Mubyateje ubukene UR ngo harimo no kurihira amashuri abakozi bayo basaga 200

Abadepite babajije Minisitiri w’uburezi impamvu Kaminuza y’u Rwanda imaze iminsi mu bibazo by’ubukene kandi idakodesha ibikoresho cyangwa inyubako ndetse ikaba inaterwa inkunga na Leta we asubiza ko amafaranga ya UR ajya muri byinshi birimo no kurihira amashuri abakozi bayo basaga 200.

Ibi Minisitiri w’uburezi Dr Musafiri Papias Malimba yabitangarije komisiyo y’uburezi, Ikoranabuhanga, umuco n’urubyiruko mu nteko ishinga amategeko kuri uyu wa 19 Ukwakira 2017.

Yabanje gusobanura impamvu zo guhinduranya ibyicaro by’ama koleji ya Kaminuza y’u Rwanda avuga ko bigamije kunoza uburyo bwo gusaranganya ibikenerwa no gufasha abanyeshuri kwigira ahari ibikoresho bihagije.

Yavuze ko kwimura abanyeshuri mu makoreji amwe bajya mu yandi nta tegeko byishe kuko abanyeshuri bari batatanye ku buryo bigaga nabi bityo ngo abona hari hakenewe icyemezo cyo kubihindura.

Ati: “Izi Mpinduka ni nziza, urugero nk’iyo urebye ukuntu ibintu byifashe i Rukara aho twajyanye koleji z’uburezi zose, uhita ubona uburyo hariya hantu hatakoreshwaga uko bikwiye.”
Yagarutse no ku guhuza koleji z’ubuforomo agira ati: “…Twari dufite koleji y’ubuforomo i Ngoma, i Gicumbi, i Nyagatare, i Rwamagana n’ahandi kandi muri zose nta n’imwe yari irengeje abanyeshuri 300, byarumvikanaga cyane kuba twazimurira i Huye zose uretse iya Rwamagana yari ifite ibyangombwa bihagije.”

Depite Philbert Uwiringiyimana yabajije Minisitiri Musafiri imvano y’ubukene bugaragara muri Kaminuza y’u Rwanda agira ati: “Kaminuza zigenga zirakora neza kandi zishyuza make ugereranyije na UR, ni gute iriya kaminuza yaba idakodesha inyubako, ikanahabwa amafaranga na Leta ariko ikagira ibibazo by’ubukene bukabije?"

Minisitiri Musafiri yasubije avuga ko amafaranga ya Kaminuza agendera mu bintu byinshi ati: “ Hari ahantu henshi amafaranga akoreshwa, nk’urugero hari abakozi ba UR basaga 200 bishyurirwa amashuri kugirango bongere ubumenyi, kandi bazagaruka bakorere UR.”

Uyu muyobozi yanavuze ko bashyizeho ingamba ko buri Koleji izajya yishakira ingengo y’imari yayo bikagenzurwa na UR nk’ikigo. Ibi ngo bizagabanya inzira ndende byasabaga amakoleji kugera ku mafaranga ziba zikeneye gukoresha.

Asubiza ku mpamvu bamwe mu banyeshuri barangiza muri Kaminuza y’u Rwanda bahura n’ubushomeri bukabije, Minisitiri Musafiri yavuze ko ibyo byaba bishingiye ku bumenyi budahagije abo banyeshuri bakura muri Kaminuza.

Ati: “Ikibazo cy’ubushomeri ni ingaruka zo kutagira abanyeshuri bafite ubumenyi buhagije, ariko uburyo turimo gukoresha bugamije kongera ireme ry’uburezi no kongera uburyo bwo guhanga imirimo.”

Iyi komisiyo yari yatumije Minisitiri w’uburezi nyuma y’ingendo yakoze muri Kaminuza y’u Rwanda mu rwego rwo kureba iterambere ryayo.

The newtimes dukesha iyi nkuru yatangaje ko mu munsi mike iyi komisiyo izanahura n’abayobozi ba Kaminuza y’u Rwanda ndetse n’aba Minisiteri y’abakozi ba Leta n’Umurimo bakaganira ku bibazo byugarije uburezi.

Yisangize Inshuti.

Ibitekerezo

Tanga Igitekerezo