Kuba UNESCO yamurikiye ubushakashatsi bwayo mu Rwanda si impanuka-D.r Papias Musafiri

Minisitiri w’Uburezi mu Rwanda D.r Papias Malimba Musafiri
Kuri uyu wa Kabiri tariki 6 Nzeli 2016 Minisiteri y’Uburezi mu Rwanda ifatanyije na Ishami ry’Umuryango w’Abibumbye rishinzwe uburezi n’umuco (UNESCO) bashyize ahagaragara raporo ku kamaro k’uburezi ku iterambere rirambye.

Uyu muhango witabiriwe na Minisiteri y’uburezi mu Rwanda, UNESCO yanakoze iyi raporo ndetse n’ibindi bigo bifite aho bihurira n’uburezi.

Minisitiri w’Uburezi yavuze ko kugira ngo iyi Raporo ku mugabane w’Afurika ize gushyirwa ahagaragara mu Rwanda byatewe n’ingufu u Rwanda rwashyize mu guteza imbere uburezi.

Ati "Kuza kumurikira iyi raporo mu Rwanda ntibyabaye impanuka ahubwo habaye guhitamo neza k’umuryango wa UNESCO kubera ko u Rwanda rwitwaye neza mu gushyira mu bikorwa intego irebana n’uburezi kuri bose."

Umuyobozi wungirije uwa UNESCO muri Afurika Firmin Matoko yavuze ko UNESCO yishimiye gushyira hanze iyi raporo yibanda ku ntego ya kane mu ntego 17 z’iterambere rirambye, ngo kuko bizatuma harebwa ibitagenda neza ndetse n’ibigenda neza bityo uburezi nka kimwe mu bifite uruhare runini mu iterambere rirambye bukazagerwaho binyuze mu gukora cyane kandi mu bufatanye.

Muri iyi Raporo kandi hakubiyemo ibyagezweho mu rwego rwo kugera ku iterambere rirambye binyuze mu burezi harimo nko kuba muri 2016 hamaze gutangwa buruse zigera kuri 2500 ku banyeshuli bajya kongera ubumenyi na gahunda y’uburezi kuri bose imaze kugera ku rwego rwiza.

Bimwe mu byitezwe mu gushyira mu bikorwa intego z’iterambere rirambye (SDG4) harimo kwibanda ku burezi bufite ireme, guha amahirwe abifuza kwiga, guhanga integanyanyigisho zitandukanye ndetse no guharanira ko muri 2030 uburezi buzakura abagera kuri miliyoni 60 mu bukene.

Minisitiri w’uburezi D.r Papias Malimba Musafiri yavuze ko iyi raporo ifite akamaro kanini kuko igaragaza uburyo iterambere mu burezi rishobora kugira akamaro ku buzima, uburinganire, kugabanya ingaruka z’ibiza no gufata neza ibidukikije, kugera ku bukungu, kubona akazi ndetse no guharanira amahoro.

Musafili yavuze ko n’ubwo mu Rwanda habaye amahano ya Jenoside yakorewe abatutsi muri 1994 bitabujije u Rwanda gutera imbere mu bijyanye n’uburezi.

Ubu nibwo bwa mbere UNESCO isohoye iyi raporo ikaba yashyizwe hanze mu bihugu bine ku isi birimo n’u Rwanda,u Bwongereza, Malayisiya na Colombia. Izajya isohoka buri mwaka, ikaba ikubiyemo uburyo bw’isuzuma ry’intego 17 z’iterambere rirambye, uburyo zigenda zishyirwa mu bikorwa, ibibazo birimo ndetse n’icyo isi cyangwa buri gihugu cyagenda gikora kugira ngo gikemure ibyo bibazo.

Firmin Matoko umuyobozi wungirije wa UNESCO muri Afurika

Minisitiri Musafiri,Umunyamabanga muri MINEDUC ushinzwe amashuri abanza n’ayisumbuye hamwe n’ababatanze ibiganiro


Bafashe ifoto y’urwibutso bafite ibitabo bikubiyemo Raporo ya SDG 4

Yisangize Inshuti.

Ibitekerezo

Tanga Igitekerezo