Musenyeri Mbonyintege yavuze ‘ingingo enye zikomeye’ zizahaza ireme ry’uburezi mu Rwanda

2

Musenyeri Smaragde Mbonyitege, avuga ko kunyuranya kw’inzego zirebwa n’uburezi, ubucucike bw’abanyeshuri mu mashuri, amakimbirane mu bashakanye, n’abarimu badahabwa agaciro ari byo bituma ireme ry’uburezi ritagera ku rwego rwifuzwa mu Rwanda.

Smaragde Mbonyintege, ubu ni umushumba wa diyosezi ya Kabgayi. Mu 1979 kugeza mu 1996 yari umwarimu naho kuva 1996 kugeza muri 2006 yari umuyobozi wa seminari nkuru ya Nyakibanda aza kuhava aba umwepisikopi aho nubundi atagiye kure y’uburezi. Ibi bigaragaza ko afite ubunararibonye mu burezi by’umwihariko ubwbwo mu Rwanda.

Avuga ko uburezi bukwiye kubakira ku bufatanye bwa Leta, ababyeyi, Kiliziya na Mwarimu kandi izi nzego zose zigahuza.

Ati: "Uburere mu Rwanda njyewe mbona buhangayikishije abantu bose, buhangayikishije abayobozi, buhangayikishije abarezi, buhangayikishije ababyeyi bunahangayikishije Kiliziya Ibyo ubwabyo kuba bimeze bityo mbona ari ikintu cyiza."

Aykomeje avuga ko nubwo izi nzego zihangayikishijwe n’uburezi zose zananiwe kwicara ngo zige ku muti w’ikibazo cy’ireme ry’uburezi kigenda gifata indi ntera mu Rwanda. Ngo abona buri wese akora ukwe n’undi ukwe kandi nta musaruro bizatanga.

Ati: nta na rimwe ndabona abantu bicaye hamwe muri izo nzego uko ari enye ngo bige uko bakora uburezi, buri wese atekereza ku ruhande rwe,....politiki y’uburezi mu Rwanda yubatse neza ariko kubishyira mu bikorwa kuri za nzego nyinshi zitandukanye haracyari urugendo runini rugomba gukorwa, haracyari intambwe igomba guterwa.

Agaruka ku ireme ry’uburezi mu Rwanda, Musenyeri Mbonyintege yavuze ko ireme ry’uburezoi bwo mu Rwanda ryicwa n’ireme ry’imibanire y’abashakanye na ryo ryagiye hasi muri iyi minsi.

Ati: "Hari ingorane zinakomeye mbona zibangamira ireme ry’uburezi zidakunze no kuvugwa cyane, buriya ireme ry’uburezi mu bana ryambaye isura y’ireme ry’imibanire n’imibereho y’ababyeyi dufite muri iki gihugu cyacu, umwana udafite umuryango ubanye neza mu ishuri biramunanira, icyo ni ikibazo gikomeye.... Ntabwo uzagira ireme ry’uburezi udafite ireme ry’ingo z’abashakanye. Ntibizabaho."

"....Abarimu ubungubu kumashuri usanga bahanganye n’icyo kibazo cy’umwana wiga atabishaka, adatekanye, arakubwira ati ese ubundi ndiga gute kandi n’imuhira nta kigenda? Igihe cyo gusurwa kiragera nyina akaza kumusura ukwe na se akaza kumusura ukwe badashobora kuzana, ibyo bibazo turabifite, byatangiye ari ibibazo bikeya ariko turabona bigenda byiyobngera, gukemura rero ikibazo cy’ireme ry’uburezi harimo no gukemura ikibazo cy’imibanire y’abashakanye mu ngo zabo."

Musenyeri Mbonyintege yavuze ko ubucucike bugaragara muri amwemu mashuri ari indi mbogamizi ikomeye ituma uburezi bwo mu Rwanda butagira ireme. Aha yabivuze ahereye no ku mashuri ya Kiliziya abarizwa muri diyoseze ya Kabgayi abereye umushumba.

Ati: "Abana hari ubwo batubana benshi ugasanga amashuri afite ubucucike, ubwo rero bugatuma budindiza iremere ry’uburezi, ikindi ni abarimu bigisha, nabo ubona bafite ikibazo mu myumvire y’umurimo."

Avuga ko cyera umwarimu yahabwaga agaciro akubahwa ariko kuri ubu ngo ’asa nuwatakaye ahantu mu kintu cy’igiturage’ bakabyitirira imishahara mikeya kandi kuri we ngo abona nta gihembo kibaho wahemba mwarimu.

Ati: " igihembo cya mbere cya mwarimu cyagombye kuba icyubahiro tumugomba, tukamugaragariza icyo tumutezeho nk’umurezi. Ku Murenge bakaba bamuzi na Leta imuzi nk’umurezi ntasuzugurwe cyangwa ngo asubizwe inyuma, umushahara nibyo na wo wagombye kugira uko umera ariko wenda n’ubwinshi bwabo bituma no gutekereza amafaranga umuntu yabahemba ataboneka ariko njye mpamya ko n’umurimo w’umwarimu utagira igihembo. Ntakibaho!"

Mbonyintege avuga ko kugirango mwarimu asubirane agaciro n’icyubahiro yahoranye ari uko umuryango nyarwanda wabanza guhindura imyumvire yo kubaha umuntu kubera ibyo atunze n’amafaranga afite.

Ati : "muri iki gihe icyubahiro cy’umuntu kibarirwa k’umutungo afite, iyo utunze byinshi urubahwa watunga bike ugasuzugurwa, ahongaho harakocamye, umuntu akakubahira kubera ko utunze amafaranga cyangwa utunze inzu nziza ntakubonemo agaciro ufite! njye numva babikosora mwarimu ntiyubahirwe umutungo cyangwa amazu yubatse akubahirwa umurimo akora kuko ari ingenzi."

Kuri we ngo abona agaciro k’ibintu karicuritse kuko usanga abantu baha agaciro ibintu aho guha agaciro akazi umuntu akora n’icyo kamariye sosiyete.

Ibi Smaragde Mbonyintege yabivugiye mu kiganiro yagiranye na RBA kuri iki cyumweru tariki 25 Kamena 2017.

Yisangize Inshuti.

Ibitekerezo 2

  1. Ntaho wabeshye pe cyera abarimu barubahwaga aho bari hose nabana bakabubaha kumashuri ariko ubu umwana yubahuka mwarimu ibintu bitahozeho cyera. Ariko burya kugirango umwana yubahe biva mumuryango mugihe mumuryango nta burere byose birapfapfana. Musenyeri rwose warebye kure noneho rero muhere aho iwanyu mukiriziya mukangure ababyeyi wenda nubwo ari urugendo rurere bizajya muburyo

Tanga Igitekerezo