Nyuma yo kwigaragambya hakamenwa ibirahuri by’ishuri, kuri ubu umwuka umeze ute muri GS Kageyo?

2

Nyuma y’uko abanyeshuri bo mu rwunge rw’amashuri rwa Kageyo ruherereye mu murenge wa Kageyo, mu karere ka Gicumbi, baturuka mu nkambi y’impunzi z’Abanyekongo bakoreye imyigaragambyo basaba ko abarimu babigishaga bari barasezeye ku kazi bagarurwa, kuri ubu ngo aba barimu bamaze gusimbuzwa abandi ndetse n’amasomo akaba akomeje kandi ngo abanyeshuri bariga neza.

Aba banyeshuri bari bigaragambije bikomeye aho bamenaguye ibirahuri by’amashuri ndetse banigaragambiriza mu mihanda y’umujyi wa Gicumbi, aho byasabye inzego z’umutekano guhagarika imyigaragambyo hakoreshejwe kurasa mu kirere.

Ku itariki 1 Kamena 2016, aba barimu bagera kuri 17 na bo b’impunzi bari bashyikirije ubuyobozi bw’iki kigo cy’ishuri ibaruwa igaragaza ko basezeye ku kazi bavuga ko bifuza kongererwa umushahara ukangana n’uw’abanyarwanda bigisha muri iki kigo.

Nyuma gato ngo aba barimu banze kugaruka ku kazi ahubwo babwira ubuyobozi bw’ikigo ko batazagaruka ku kazi niba ibyo bifuza bitubahirijwe, byatumye ubuyobozi butekereza ku kubasimbuza.

Nyuma yo kumva ko aba barimu bagiye gusimbuzwa abandi ngo bamwe muri bo batangiye kujya mu matwi y’abanyeshuri batangira kubashyiramo amatwara yo kutemera abo barimu bashya ari na byo bikekwa ko byateye iyo myigaragambyo yabaye ku wa 6 Kamena 2016.

Gusa nyuma y’iyo myigaragambyo ngo aba barimu bamaze gusimbuzwa abandi barimu kuburyo ngo amasomo yakomeje nkuko bisanzwe ndetse na bamwe muri aba banyeshuri batari bishimiye ko abarimu babo bahagarika akazi bigatuma bigaragambya, bakaba bemeza ko abarimu babazaniye bigisha neza.

Umwe muri abo banyeshuri aganira na Makuruki.rw yagize ati:” Ubu turiga nta kibazo byasubiye nk’uko mbere byari biri, kwigaragambya byaribagiranye abandi barimu batuzaniye baratwigisha neza nta kibazo.”

Aba banyeshuri bavuga ko kugeza ubu umwuka ari mwiza mu kigo nyuma y’uko cyari cyashegeshwe n’iyo myigaragambyo.

Undi munyeshuri yagize ati:” Nta kibazo turi kwiga neza amasomo aragenda, nta n’umwuka mubi uri ku kigo.”

Ibi kandi byemejwe n’umuyobozi wa GS Kageyo, Anastase Kamizikunze wavuze ko kugeza ubu umwuka umeze neza mu kigo ndetse n’abarimu basimbujwe abandi bahagaritse akazi ngo bakaba babanye neza n’abanyeshuri basanze.

Uyu muyobozi yavuze ko mu barimu 17 basimbujwe abahagaritse akazi ngo abagera kuri 6 ari abarimu b’abanyarwanda ndetse abandi 11 bakaba baturuka mu nkambi ya Gihembe.

Nyuma y’uko iyi myigaragambyo yari yangirije bimwe mu bikoresho by’ikigo, kugeza ubu ngo ikigo cyagiranye amasezerano n’umuryango wa ADRA Rwanda ufite mu nshingano aba bana y’uko bazasana ibyangirijwe n’iyi myigaragambyo.

Tubibutse ko nyuma y’uko iyi myigaragambyo iba hari abarezi batatu mu bari bahagaritse akazi bari batawe muri yombi bakekwaho kugumura abo banyeshuri bakaba bari gukurikiranwa n’ubutabera.

NDARISABAMUNGU Paul Clement

MAKURUKI.RW

Yisangize Inshuti.

Ibitekerezo 2

Tanga Igitekerezo