Hasobanuwe akamaro ka mudasobwa zihabwa abiga mu mashuri yisumbuye

Abayobozi b’ibigo by’Amashuri yisumbuye bo mu mujyi wa Kigali baravuga ko gahunda yo gukoresha mudasobwa ku banyeshuri bose mu Rwanda bizongera ireme ry’uburezi, bigatuma abanyeshuri babasha guhanga ku isoko ry’umurimo ryo hanze y’u Rwanda.

Ibi abayobozi b’ibigo by’amashuri byo mu Karere ka Gasabo babivuze nyuma y’inama yabahuje n’abayobozi baturutse muri kampani ya Smart Investment Company kuri uyu wa 06 Nzeli 2016, aho basobanurirwaga ibyiza bya gahunda yo guha abanyeshuri biga mu mashuri yisumbuye nk’uko byasabwe na Minisitiri w’Uburezi.

Izi mudasobwa zakoranywe gahunda (software) irimo amasomo n’ibitabo byose bikenerwa n’abanyeshuri ndetse ikaba ifite n’uburyo abanyeshuri bashobora gukorana batari kumwe ndetse n’umwarimu wabo akaba yakurikirana ibyo bakora niyo baba batari kumwe.

Ndagije Clement ushinzwe iterambere ry’uyu mushinga wo gutanga mudasobwa mu banyeshuri bo mu mashuri yisumbuye avuga ko iyi ari gahunda ya leta y’u Rwanda igamije guteza imbere gukoresha ikoranabuhanga, hakaba hakorwa amasezerano hagati ya sosiyete icuruza izi mashini ndetse n’ababyeyi b’abanyeshuri bakajya bishyura mu byiciro cyangwa se bakishyura ako kanya ku babishoboye.

Yagize ati “ amasezerano tuvuga ni ayo ikigo cyacu gisinyana n’umubyeyi kugira ngo umwana abone imashini, ayo masezerano akaba arimo uburyo umubyeyi ashobora kwishyura mu byiciro bitewe n’uko abishaka akaba ashobora kwishyura mu mezi 3,6,12 n’amezi 25. Umubyeyi yishyura ibihumbi 15 ako kanya umwana tukamuha imashini ubundi akajya yishyura mu byiciro.’

Imashini imwe igura 21 990 ariko abishyura mu gihe cy’amezi 3 mu buri kwezi batanga 84 081, abishyura mu gihe cy’amezi 6 batanga 43289, abishyura mu gihe cy’amezi 12 batanga 22929 ku kwezi naho abishyura mu mezi 25 bakishyura 12 400 buri kwezi.

Ndagije Jean Claude akuraho impungenge ku baba bakeka ko izi mashini zaba zidakomeye kuko zakorewe mu Rwanda, kuko zifite ububiko buhagije kandi na leta y’u Rwanda ikaba yarazemeye.

Ennex Mugabo uyobora ishuri rya Saint Paul avuga ko iyi gahunda bayakiriye neza kuko ije yunganira iyari isanzwe mu mashuri abanza ya One laptop per Child ndetse ko nta gushidikanya bizongera ireme ry’uburezi.

Yagize ati “ iyi gahunda yo guhabwa computers za Positivo tuyakiriye neza kuko ije inunganira one lap top per child leta y’u Rwanda yaduhaye mu mashuri, kandi turabona ko izateza uburezi bwacu imbere nk’uko gahunda ya leta ari ukugira uburezi bufite ireme.”

Mugabo kandi avuga ko bagiye gukora ubukangurambaga mu babyeyi, bakitabira iki gikorwa ndetse ko yizeye ko bazabyumva kuko agaciro k’ibiri muri izi mudasobwa karuta kure amafaranga bazazigura.

Ikigo kizajya gihabwa amafaranga ibihumbi 8 kuri buri munyeshuri uhawe iyo mudasobwa mu rwego rwo kugura umuriro w’amashanyarazi ndetse n’ibindi bikorwa bizakenerwa, kandi n’abarimu bakazabanza guhabwa amahugurwa y’uko bazakoresha izo mudasobwa.

Kugeza ubu izi mudasobwa zatanzwe mur Lycee de Kigali ndetse n’ibindi bigo byo mu turere twa Kicukiro na Nyarugenge bikaba byaramaze gusinya amasezerano igisigaye kikaba ari ukuzihabwa, bikazanagera mu bindi bigo byose byo mu Rwanda.

Theodore Ntarindwa ushinzwe itangazamakuru muri Smart Investment Africa

Cyusa uturutse ibumoso, na Ndagije Clement ushinzwe gukurikirana gahunda yo gutanga mudasobwa mu mashuri

Yisangize Inshuti.

Ibitekerezo

Tanga Igitekerezo