagahamya ko bishobora gutuma batsindwa ibizamini bya Leta.

Aba banyeshuri kandi banavuga ko barambiwe ibihano biremereye bituma bamwe bareka ishuri.

Abaganiriye na Makuruki, bavuze ko boherezwa kuvoma amazi mu masaha yo kwiga, batinda bagakubitwa inkoni cyangwa bagahanishwa kumara icyumweru batiga.

Umwe muri bo wiga mu mwaka wa gatatu w’amashuri yisumbuye yagize ati “Ubusanzwe tugera ku ishuri guhera saa kumi n’ebyiri na 45 ariko tumara gukora etude tukabona baratubwiye ngo tugomba kuvoma amazi yo kudutekera.”

Akomeza agira ati “ ..kubera ko tuvoma kure tujyayo nka saa mbiri bikageza saa yine tukiri ku mugezi kubera inkomati iba ihari kandi ntitwemerewe no kuvoma amazi ya Muhazi, uyavoma bamukubita inkoni nyinshi cyane.”

Umwarimu wigisha kuri icyo kigo utarashatse ko izina rye ritangazwa na we yavuze ko uburyo abana bigamo bubangamiye imyigire yabo mu gihe harimo n’abazakora ikizamini cya Leta.

Ati “ Ubundi mu mashuri yisumbuye dutangira kwigisha saa yine ariko dutungurwa no kubona tujya kwigisha tugasanga abana bagiye kuvoma kandi twibaza impamvu bikorwa mu masaha yo kwigishamo.”

Yakomeje avuga ko mu bibangamiye abo bana harimo n’inkoni babakubita batinze kuzana amazi. Ati “..bigaragara ko abana bafite ibintu byinshi bibangamiye kuburyo badashobora kwiga neza , harimo kubakubita kugeza aho ubona abana batagifite ubushake bwo kwiga tukabona bishobora kugira ingaruka ku ireme ry’uburezi muri iki kigo.”

Aba banyeshuri kandi bavuga ko ikibababaza kurushaho ari bagenzi babo basa nk’abadakorwaho.

Umwe mu banyeshuri yagize ati “Ikindi ubona hano harimo no kuvangura kuko hano harimo bamwe mu bakobwa badakorwaho ngo kuko ari inshuti z’abayobozi kandi nabo barabyigamba, nabaha urugero rw’umukobwa uherutse kwitabira telefone mu ishuri nyamara abayimwatse barayimusubije ndetse batwirukanira amafaranga we bakamureka.”

Umuyobozi ushinzwe amasomo muri Gs Kitazigurwa Munyabugingo Justin ari na we ushinjwa gukubita abana ntabwo yashatse kugira icyo abivugaho , ahubwo yavuze ko byabazwa ubuyobozi.

Ntirenganya Jean Baptiste, Umuyobozi w’icyo kigo yavuze ko mu kigo ayobora nta kibazo gihari kandi ngo nta mwana utoneshwa kurusha abandi.

Yagize ati “Mu kigo nyobora nta bibazo bihari. Niba abana bavoma ntabwo ari ikibazo kandi amazi yarabuze muri iyi minsi, naho ku bana bavuga ko tubirukana abandi tukabasiga ntabwo nabihakana hari abana batanu ntajya nirukana kuko byasabwe n’ababyeyi babo. Kuba dos (ushinzwe amasomo) akubita abana ni ibisanzwe guhana, umwana wakosheje anyuzwaho akanyafu.”

Ntirenganya yavuze ahubwo ayo makuru akuririzwa n’abarimu batamushaka.

Ati “Hari abarimu bashaka ko mva hariya ndetse hari utunama bakorana n’uwahoze ayobora iri shuri mbona aribo bagumura abana naho nta kindi kibazo kiri mu kigo cyacu.”

Justin Ngabonziza

Yisangize Inshuti.

Ibitekerezo

Tanga Igitekerezo